Payi Ohó Dọdai Jiwheyẹwhe Tọn Go
Payi Ohó Dọdai Jiwheyẹwhe Tọn Go
“Míwlẹ sọ tindo ohó dọdai tọn he diun hú enẹ ga; hlan ehe tọn mì wà dagbe bọ mì do payi e go.”—2 PITA 1:19.
1, 2. Apajlẹ mẹssia lalo tọn tẹwẹ hiẹ sọgan dọ?
NA OWHE kanweko susu lẹ, mẹssia lalonọ lẹ ko tẹnpọn nado dọ dọdai sọgodo tọn. To owhe kanweko atọ́ntọ W.M. mẹ, dawe de he ylọ ede dọ Mose duto Ju he tin to lopo Klete tọn ji lẹ ji dọ emi wẹ yin mẹssia lọ bo nasọ whlẹn yé sọn kọgbidinamẹ glọ. To azán heyin dide na tuntundote yetọn gbè, yé hodo e yì ofi yiaga de he pannukọn Ohù Méditerranée tọn. E dọ dọ yé dona lọ́n biọ ohù lọ mẹ poun wẹ podọ e nasọ má do awe to nukọn yetọn. Omẹ susugege he lọ́n biọ ohù lọ mẹ lẹ kútọ, podọ mẹssia lalonọ enẹ họnyi sọn nujijọ lọ tẹnmẹ.
2 To owhe kanweko 12tọ mẹ, “mẹssia” de sọawuhia to Yémen. Mẹjẹmẹtẹnmẹ Muhammad tọn, kavi ogán lọ, biọ ohia mẹssia-yinyin etọn tọn de sọn e dè. “Mẹssia” ehe biọ dọ mẹjẹmẹtẹnmẹ Muhammad tọn ni gbò ota emitọn. E dọ dọdai fọnsọnku niyaniya de tọn he na yinuwa taidi ohia lọ. Mẹjẹmẹtẹnmẹ Muhammad tọn yigbe na linlẹn lọ—podọ enẹ wẹ yin opodo “mẹssia” enẹ tọn.
3. Mẹnu wẹ yin Mẹssia nugbo lọ, podọ etẹwẹ lizọnyizọn etọn dohia?
3 Mẹssia lalonọ lẹ po dọdai yetọn lẹ po ko gboawupo mlẹnmlẹn, ṣigba ayipipa ohó dọdai Jiwheyẹwhe tọn go ma nọ hẹnmẹ jẹflumẹ pọ́n gbede gba. Mẹssia nugbo tọn lọ, yèdọ Jesu Klisti, wẹ yin hẹndi gbẹ̀te dọdai susu Biblu tọn lẹ tọn. Di dohia, to hoyidọ sọn dọdai Isaia tọn mẹ, Wẹndagbe kàntọ Matiu wlan dọmọ: “Aigba Zẹbuluni tọn, po aigba Naftali tọn po, to ohù lọ jlẹji, to Jọdani godo, Galili kosi lẹ tọn; mẹhe sinai to zinvlu mẹ ko mọ hinhọ́n daho; hlan yé he sinai to aigba po oyẹ̀ okú tọn po dali, wẹ hinhọ́n họ́n na. Sọn whenẹnu wẹ Jesu ko ṣẹ̀ yẹwhehodọ, dọmọ, Mì lẹnvọjọ: na ahọludu olọn tọn sẹpọ.” (Matiu 4:15-17; Isaia 9:1, 2) Jesu wẹ yin “hinhọ́n daho” enẹ, podọ lizọnyizọn etọn dohia dọ ewọ wẹ yin Yẹwhegán he Mose dọ dọdai etọn. Mẹhe gbẹ́ nado dotoai na Jesu lẹ na yin vivasudo.—Deutelonomi 18:18, 19; Owalọ lẹ 3:22, 23.
