Nangin matuod gid ini kay ginpalig-on ni Jehova ining mapisan nga mga manugbantala. Sang 1920, ang 225 ka payunir nangin 350. Kag sa sini man nga tuig, sobra 8,000 ka manugbantala ang naghatag sa ulong talatapan sang ila report sa pag-alagad. Amo ini ang una nga tion nga natabo ini. Ginpakamaayo gid sila ni Jehova.

Sang Marso 21, 1920, nagpamulongpulong si Joseph F. Rutherford sa tema nga “Millions Now Living Will Never Die” (Minilyon nga Nagakabuhi Karon ang Indi Na Mapatay). Sia sadto ang nagapanguna sa hilikuton sang mga Estudyante sang Biblia. Ginhimo gid nila ang ila bug-os nga masarangan para maimbitar ang mga interesado sa sini nga pamulongpulong. Gin-arkilahan nila ang isa sa pinakadaku nga tilipunan sa New York City kag mga 320,000 ka imbitasyon ang ila napanagtag.

Sobra pa sa ginapaabot nila ang nagkadto. Napuno ang tilipunan sang sobra 5,000 ka tawo, kag mga 7,000 pa ang wala nakasulod. Ginsiling sang The Watch Tower nga isa ini sa pinakadaku kag makapalig-on gid nga pagtilipon sang mga Estudyante sang Biblia.

Nagbantog gid ang mga Estudyante sang Biblia sa ila pagbantala nga “minilyon nga nagakabuhi karon ang indi na mapatay.” Wala pa nila nahangpan sadto nga dapat nila ibantala ang mensahe sang Ginharian sa mas madamo nga lugar. Pero dalayawon gid ang ila kapisan. Si Ida Olmstead, nga nagatambong na sa mga miting sang 1902, nagsiling, “Kabalo kami nga pakamaayuhon sang Dios ang katawhan sa palaabuton, gani ginasugid gid namon ining maayong balita sa tanan nga mabantalaan namon.”

Para masigurado nga padayon nga mabaton ang mga publikasyon, nag-imprinta man ang mga kauturan sa Bethel. Nagbakal sila sang imprintahan kag ginbutang nila ini sa isa ka bilding sa 35 Myrtle Avenue, Brooklyn, New York. Gin-arkilahan nila ini nga bilding, kag mga pila lang ini ka bangga halin sa Bethel.

Nagsugod sa pag-alagad sa Bethel si Leo Pelle kag si Walter Kessler sang Enero 1920. Si Walter nagsiling, “Pag-abot namon, ginsilingan kami sang overseer sa printery, ‘May isa ka oras kag tunga pa antes manyaga.’ Ginpangabay niya kami nga ipasaka ang mga karton sang mga libro halin sa basement.”

Ginsugid ni Leo ang natabo pagkasunod nga adlaw. Nagsiling sia: “Gintinluan namon ang mga  dingding sa first floor sang bilding. Amo ini ang pinakamahigko nga trabaho nga naeksperiensiahan ko. Pero para ini sa hilikuton sang Ginuo, gani nalipay kami.”

Sa pila lang ka semana, nakaimprinta na dayon sang The Watch Tower ang mapisan nga mga kauturan. Gin-imprinta nila sa imprintahan sa second floor ang 60,000 ka kopya sang The Watch Tower nga Pebrero 1, 1920. Sa basement, may ginbutang pa gid ang mga kauturan nga imprintahan nga gintawag nila nga Battleship. Gin-imprinta man nila ang The Golden Age sugod sa Abril 14, 1920, nga isyu. Ginpakamaayo gid ni Jehova ang panikasog sang mapisan nga mga boluntaryo.

Nalipay gid ang matutom nga katawhan ni Jehova nga mangin mapisan liwat sa pagbantala kag mahiusa. Pero sang 1917 asta sang 1919, ginbiyaan sang pila ka Estudyante sang Biblia ang organisasyon. Paano sila mabuligan?

Ang Abril 1, 1920, nga The Watch Tower may artikulo nga “Pabaloran Naton ang Paghidait.” Ginpalig-on sini ang mga nagbiya sa organisasyon: ‘Sigurado kami nga kalimtan na sang mga gusto magpagiya sa balaan nga espiritu ang ila indi maayo nga nahimo sang una kag magaupod sila liwat sa katawhan sang Dios para himuon ang Iya hilikuton.’

Madamo ang napalig-on sa sining mahigugmaon nga laygay. Ang isa ka mag-asawa nagsulat: “Indi gid husto ang ginhimo namon sang nagligad nga mga tinuig kay nagpadayon ang iban [sa pagbantala] pero kami nag-untat. . . . Gusto gid namon nga mangin mapisan sa pagbantala.” Nangin masako gid ining nagbalik nga mga kauturan.

Sang Hunyo 21, 1920, ginsugdan sang mga Estudyante sang Biblia ang pagpanagtag sang “ZG,” ukon ang edisyon sang The Finished Mystery. * Madamo sini nga libro ang gintago kay gindumilian ini sang 1918.

