1 Juan 1:1-10
1 Nahanungod sa isa nga amo ang pulong sang kabuhi, nga kutob pa sa ginsuguran, nga amon nabatian, nga nakita sang amon mga mata, nga amon natan-aw sing maayo kag natandog sang amon mga kamot,
2 (huo, ang kabuhi napadayag, kag nakita namon kag ginapanaksi kag ginasugid sa inyo ang kabuhi nga walay katapusan nga naggikan sa Amay kag napadayag sa amon,)
3 ining amon nakita kag nabatian ginasugid man namon sa inyo, agod kamo man makig-ambit upod sa amon. Dugang pa, nagapakig-ambit kita upod sa Amay kag upod sa iya Anak nga si Jesucristo.
4 Gani ginasulat namon ining mga butang agod mangin bug-os ang aton kalipay.
5 Kag amo ini ang mensahe nga nabatian namon gikan sa iya kag ginapahibalo sa inyo, nga ang Dios kapawa kag wala gid sing kadudulman sa iya.
6 Kon magsiling kita: “Nagapakig-ambit kita upod sa iya,” apang padayon kita nga nagalakat sa kadudulman, nagabutig kita kag wala nagabuhat suno sa kamatuoran.
7 Apang, kon nagalakat kita sa kapawa subong nga sia mismo yara sa kapawa, nagapakig-ambit kita upod sa isa kag isa, kag ang dugo ni Jesus nga iya Anak nagatinlo sa aton gikan sa tanan nga sala.
8 Kon magsiling kita: “Wala kita sing sala,” ginapatalang naton ang aton kaugalingon kag ang kamatuoran wala sa aton.
9 Kon itu-ad naton ang aton mga sala, matutom sia kag matarong, gani patawaron niya kita sa aton mga sala kag tinluan kita gikan sa tanan nga pagkadimatarong.
10 Kon magsiling kita: “Wala kita makasala,” ginahimo naton sia nga butigon, kag ang iya pulong wala sa aton.
