Sining karon lang, ang tanan nga kongregasyon nga nagahambal sang Hebreo sa teritoryo sang branch sa Israel ginpahibalo nga ang kompleto nga Bag-ong Kalibutan nga Badbad sang Balaan nga Kasulatan sa moderno nga Hebreo puede na i-download sa digital nga mga pormat sugod sa Mayo 2, 2022. Ang naimprinta nga mga kopya mangin available sa Septiembre 2022.

Gintingob sini nga edisyon ang translation sang Hebreong Kasulatan nga gin-release sang 2020 kag ang gin-revise nga translation sang Cristianong Griegong Kasulatan. Amo ini ang una nga tion nga ang kompleto nga Bag-ong Kalibutan nga Badbad available na sa moderno nga Hebreo sa isa lang ka volume. Ang translation sang Hebreong Kasulatan sa moderno nga Hebreo magabulig sa mga bumalasa nga maintiendihan ang kahulugan sang dumaan nga teksto nga ginpasulat sang Dios, nga mabudlay na intiendihon sang mga bumalasa subong.

Ang isa ka miembro sang translation team nagsiling: “Ang mga translation sang Biblia sa moderno nga Hebreo, ilabi na ang Hebreong Kasulatan, indi pirme available sa aton mga bumalasa. Gani nalipay gid kami nga mabaton ang kompleto nga Bag-ong Kalibutan nga Badbad nga may madamo kag manami nga mga feature, ilabi na ang madamo nga marginal reference, nga makabulig gid para mas maintiendihan namon ang Biblia.”

“Ginapasalamatan namon si Jehova sa sini nga regalo,” siling sang isa pa ka miembro sang translation team. “Para sa mga Saksi ni Jehova kag sa tanan nga nagahambal sang Hebreo, makabulig gid ini para mangin mahapos nga magpalapit sa aton Amay sa langit.”—Santiago 4:8.