 Indi lang ang mga payunir ang ginpangabay nga magpanagtag sini, kundi ang tanan nga manugbantala. “Dapat kinabubut-on ini nga himuon sang tanan nga bawtismado nga manugbantala sa tanan nga kongregasyon. Amo ini ang dapat pamensaron sang kada isa: ‘Himuon ko gid’ ang pagpanagtag sang ZG.” Si Edmund Hooper nagsiling nga amo ini ang una nga beses nga nagpamalaybalay ang madamo nga kauturan. Nagsiling man sia, “Nahangpan namon nga mas madamo pa gali sang dapat himuon sangsa ginhunahuna namon.”

Sang Bug-os Kalibutan nga Inaway I, mabudlay ang pagkomunikar sa mga Estudyante sang Biblia sa iban nga pungsod, gani gusto ni Brother Rutherford nga palig-unon ini nga mga kauturan kag organisahon liwat ang pagbantala nga hilikuton. Sang Agosto 12, 1920, nagbiyahe sia kag ang apat pa ka brother para magkadto sa Britain, Continental Europe, kag sa Middle East.

Sang ara sa Britain si Brother Rutherford, naghiwat ang mga Estudyante sang Biblia sang tatlo ka kombension kag 12 ka pagtilipon para sa publiko. Ginbulubanta nga 50,000 ang kabilugan nga nakatambong. Ang The Watch Tower nagsiling: “Napalig-on gid ang mga kauturan. Nalipay gid sila nga nagsuod sila sa isa kag isa kag nagbuligay sa pag-alagad.” Sa Paris, ginpamulongpulong liwat ni Brother Rutherford ang tema nga “Millions Now Living Will Never Die.” Napuno gid ang tilipunan, kag 300 ka tawo ang gusto magtuon sing dugang pa parte sa ila nabatian.

Sa masunod nga mga semana, nagkadto si Brother Rutherford kag ang mga kaupod niya sa Athens, sa Cairo, kag sa Jerusalem. Para mabuligan ang mga nangin interesado sa sini nga mga lugar, naghimo si Brother Rutherford sang branch office sa banwa sang Ramallah, nga malapit sa Jerusalem. Dayon nagbalik sia sa Europe kag naghimo sia sang Central European Office. Nagbutang sia sang imprintahan didto.

Sang Septiembre 1920, gin-imprinta sang mga Estudyante sang Biblia ang Num. 27 nga The Golden Age. Ginsugid sining espesyal nga isyu ang parte sa paghingabot sa mga Estudyante sang Biblia sang 1918. Ang Battleship, nga ginsambit kaina, adlaw kag gab-i nga nag-imprinta para makahimo sang sobra apat ka milyon ka kopya sini nga magasin.

 Nabal-an sang mga nagbasa sini nga magasin ang parte sa natabo kay Emma Martin. Si Sister Martin isa ka payunir sa San Bernardino, California. Sang Marso 17, 1918, nagtambong sia sa miting sang mga Estudyante sang Biblia, kag kaupod niya ang tatlo ka brother nga sanday E. Hamm, E. J. Sonnenburg, kag E. A. Stevens.

May isa ka tawo nga nagtambong sa sini nga miting pero indi bangod nga gusto niya magtuon sang Biblia. Nagsiling sia, “Nagtambong ako sa sini nga miting . . . kay ginsugo ako sang mga opisyal sang gobierno nga magpangita kag magkuha sang ebidensia.” Nakakuha sia sang libro nga The Finished Mystery, kag amo ini ang ginapangita niya nga “ebidensia.” Pagligad sang pila ka adlaw, gin-aresto si Sister Martin kag ang tatlo ka brother. Ginkasuhan sila nga ginlapas nila ang isa ka kasuguan kay ginpanagtag nila ang libro nga ginadumilian sang gobierno.

Ginsentensiahan si Sister Emma kag ang tatlo ka brother nga mapriso sing tatlo ka tuig. Nag-apelar sila sing madamo nga beses pero wala sila magdaug. Gani sang Mayo 17, 1920, ginpriso sila. Pero wala magdugay, may maayo nga natabo.

Sang Hunyo 20, 1920, ginsaysay ni Brother Rutherford ang eksperiensia sini nga mga kauturan sa isa ka kombension sa San Francisco. Para sa mga nagtambong, indi gid husto ang ginhimo sa sini nga mga Cristiano, gani nagpadala sila sing telegrama sa presidente sang United States. Nagsulat sila: ‘Indi gid makatarunganon ang pagsentensia kay Mrs. Martin nga ginlapas niya ang kasuguan. Nagapati kami nga nag-abusar ang mga opisyal sang gobierno kay ginmaniobra nila nga mapriso si Mrs. Martin.’

Pagkasunod nga adlaw, ginhatagan dayon ni President Woodrow Wilson sing pardon si Sister Martin, si Brother Hamm, si Brother Sonnenburg, kag si Brother Stevens. Gani ginpagua sila sa prisuhan.

Sang malapit na matapos ang 1920, madamo gid sang rason nga malipay ang mga Estudyante sang Biblia. Padayon nga nag-uswag ang mga ginahimo sa ulong talatapan, kag nangin mapisan pa gid ang matuod nga mga Cristiano sa pagbantala nga ang Ginharian sang Dios ang makasolbar sa mga problema sang katawhan. (Mat. 24:14) Sang masunod nga tuig, sang 1921, mas daku pa gid ang ila ginhimo nga pagbantala sang kamatuoran parte sa Ginharian.