4. Nawẹ Jesu hẹn Isaia 53:12 di gbọn?
4 Jesu sọ hẹn hogbe dọdai Isaia 53:12 tọn lẹ di ga dọmọ: “E ko kọ̀n gbigbọ etọn jẹgbonu hlan okú: yè hia ẹ dogọ ylanwatọ lẹ: e sọ hẹn ylando mẹsusu tọn, bosọ to avùngbọ̀ basi na ylanwatọ lẹ.” Na yinyọnẹn dọ emi na ze ogbẹ̀ gbẹtọvi tọn emitọn liai taidi ofligọ de to madẹnmẹ, Jesu hẹn yise devi etọn lẹ tọn lodo. (Malku 10:45) E wà ehe to aliho ayidego tọn de mẹ gbọn wunmẹdidiọ lọ gblamẹ.
Wunmẹdidiọ lọ Nọ Jlọ Yise Dote
5. To hogbe towe titi lẹ mẹ, nawẹ hiẹ na basi zẹẹmẹ wunmẹdidiọ lọ tọn gbọn?
5 Wunmẹdidiọ lọ yin nujijọ dọdai tọn de. Jesu dọmọ: “Na Ovi gbẹtọ tọn na wá to gigo Otọ́ etọn tọn mẹ, po angẹli etọn lẹ po . . . Nugbo wẹ yẹn dọ hlan mì, mẹdelẹ tin to yé mẹhe nọte tofi lẹ mẹ, he ma na dọ́ okú pọ́n to alọ depope mẹ, kaka yé nado mọ Ovi gbẹtọ tọn ja to ahọludu etọn mẹ.” (Matiu 16:27, 28) Be delẹ to apọsteli lẹ mẹ mọ Jesu ja to Ahọluduta etọn mẹ na taun tọn wẹ ya? Matiu 17:1-7 dọmọ: “To azán ṣidopo godo, Jesu yí Pita, Jakobu po Johanu nọvisunnu etọn po gọna ẹn bo hẹn yé hẹji wá biọ osó de mẹ to olá. Agbasa etọn sọ diọun to yé nukọn.” Nujijọ ayidego tọn nankọtọn die! “Nukunmẹ etọn to sisẹ́ di owhè, avọ̀ etọn sọ lẹzun wéwé taidi hinhọ́n. Bo doayi e go, Mose po [Elija, NW] po sọawuhia yé, yé to hodọ hẹ ẹ.” Podọ, “aslọ sisẹ́ mlanmlan de ṣinyọ́n yé,” bọ yé sọ sè ogbè Jiwheyẹwhe lọsu titi tọn to didọmọ: “Ehe wẹ Ovi yiwanna ṣie, mẹhe mẹ yẹn yin homẹhunnọ te tlala; mì nọ sè etọn. Whenuena nuplọntọ etọn lẹ sè, yé flẹ jẹ nukunmẹ yetọn ji, bo yin avosatọ. Jesu sọ wá bo doalọ yé ji, bo dọmọ, Mì fọ́n, mì yin avosatọ blo.”
6. (a) Naegbọn Jesu ylọ wunmẹdidiọ lọ dọ numimọ de? (b) Numọdohlan nukọn etẹ tọn wẹ wunmẹdidiọ lọ yin?
6 Nujijọ budonamẹ tọn ehe wá aimẹ vlavo to dopo to ofi-yiaga Osó Helmoni tọn lẹ ji, to fie Jesu po apọsteli atọ̀n lọ lẹ po yí ozán lọ zan te. Kunnudenu dohia dọ wunmẹdidiọ lọ wá aimẹ to zánmẹ, bo hẹn ẹn họnwun taun. Dopo to whẹwhinwhẹ́n he wutu Jesu ylọ ẹ dọ numimọ de wẹ yindọ Mose po Elija po he ko kú sọn ojlẹ dindẹn die wayi matin to finẹ to paa mẹ gba. Klisti kẹdẹ wẹ tin to finẹ na taun tọn. (Matiu 17:8, 9) Awusọhia dabla mọnkọtọn do numọdohlan nukọn tintin tofi to huhlọn Ahọluduta tọn mẹ gigonọ Jesu tọn hia Pita, Jakobu, po Johanu po. Mose po Elija po nọtena whédutọgbẹ́ yiamisisadode Jesu tọn lẹ, podọ numimọ lọ gbọn huhlọn dali hẹn kunnudenu etọn gando Ahọluduta lọ po ahọlu-yinyin sọgodo tọn etọn po go lodo.
