PEBRERO 5, 2024
RUSSIA

“Itugyan kay Jehova ang Imo Dalanon”

I-PLAY

Sa indi madugay, ipahibalo sang Shadrinskiy District Court of the Kurgan Region ang desisyon sini sa kaso ni Brother Aleksandr Lubin. Wala pa sang ginsiling ang piskal kon ano nga sentensia ang gusto niya sa sini nga kaso.

Impormasyon Parte sa Iya

Aleksandr Lubin

Natawo: 1956 (Ogonek, Kurgan Region)

Biograpiya: Nag-obra sia bilang safety engineer sa isa ka energy company antes sia mag-retire

Napangasawa niya si Tatyana sang Agosto 2001. May duha sila ka bata

Una nga nagpa-Bible study si Tatyana sa mga Saksi ni Jehova. Sang na-stroke sia, ginbasahan sia ni Aleksandr sang Biblia kag nangin interesado si Aleksandr. Si Aleksandr, Tatyana, kag ang ila duha ka bata ginbawtismuhan sang 2003

May malala nga arthritis si Aleksandr sa iya balikawang, gani nagagamit sia sang sungkod para makalakat. Na-diagnose man sia nga may autoimmune disease

Ang Iya Ginsiling

Ano ang nakabulig sa imo nga mabatuan ang pagluya sang buot samtang ara ka sa pretrial detention center?

Mabudlay gid kon ara ka sa detention center. Wala gid ako ginhatagan sang bisan ano nga bulong para maghaganhagan ang kasakit sang akon arthritis. Una, nangamuyo ako kay Jehova kag nangabay nga buligan niya ako nga makagua dayon. Pero, sang ulihi, ginpangabay ko sia nga buligan niya ako nga mangin mapinasensiahon kag indi magkabalaka. Ginpangamuyo ko man sing madamo nga beses ang iban nga kauturan nga napriso. Ginpahanumdom ko ang akon kaugalingon, ‘Temporaryo lang ini.’ Dayon, nagpokus ako sa mga pagpakamaayo nga ginahatag ni Jehova sa akon. Bangod ginhimo ko ini nakapabilin ako nga malipayon. Sang ulihi, ginpagua gid man ako sa detention center. Napalig-on ako sang Salmo 37:5: “Itugyan kay Jehova ang imo dalanon; magsalig ka sa iya, kag buligan ka niya.” Kumbinsido ako nga wala ginatugutan ni Jehova nga tilawan kita sing sobra sa aton masarangan. Buligan gid niya kita pirme nga makabatas sa mabudlay nga sitwasyon basta nagasalig kita sing bug-os sa iya.

Sigurado kita, pareho kay Aleksandr, nga bisan pa grabe gid ang aton kabudlayan, makabatas kita kag makapabilin nga matutom kon magsalig kita sa suporta ni Jehova.—Isaias 38:14.

Time Line

Hulyo 13, 2021

Ginsugdan ang kaso
Hulyo 14, 2021

Gin-raid ang walo ka balay sang mga Saksi ni Jehova. Gin-aresto si Aleksandr, gin-interogar, kag ginbutang sia sa temporary detention facility
Hulyo 16, 2021

Ginsaylo sia sa pretrial detention center
Hulyo 19, 2021

Nag-apelar sia bangod sang iya malala nga kondisyon sa panglawas
Agosto 28, 2021

Pagkatapos sang pangabay halin sa European Court of Human Rights kag sang mga aktibista sang human rights, ginpagua si Aleksandr pero ginbutangan sing restriksion ang iya pagbiyahe
Hulyo 14, 2023

Ginsugdan ang hearing
Septiembre 7, 2023

Na-postpone ang hearing sang korte bangod naospital si Aleksandr

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE