Isaia 53:1-12
53 Mẹnu wẹ tindo yise to nuhe yin sisè sọn mí dè* mẹ?+
Podọ na nuhe dù awà Jehovah tọn,+ mẹnu wẹ e ko yin didehia?+
2 Ewọ na tọ́nkun di alà de+ to nukọn etọn,* taidi adọ̀ sọn aigba-klo mẹ.
Ewọ ma tindo teninọ gigonọ de kavi whanpẹ daho depope;+Podọ whenue mí mọ ẹn, awusọhia etọn ma dọ̀n mí dogo.*
3 E yin vivlẹko bọ gbẹtọ lẹ dapana ẹn,+Dawe de wẹ e yin he dona jiya* bosọ jẹakọ hẹ awutu.
E taidi dọ nukunmẹ etọn yin whiwhla do mí wẹ nkọ.*
E yin vivlẹko bọ mí gbẹ́ ẹ dai.+
4 Na nugbo tọn, ewọ lọsu wẹ bẹ awutu mítọn lẹ yì,+Bosọ bẹ awufiẹsa mítọn lẹ hẹn.+
Amọ́, mí pọ́n ẹn hlan di mẹhe Jiwheyẹwhe yí azọ̀nylankan do hò bo linú bosọ sayana.
5 Ṣigba, yè sọnú in+ na sẹ́nhẹngba mítọn wutu;+Yè gídí i na nuṣiwa mítọn lẹ wutu.+
E yin yasana, na mí nido tindo jijọho,+Podọ awugble etọn lẹ wutu wẹ míwlẹ do yin azọ̀nhẹngbọna.+
6 Taidi lẹngbọ lẹ, mímẹpo wẹ ko danbú,+Mẹdopodopo ko lẹkọ do aliho etọn titi ji,Podọ Jehovah ko bẹ nuṣiwa mímẹpo tọn do ewọ ji.+
7 Ewọ yin kọgbidina+ bosọ jo ede do nado yin yasana,+Ṣigba, e ma kẹnù.
Ewọ yin hinhẹnwa hùhùtẹn taidi lẹngbọ de,+Kẹdẹdi lẹngbọ asi de he to whii to fúnpatọ etọn lẹ nukọn,E masọ kẹnù.+
8 Ewọ yin zize sọyi, na kọgbidinamẹ po whẹdida mawadodo po wutu;Podọ mẹnu wẹ na tlẹ na ayidonugo zẹẹmẹ gigọ́ whẹndo* etọn tọn?
Na ewọ yin sinsánsẹ sọn aigba mẹhe togbẹ̀ lẹ tọn ji;+Yè linú in,* na sẹ́nhẹngba omẹ ṣie lẹ tọn wutu.+
9 Ṣiọditẹn de sọ yin nina ẹn* to pọmẹ hẹ mẹylankan lẹ,+Podọ to pọmẹ hẹ adọkunnọ lẹ* to whenue e kú,+Mahopọnna dọ e ma wà nuylankan* depope,Bọ oklọ depope ma tin to onù etọn mẹ.+
10 Ṣigba, ojlo Jehovah tọn wẹ* dọ ewọ ni jiya, e sọ dike bọ ewọ jẹazọ̀n.
Eyin hiẹ ze ogbẹ̀* etọn jo taidi avọ́nunina whẹhuhu tọn,+Ewọ na mọ kúnkan* etọn bo nasọ nọgbẹ̀ dẹn,+Podọ gbọn ewọ gblamẹ wẹ nuhe nọ hẹn homẹhun* Jehovah na tindo kọdetọn dagbe.+
11 Ewọ na mọ bo na tindo pekọ, na awufiẹsa etọn* wutu.
Gbọn oyọnẹn etọn dali, dodonọ lọ, yèdọ devizọnwatọ ṣie,+Na hẹn mẹsusu nado tindo teninọ dodo tọn,+Ewọ nasọ hẹn nuṣiwa yetọn lẹ.+
12 Na whẹwhinwhẹ́n enẹ wutu, yẹn na yí mimá de na ẹn to mẹsusu ṣẹnṣẹn,Ewọ nasọ má ogblànnu hẹ huhlọnnọ lẹ,Na e ko ze ogbẹ̀* etọn jo, yèdọ kakajẹ okú+Bo ko yin hihia dogọ sẹ́nhẹngbatọ lẹ;+Ewọ hẹn ylando mẹsusu tọn,+Bo vẹvẹ do ota sẹ́nhẹngbatọ lẹ tọn mẹ.+
Nudọnamẹ Odò Tọn
^ Kavi vlavo, “nuhe mí sè lẹ.”
^ “Etọn” sọgan dlẹnalọdo ayidonugotọ de to paa mẹ kavi Jiwheyẹwhe.
^ Kavi “e ma tindo awusọhia vonọtaun de bọ mí nado tindo ojlo to ewọ mẹ.”
^ Kavi “he mọnukunnujẹ yajiji mẹ.”
^ Kavi vlavo, “E taidi mẹde he ji gbẹtọ lẹ nọ lilẹ́ nukunmẹ yetọn sọn.”
^ Kavi “linú in hù.”
^ Kavi “aliho gbẹzan.”
^ Kavi “Mẹde nasọ na ṣiọditẹn etọn.”
^ To paa mẹ, “dawe adọkunnọ de.”
^ Kavi “danú.”
^ Kavi “alindọn.”
^ Kavi “nuhe yin ojlo; nuhe yin homẹvivi.”
^ Kavi “okún.”
^ Kavi “homẹhunnu de wẹ na Jehovah.”
^ Kavi “tukla alindọn etọn tọn.”
^ Kavi “alindọn.”