7. Nawẹ mí yọnẹn gbọn dọ Pita gbẹsọ flin wunmẹdidiọ lọ hezeheze?
7 Wunmẹdidiọ lọ gọalọ nado hẹn yise apọsteli atọ̀n he na yí azọngban nukọntọ tọn wà to agun Klistiani tọn mẹ lẹ tọn lodo. Nukunmẹ Klisti tọn he to sisẹ́, avọ̀ etọn he to sisẹ́ mlanmlan, po ogbè Jiwheyẹwhe lọsu titi tọn he to lilá dọ Jesu yin Visunnu yiwanna Etọn he yé dona setonuna po—ehe lẹpo hẹn lẹndai etọn di po kọdetọn dagbe po. Ṣigba apọsteli lọ lẹ ma dona dọ numimọ lọ na mẹdepope kakajẹ whenuena Jesu na yin finfọnsọnku. Owhe 32 delẹ to godo mẹ, wunmẹdidiọ ehe gbẹ́sọ họnwun to ayiha Pita tọn mẹ. To alọdindlẹndo e po nujọnu-yinyin etọn po mẹ, e wlan dọmọ: “Na míwlẹ ma to otàn vọnu he yè yí nuyọnẹn flinflin do doai hodo gba, whenuena mí to huhlọn po gigọwa Jesu Klisti Oklunọ mítọn tọn po hẹn zun yinyọnẹn hlan mì, ṣigba míwlẹ yí nukun mítọn titi do mọ gigo daho etọn. Na e yí yẹyi po gigo po sọn Jiwheyẹwhe Otọ́ dè, whenuena ogbè nẹ hunkọ wá e dè sọn gigo daho nẹ mẹ dọ, Ehe wẹ Ovi vivẹ ṣie, mẹhe mẹ homẹ ṣie hùn te tlala. Podọ ogbè he sọn olọn mẹ wá míwlẹ sè, whenuena mí tin po e po to osó wiwe lọ ji.”—2 Pita 1:16-18.
8. (a) Nulila Jiwheyẹwhe tọn gando Visunnu etọn go ze ayidonugo do etẹ ji? (b) Etẹwẹ aslọ he sọawuhia to wunmẹdidiọ lọ mẹ dohia?
8 Adà titengbe hugan lọ wẹ nulila Jiwheyẹwhe tọn dọmọ: “Ehe wẹ Ovi yiwanna ṣie, mẹhe mẹ yẹn yin homẹhunnọ te tlala; mì nọ sè etọn.” Hodidọ ehe ze ayidonugo do Jesu ji taidi Ahọlu zedo ofìn ji Jiwheyẹwhe tọn, mẹhe nudida lẹpo dona setonuna. Aslọ titli lọ dohia dọ hẹndi numimọ ehe tọn na yin mayinukundomọ. E na yin ayidego po nukun nukunnumọjẹnumẹ tọn po gbọn mẹhe yọ́n “ohia” tintin tofi mayinukundomọ Jesu tọn to huhlọn Ahọluduta tọn mẹ lẹ kẹdẹ dali. (Matiu 24:3) Na nugbo tọn, nugbẹnamẹ Jesu tọn ma nado dọ numimọ lọ na mẹdepope kakajẹ whenuena e na ko fọ́n sọn oṣiọ lẹ mẹ dohia dọ zizedaga po gigopanamẹ etọn po na wá to fọnsọnku etọn godo.
