Paano ka nangin musikero?

Musikero ang akon mga ginikanan. Gintudluan nila ako sang lima ako ka tuig. Sang ulihi, nagtuon ako sing musika sa Tashkent.

Ngaa mabudlay ang pagtokar sa orkestra?

Wala sing duha ka orkestra ang magkapareho. Pareho sila sang duha ka dalagku nga instrumento nga “ginatokar” sang ila konduktor. Mahimo nga ang panguna nga kabudlayan para sa soloista amo nga kinahanglan mo ang maayo nga pagpakig-angot sa konduktor. Daw pareho ini sa pag-istoryahanay sang duha ka mag-abyan—sa baylo nga isa lang pirme ang magahambal, dapat magbuslanay sila. Sa masami, may ara lang isa ukon duha ka ensayo para himuon ini.

Daw ano kalawig ka nagaensayo?

Indi magkubos sa tatlo ka oras kada adlaw, kag indi lamang ini pag-ensayo sang mabudlay nga mga linya. Ginatun-an ko man ang bilog nga piyesa nga ginahanda ko—nga wala ini ginatokar. Nagapamati man ako sing iban pa nga piyesa sang amo nga manugkomposo para may dugang pa ako nga ideya sa ginahanda ko nga piyesa.

Paano mo masiling nga maayo ang isa ka pianista?

Kon “mapakanta” niya ang piano. Kay man, ang piano isa ka sahi sang percussion instrument. Sa tapos nga mapatunog mo ang nota, mahinay dayon ini—indi pareho sa instrumento nga ginahuyop ukon sa tingog sang tawo nga mahimo magpabilin ang tunog ukon puede pa gani mapabaskog. Ang problema sang pianista amo nga indi maghinay ang nota. Ginahimo nila ini paagi sa indi hilmunon nga paggiho sang ila tudlo kag butkon, upod ang komplikado nga paggamit sang natuo nga pedal, nga nagapadugay kag nagapabag-obag-o sang tunog sang nota. Kon mangin hanas  na ang pianista sa sining mabudlay nga teknik, mahimo na niya mapatunog ang piano nga daw plawta, budyong, ukon bisan pa gani orkestra. Mahimo pa gani nila sundon ang pinakamaayo nga instrumento sa musika—ang tingog.

Maathag nga nanamian ka gid sa musika.

Para sa akon ang musika isa ka lenguahe nga direkta nga nagapautwas kag nagapukaw sang balatyagon nga mabudlay, ukon imposible ipabutyag sa tinaga.

Ano ang nagpainteres sa imo sa espirituwal nga mga butang?

Ang amon balay puno sing libro nga ginbakal sang akon amay sa Moscow. Ang isa ka libro nga nagpainteres gid sa akon amo ang nagaunod sang mga sugilanon sa Biblia parte sa kasaysayan kag inagihan sang mga Israelinhon. Ang isa pa ka libro nga akon nabasahan amo ang Mahimu Ka Mabuhi sing Dayon sa Paraiso sa Duta nga ginhimo sang mga Saksi ni Jehova. * Ang maathag nga pagpresentar sini sang panudlo sang Biblia amo ang nagpadayaw sa akon. Sang nagsaylo ako sa Espanya sang 1991 para magtuon sing musika, gindala ko ang libro kag ginbasa ini. Natun-an ko ang pagtuo nga nabase indi lamang sa emosyon kundi amo man sa pangatarungan kag makapakumbinsi nga mga ebidensia.

Ang panudlo nga nagpainteres gid sa akon amo ang promisa sang Biblia nga ang mga tawo mabuhi sing wala katapusan sa duta. Daw amo gid man sina ang husto! Kag wala ko pa makilala sadto ang mga Saksi ni Jehova. Pero nagpamat-od ako nga kon makaistorya ako sa ila, mangabay ako nga magtuon sa Biblia.

Paano mo nakilala ang mga Saksi?

Pila ka adlaw pagkatapos ako makapamat-od, nakita ko ang duha ka babayi nga may ginauyatan nga Biblia. ‘Daw pareho sila sa mga tawo nga nabasahan ko sa libro,’ sa hunahuna ko. ‘Nagawali sila pareho sang mga Cristiano sang panahon sang Biblia.’ Wala madugay, nagatuon na ako sing Biblia sa mga Saksi. Subong, nalipay gid ako nga buligan ang iban nga makatuon parte sa aton Manunuga.

Ano ang nagkumbinsi sa imo, bilang atiesta anay, nga magpati sa Manunuga?

Ginbuligan ako sang musika. Halos tanan nanamian sini, kag indi ini mahimo sang mga sapat. Mapabutyag sang musika ang kalipay, kompiansa, kalulo, kag halos tanan nga emosyon. Masami nga nagaugoy-ugoy kita kon mabatian naton ang musika. Pero kinahanglan gid bala naton ang musika para mabuhi? May papel bala ini sa teoriya sang mga ebolusyonista nga “mabilin ang mabakod”? Sa pamatyag ko wala. Para sa akon, indi makatarunganon nga maghinakop nga ang utok sang tawo, nga may ikasarang sa paghimo kag pag-apresyar sang musika pareho nanday Mozart kag Beethoven, resulta sang ebolusyon. Mas makatarunganon ang paathag nga ang aton utok gintuga sang isa ka maalam kag mahigugmaon nga Manunuga.

Ngaa nagpati ka nga ang Biblia halin sa Dios?

Ang Biblia koleksion sang 66 ka magagmay nga libro nga ginsulat mga sobra 1,600 ka tuig sang mga 40 ka tawo. Ginpamangkot ko ang akon kaugalingon, ‘Sin-o ayhan ang naghimo sining nahiusa nga obra-maestra?’ Ang rasonable lamang nga sabat amo ang Dios. Sa hunahuna ko, ang Biblia daw pareho sang isa ka ambahanon nga may tumalagsahon nga pagkahuman, maalamon nga piyesa, kag makatalandog nga mensahe para sa tanan nga tawo.