Magdiretso sa kaundan

Magdiretso sa listahan sang kaundan

Ang Problema sa Kaakig

Ang Problema sa Kaakig

 Ang Problema sa Kaakig

Ang isa ka tawo nag-order sing sandwich sa drive-thru sang restawran. Nainit sia kay sa pamatyag niya kadugay sang iya order. Sa kaakig niya, nagsulod sia sa restawran, ginpahog ang empleyado, gintiklod, kag gintampa. Ginkuha niya ang sandwich kag naggua.

KON kaisa nagapangakig man kita. Kay man, ang kaakig isa sa aton mga balatyagon pareho sang gugma, paglaum, kabalaka, kasubo, kag kahadlok. Ang kontrolado nga kaakig mahimo ipakita sa nagakaigo nga paagi kag may kaayuhan ini. Halimbawa, makabulig ang kaakig para malampuwasan sang isa ang mga upang kag problema.

Pareho sa ginsambit sa ibabaw, may malain man nga epekto ang kaakig. May mga tawo nga dali maakig, pirme nagapangakig, kag grabe mangakig. Kon maakig, nagapamuyayaw sila kag nagapanakit. Nagapadala sila sa ila kaakig. Ang indi mapunggan nga kaakig makahalalit gid, amo nga maapektuhan sini ang panghunahuna, balatyagon, pamatasan, kag ang kaangtanan sa iban.

Ang mga tawo nga indi makakontrol sang ila kaakig nagahatag sing kasubo indi lang sa ila kaugalingon kundi sa iban man. Mahimo man sila mangin bayolente bisan sa ginagmay nga mga butang, kag nagaresulta ini sa problema. Binagbinaga ang masunod nga mga halimbawa:

Ang isa ka tawo nga nagalakat upod sa iya mga amigo gintiro sa liog sang nagsag-id ang bag sang iya amigo sa isa ka tawo sa masako nga kalye.

Ginsakit sang 19 anyos nga lalaki ang 11 ka bulan nga bata sang iya nobya asta mapatay. Ngaa? Kay grabe gid ang iya kaakig sang natandog sang bata ang kontrol sang kompyuter nga iya ginahampangan sang bayolente nga video game, kag napierde sia.

Ang pareho sini nga mga report sa bilog nga kalibutan nagapakita nga nagadamo na gid ang mga tawo nga nabudlayan sa pagkontrol sang ila kaakig. Ngaa?

[Kahon sa pahina 3]

Ang kaakig bahin sang aton balatyagon. Gani kon kaisa, mahimo nagakaigo nga ipabutyag ini sa kontrolado nga paagi. Ginabinagbinag sa sini nga artikulo ang kaakig nga makahalit sa aton balatyagon, lawas, kag kaangtanan sa Dios.