9. Naegbọn wunmẹdidiọ lọ dona hẹn yise mítọn lodo?
9 To alọdindlẹndo wunmẹdidiọ lọ godo, Pita dọmọ: “Míwlẹ sọ tindo ohó dọdai tọn he diun hú enẹ ga; hlan ehe tọn mì wà dagbe bọ mì do payi e go, di hlan miyọngban de he họ́n to ofi dózin de, kaka owùn do kẹ̀n, bọ sunwhlẹvu [okle, NW] tọn lọ do zẹ̀ to ayiha mìtọn lẹ mẹ: yinyọ́n ehe whẹ́, dọ dọdai Owe-wiwe tọn de ma yin tadena di ojlo [mẹdetiti] tọn de gba. Na dọdai ma gbọn ojlo gbẹtọ tọn dali wá to hohowhenu gba: ṣigba gbẹtọ lẹ dọho sọn Jiwheyẹwhe dè dile yè dọ̀n yé yì do gbọn [gbigbọ wiwe] dali.” (2 Pita 1:19-21) Wunmẹdidiọ lọ wleawuna jidide do ohó dọdai Jiwheyẹwhe tọn go. Mí dona payi ohó enẹ go e mayin “otàn vọnu he yè yí nuyọnẹn flinflin do doai” he ma tindo godonọnamẹ kavi alọkẹyi sọn olọn mẹ wá lẹ gba. Yise mítọn to ohó dọdai tọn mẹ dona yin hinhẹn lodo gbọn wunmẹdidiọ lọ dali na mimọ jẹnukọn Jesu tọn to gigo po huhlọn Ahọluduta tọn po mẹ ko mọ hẹndi yí wutu. Mọwẹ, mí tindo kunnudenu he ma sọgan yin gbigbẹdai dọ Klisti tin tofi to egbehe taidi Ahọlu huhlọnnọ olọn mẹ tọn de.
Lehe Sunwhlẹvu Okle Tọn lọ Zẹ̀ Gbọn
10. Mẹnu kavi etẹwẹ yin “sunwhlẹvu okle tọn” he go Pita donu, podọ naegbọn gblọndo towe do yinmọ?
10 Pita wlan dọmọ: “Mì wà dagbe bọ mì do payi [ohó dọdai tọn] go, di hlan miyọngban de he họ́n to ofi dózin de, kaka owùn do kẹ̀n, bọ sunwhlẹvu [okle, NW] tọn lọ do zẹ̀.” Mẹnu kavi etẹwẹ yin “sunwhlẹvu okle tọn”? Hogbe lọ “sunwhlẹvu okle tọn” sọawuhia whladopo gee to Biblu Traduction du monde nouveau [Glẹnsigbe] tọn mẹ, podọ e tindo zẹẹmẹ dopolọ po “sunwhlẹvu afọnnu” tọn po. Osọhia 22:16 ylọ Jesu Klisti dọ “sunwhlẹvu hinhọ́n afọnnu lọ tọn.” To osaa tangan owhe lọ tọn delẹ mẹ, sunwhlẹvu mọnkọtọn lẹ wẹ yin godo tọn lẹ he nọ zẹ̀ to whèzẹtẹn-waji. Yé nọ zẹ̀ tlolo whẹpo owhè do nọ sọawuhia, bọ yé nọ gbọnmọ dali lá bẹjẹeji azán yọyọ de tọn. Pita yí hogbe lọ “sunwhlẹvu okle tọn” zan nado dlẹnalọdo Jesu to whenuena E mọ huhlọn Ahọluduta tọn yí godo. To ojlẹ enẹ mẹ, Jesu zẹ̀ to wẹkẹ lọ pete mẹ, gọna aigba mítọn ji! Taidi Sunwhlẹvu Okle Mẹssia tọn lọ, e basi nulila bẹjẹeji azán yọyọ, kavi ojlẹ de tọn na gbẹtọvi tonusetọ lẹ.
11. (a) Naegbọn 2 Pita 1:19 ma zẹẹmẹdo dọ “sunwhlẹvu okle tọn” zẹ̀ to ahun paa gbẹtọvi lẹ tọn mẹ? (b) Nawẹ hiẹ na basi zẹẹmẹ 2 Pita 1:19 tọn gbọn?
11 Lẹdogbedevomẹ Biblu tọn susu hẹn linlẹn lọ gbayipe dọ hogbe apọsteli Pita tọn lẹ heyin kinkàndai to 2 Pita 1:19 mẹ dlẹnalọdo ahun paa gbẹtọ tọn. Ahun mẹhomẹ de tọn nọ tindo zínpinpẹn grammes 250 jẹ 300 tọn poun. Nawẹ Jesu Klisti—heyin nudida gbigbọnọ jọmaku gigonọ de to olọn mẹ todin—sọgan zẹ̀ to awutugonu gbẹtọ tọn pẹvi ehelẹ mẹ gbọn? (1 Timoti 6:16) Na nugbo tọn, whẹho ehe bẹ ahun yẹhiadonu tọn mítọn lẹ hẹn, na yé wẹ mí nọ yí do payi ohó dọdai Jiwheyẹwhe tọn go. Ṣigba yí sọwhiwhe do pọ́n 2 Pita 1:19 ganji, podọ hiẹ na mọdọ Traduction du monde nouveau yí ohia agbọji-yìyì tọn zan to hodidọ lọ “kaka owùn do kẹ̀n bọ sunwhlẹvu okle tọn do zẹ̀” godo sọn hodidọ he jẹnukọn to wefọ lọ mẹ go podọ sọn hogbe lọ “to ayiha mìtọn lẹ mẹ” go. Wefọ ehe sọgan yin hihia to aliho ehe mẹ dọ: ‘Míwlẹ tindo ohó dọdai tọn heyin hinhẹn diun; podọ mìwlẹ to dagbe wà gbọn pipayi e go taidi miyọngban he to sisẹ́ to ofi dózin de mẹ, enẹ wẹ yin, to ahun mìtọn lẹ mẹ, kaka owùn do kẹn bọ sunwhlẹvu okle tọn de do zẹ̀.’
12. Etẹwẹ yin ninọmẹ ahun gbẹtọvi lẹ tọn to paa mẹ, ṣigba etẹwẹ yin nugbo gando Klistiani nugbo lẹ go?
12 Etẹwẹ yin ninọmẹ ahun yẹhiadonu gbẹtọvi ylandonọ lẹ tọn tọn to paa mẹ? Etẹ, yèdọ ahun yetọn lẹ tin to zinvlu gbigbọmẹ tọn mẹ! Ṣigba, eyin mí yin Klistiani nugbo lẹ, e na taidi dọ mí tindo miyọngban he to sisẹ́ de to ahun mítọn, he dona ko dozinvlu lẹ mẹ. Dile e yin didohia gbọn hodidọ Pita tọn lẹ dali do, pipayi ohó dọdai hinhọ́n-tatọ́ Jiwheyẹwhe tọn go wẹ na hẹn Klistiani nugbo lẹ penugo nado tin to aṣeji podọ to nukundido mẹ na unkinklẹn azán yọyọ de tọn. Yé na yọ́n nugbo lọ dọ Sunwhlẹvu Okle tọn ko zẹ̀, e mayin to ahun agbasalan gbẹtọvi lẹ tọn mẹ gba, ṣigba to nudida lẹpo nukọn.
13. (a) Naegbọn mí sọgan deji dọ Sunwhlẹvu Okle tọn lọ ko zẹ̀? (b) Naegbọn Klistiani lẹ sọgan doakọnna ninọmẹ awusinyẹn tọn lẹ he Jesu dọ dọdai etọn na azán mítọn?
13 Sunwhlẹvu Okle tọn lọ ko zẹ̀ wayi! Mí sọgan tindo nujikudo enẹ tọn gbọn pipayi dọdai daho Jesu tọn gando tintin tofi etọn go dali. To egbehe, mí to hẹndi etọn tindo to nujijọ mọnkọtọn lẹ mẹ taidi awhàn he hunkọ ma ko wá aimẹ pọ́n lẹ, huvẹ, aigba sisọsisọ lẹ, po yẹwheho wẹndagbe lọ tọn didọ lẹdo aihọn pé po. (Matiu 24:3-14) Dile etlẹ yindọ ninọmẹ awusinyẹn tọn he Jesu dọ dọdai etọn lẹ nọ yinuwado mí ji taidi Klistiani lẹ, mí nọ penugo nado doakọnna to jijọho po ayajẹ ahun mẹ tọn po mẹ. Etẹwutu? Na mí to pipayi ohó dọdai Jiwheyẹwhe tọn go bosọ tindo yise to nuhe e dopagbe etọn na sọgodo lẹ mẹ wutu. Mí yọnẹn dọ mí tin to bẹbẹnu ojlẹ dagbe hugan lẹ tọn na mí ko yinukọn tlala biọ “ojlẹ opodo lọ tọn” mẹ! (Daniẹli 12:4) Aihọn lọ tin to ninọmẹ ayimajai todido matindo tọn heyin dọdai etọn dọ to Isaia 60:2 mẹ dọmọ: “Doayi e go, zinvlu [na] ṣinyọ́n aigba ji, zinvlu gọ́ngọ́n ṣinyọ́n gbẹtọ lẹ.” Nawẹ mẹde sọgan dín aliho etọn mọ gbọn to zinvlu ehe mẹ? Omẹ lọ dona gbọn whiwhẹ dali payi ohó dọdai Jiwheyẹwhe tọn go todin, whẹpo e nido dẹn hugan. Omẹ ahundoponọ lẹ dona lẹhlan Jehovah Jiwheyẹwhe, heyin Asisa ogbẹ̀ po hinhọ́n tọn po dè. (Psalm 36:9; Owalọ lẹ 17:28) Gbọn ehe kẹdẹ wiwà dali wẹ mẹdepope sọgan tindo nukunnumọjẹnumẹ nugbo tọn po todido nado duvivi sọgodo jiawu he Jiwheyẹwhe ko lẹndai na gbẹtọvi tonusetọ lẹ po.—Osọhia 21:1-5.
“Hinhọ́n Wá Aihọn Mẹ”
14. Etẹwẹ mí dona wà nado tindo numimọ hẹndi dọdai jiawu Biblu tọn lẹ tọn?
14 Owe-wiwe lẹ hẹn ẹn họnwun dọ Jesu Klisti ko to gandu todin taidi Ahọlu de. Na ogán-zinpo ji hihẹ etọn to 1914 wutu, dọdai jiawu lẹ na gbẹsọ yin hinhẹndi. Nado tindo numimọ hẹndi yetọn tọn, mí dona do mídelẹ hia nado yin homẹmimiọnnọ he yí yise zan to Jesu Klisti mẹ lẹ, bo lẹnvọjọ sọn azọ́n ylando tọn lẹ po oylan heyin wiwà to wunvimẹ lẹ po mẹ. Na nugbo tọn, mẹhe yiwanna zinvlu lẹ ma na mọ ogbẹ̀ madopodo yí gba. Jesu dọmọ: “Ehe wẹ owhẹ̀, dọ hinhọ́n wá aihọn mẹ, bọ gbẹtọ yiwanna zinvlu hú hinhọ́n, na oylan wẹ azọ́n yetọn lẹ wutu. Na mẹdepope he wà danú wẹ nọ gbẹwanna hinhọ́n, e ma sọ nọ wá hinhọ́n nu, yè nikaa wọhẹ azọ́n etọn lẹ. Ṣigba mẹhe wà nugbo wẹ nọ wá hinhọ́n nu, na yè nido do azọ́n etọn lẹ hia, dọ yè basi yé to Jiwheyẹwhe mẹ.”—Johanu 3:19-21.
15. Etẹwẹ na jọ eyin mí gbẹkọ whlẹngán he Jiwheyẹwhe ko hẹn yọnbasi gbọn Visunnu etọn gblamẹ go?
15 Hinhọ́n gbigbọmẹ tọn ko wá aihọn mẹ gbọn Jesu gblamẹ, podọ todidoai na ewọ yin onú titengbe. Paulu wlan dọmọ: “Jiwheyẹwhe, mẹhe sọn ojlẹ hoho mẹ, podọ to jijọ hunkọhunkọ mẹ ko gbọn yẹwhegán lẹ mẹ dọho hlan otọ́ lẹ to whenẹnu, to opodo azán helẹ tọn ko dọho hlan mí to Ovi etọn mẹ, mẹhe e do dè whédutọ onú popo tọn.” (Heblu lẹ 1:1, 2) Etẹwẹ na jọ eyin mí gbẹkọ whlẹngán he Jiwheyẹwhe ko hẹn yọnbasi gbọn Visunnu etọn gblamẹ go? Paulu zindonukọn nado dọmọ: “Na eyin ohó he yè gbọn angẹli lẹ mẹ dọ nọte, bọ osẹ́nmẹjẹ podọ tolivivẹ dopodopo sọ to alè ahọsu he jẹ tọn yí; nawẹ míwlẹ na họ̀ngán do, eyin mí gbẹkọ whlẹngán daho di ehe hunkọ go, he yè to didọ sọn whẹwhẹwhenu gbọn Oklunọ mẹ, bọ yè sọ to didọ hlan mí sọn yé he ko sè to onù etọn mẹ lẹ dè; Jiwheyẹwhe ga sọ to ohia, azọ́n dabla, huhlọn alọpalọpa lẹ, po nunina [gbigbọ wiwe] tọn po yí do to kunnudena yé, kẹdẹdi ojlo etọn.” (Heblu lẹ 2:2-4) Mọwẹ, Jesu wẹ yin ahọ́nkan lọ na lilá ohó dọdai lọ tọn.—Osọhia 19:10.
16. Naegbọn mí sọgan tindo yise gigọ́ to dọdai Jehovah Jiwheyẹwhe tọn lẹpo mẹ?
16 Dile e yin ayidego do, Pita dọmọ: “Dọdai Owe-wiwe tọn de ma yin tadena di ojlo [mẹdetiti] tọn de gba.” Gbẹtọvi lẹ kẹdẹ ma sọgan fọ́n dọdai nugbo de dote gba, ṣigba mí sọgan tindo jidide gigọ́ to dọdai Jiwheyẹwhe tọn lẹpo mẹ. Jehovah Jiwheyẹwhe lọsu dè wẹ ehelẹ wá sọn. E ko gbọn gbigbọ wiwe gblamẹ hẹn devizọnwatọ etọn lẹ nado mọnukunnujẹ lehe dọdai Biblu tọn lẹ to yinyin hinhẹndi do mẹ. Na nugbo tọn, mí dona gọna pẹdido hlan Jehovah dọ mí ko mọ hẹndi susu dọdai mọnkọtọn lẹ tọn sọn owhe 1914 tọn mẹ gbọ́n. Podọ mí deji mlẹnmlẹn dọ dọdai he pò dogbọn vivọnu titonu ylankan ehe tọn dali lẹpo na yin hinhẹndi. E yin nujọnu dọ mí ni to pipayi dọdai he wá sọn olọn mẹ lẹ go dile mí to didike na hinhọ́n mítọn ni to sisẹ́. (Matiu 5:16) Lehe mí gọna pẹdido do sọ dọ Jehovah to ‘hinhọ́n tá na mí to zinvlu gọ́ngọ́n’ he ṣinyọ́n aigba lọ ji to egbehe mẹ!—Isaia 58:10.
17. Naegbọn mí tindo nuhudo hinhọ́n gbigbọmẹ tọn he nọ wá sọn Jiwheyẹwhe dè?
17 Hinhọ́n paa nọ hẹn mí penugo nado mọ̀nú. E sọ nọ hẹn whinwhẹ́n jinukun he nọ na mí núdùdù wunmẹ voovo lẹ tọn yọnbasi. Mí ma sọgan nọgbẹ̀ matin hinhọ́n paa tọn gba. Etẹwẹ dogbọn hinhọ́n gbigbọmẹ tọn dali? E nọ na anademẹ mí bosọ nọ do sọgodo heyin dọdai etọn dọ to Ohó Jiwheyẹwhe tọn, yèdọ Biblu mẹ hia mí. (Psalm 119:105) Jehovah Jiwheyẹwhe gbọn owanyi dali ‘do hinhọ́n etọn po nugbo etọn po hlan gbonu.’ (Psalm 43:3) Na jide tọn mí dona do pinpẹn-nutọn-yinyọnẹn sisosiso hia na awuwledainanu mọnkọtọn lẹ. Enẹwutu mì gbọ mí ni wà nuhe go mí pé lẹpo nado yí hinhọ́n “oyọnẹn gigo Jiwheyẹwhe tọn” na e nido sọgan tá hinhọ́n do ahun yẹhiadonu tọn mítọn mẹ.—2 Kọlintinu lẹ 4:6; Efesunu lẹ 1:18.
18. Etẹwẹ Sunwhlẹvu Okle tọn Jehovah tọn ko wleawufo todin nado wà?
18 Lehe míwlẹ yin didona do sọ nado yọnẹn dọ to 1914, Jesu Klisti, heyin Sunwhlẹvu Okle tọn, zẹ̀ to wẹkẹ lọ blebu mẹ bo jẹ numimọ wunmẹdidiọ tọn lọ hẹndi ji! Sunwhlẹvu Okle tọn Jehovah tọn ko tin tofi todin, bo ko wleawufo nado hẹn lẹndai Jiwheyẹwhe tọn di yinukọn dogọ to wunmẹdidiọ lọ mẹ—yèdọ “awhàn azán daho Jiwheyẹwhe Ganhunupo tọn.” (Osọhia 16:14, 16) To whenuena titonu hoho ehe na ko yin ziza sẹ̀, Jehovah na hẹn opagbe etọn di heyin “olọn yọyọ lẹ po aigba yọyọ de po” to ehe mẹ mí sọgan pà ewọ te kakadoi taidi Oklunọ Nupojipetọ wẹkẹ tọn po Jiwheyẹwhe dọdai nugbo tọn po. (2 Pita 3:13) Kakajẹ azán daho enẹ whenu, mì gbọ mí ni to zọnlinzin zọnmii to hinhọ́n sọn olọn mẹ wá mẹ gbọn pipayi ohó dọdai Jiwheyẹwhe tọn tọn go dali.
Nawẹ Hiẹ Na Gblọn Gbọn?
• Nawẹ hiẹ na basi zẹẹmẹ wunmẹdidiọ Jesu tọn gbọn?
• Nawẹ wunmẹdidiọ lọ nọ jlọ yise dote gbọn?
• Mẹnu kavi etẹwẹ yin Sunwhlẹvu Okle tọn Jehovah tọn, podọ whetẹnu wẹ e zẹ̀?
• Naegbọn mí dona payi ohó dọdai Jiwheyẹwhe tọn go?
[Kanbiọ Oplọn Tọn Lẹ]
[Yẹdide to weda 13]
Be hiẹ sọgan basi zẹẹmẹ nujọnu-yinyin wunmẹdidiọ lọ tọn ya?
[Yẹdide to weda 15]
Sunwhlẹvu Okle tọn lọ ko zẹ̀. Be hiẹ yọ́n lehe po whenuena e zẹ̀ po ya?