REIREI 19
Kristian ni Koaua Ana Tia Kakoaua Iehova?
Ngkai Ana Tia Kakoaua Iehova ngaira, ti kakoauaa ae boni ngaira raoi Kristian ni koaua. Bukin tera? Iangoi baika boto iai ara koaua, te ara ae ti okoro iai, ao te tangira ae ti kaotiotia i marenara.
1. A kabotoa i aon tera aia koaua Ana Tia Kakoaua Iehova?
E taku Iesu: “Bon te koaua [ana taeka te Atua].” (Ioane 17:17) N aron Iesu, a aki toki naba Ana Tia Kakoaua Iehova ni kabotoi aia koaua i aon Ana Taeka te Atua. N te katoto, nora aroni karaoan aei iroura man te moantai. N raatokin te ka-19 n tienture, a moana neneran raoi te Baibara te kurubu ae kaainaki irouia Taan Reirei n te Baibara. A kabotoi aia koaua i aoni baike e taekin te Baibara, e ngae naba ngkana a kaokoro aia koaua ma aia reirei Aaro nako. Imwina, a a manga tibwai koaua man te Baibara akanne nakoia aomata. a
2. E aera ngkai ti aranira bwa Ana Tia Kakoaua Iehova?
E arania Iehova taan taromauria bwa ana tia kakoaua, kioina ngkai a tataekina te koaua ibukina. (Ebera 11:4–12:1) N te katoto, n taai ake rimoa ao e kangai te Atua nakoia ana aomata: “Bon au tia kakoaua ngkami.” (Wareka Itaia 43:10.) E aranaki Iesu bwa “te tia Kakoaua ae Kakaonimaki.” (Te Kaotioti 1:5) Ngaia are n 1931, ti a kabongana te ara ae Ana Tia Kakoaua Iehova. Ti boni kakatonga ngkai ti uouota te ara anne.
3. A kangaa Ana Tia Kakoaua Iehova ni kakairi n ana tangira Iesu?
E rangi n tangiriia taan rimwina Iesu n aron ae kaanga bon ana utu. (Wareka Mareko 3:35.) N aron anne, a katiteuanaaki naba Ana Tia Kakoaua Iehova, bwa te utu ae katobibia te aonnaba. Anne bukina ae ti atongira i marenara bwa taari ngaira. (Biremon 1, 2) Ti ongeaba naba n te tua ae kangai: “Tangiriia tarimi nako i nanon te onimaki.” (1 Betero 2:17) A kaotiota te tangira aei Ana Tia Kakoaua Iehova n aanga aika bati, n aroia ni buokiia tariia n te onimaki ni katobibia te aonnaba n taai ake a kainnanoa iai te ibuobuoki.
REIAKINA AE BATI RIKI
Nenera raoi rongorongoia ma rimoa Ana Tia Kakoaua Iehova, ao nori bwaai ni kakoaua riki aika kaotia bwa boni Kristian ni koaua ngaira.
A kabotoi aia koaua i aon te Baibara Kristian ni koaua ao a tibwaia nakoia aomata
4. Ti kabotoi ara koaua i aon te Baibara
E a kaman taekinna Iehova ae e na ririkirake otara i aon te Baibara. Wareka Taniera 12:4 ao te kabwarabwara mai nano, ao maroroakina te titiraki aei:
-
Tera ae “e na rangi ni bati” irouia ana aomata te Atua ngkai a teimatoa n nenera te Baibara?
Iangoa aron te kurubu ae kaainaki irouia taan reirei n te Baibara n reiakina ana Taeka te Atua n ikotaki naba ma Charles Russell. Kaota te TAAMNEI, ao maroroakina te titiraki aei.
-
N aron ae oti n te taamnei, a kangaa n reiakina te Baibara Charles Russell ma raona ake Taan Reirei n te Baibara?
Ko ataia?
N tabetai, ao ti a manga kaetii ara koaua tabeua. Bukin tera? N aron otin taai ae e kaotaa te aonnaba teutana imwin teutana, e anganira naba te atatai te Atua n ana Taeka teutana imwin teutana. (Wareka Taeka N Rabakau 4:18.) Ngaia are e ngae ngke e aki bibitaki kanoan te Baibara, ma ti kaetii ara koaua ngkai e a ririkirake riki ara atatai n te Baibara
5. Ti maiuakina ae boraoi ma arara
E aera ngke ti kabongana te ara ae Ana Tia Kakoaua Iehova? Kaota te TAAMNEI, ao maroroakina te titiraki aei.
-
E aera ngkai e tonu raoi te ara ae Ana Tia Kakoaua Iehova?
E aera Iehova ngkai e rineiia aomata bwa ana tia kakoaua? Ibukina bwa a na boni kaotia ae ngaia te Atua ae koaua, kioina ngkai a bati keewe aika taekinaki ibukina. Iangoi keewe aika uoua aikai.
Tabeua Aaro, a reireinia aia aomata ae e tangiriia te Atua bwa a na kabonganai katotongani bwaai n aia taromauri. Ma wareka Nakoaia Ibonga 26:1, ao maroroakin titiraki aikai:
-
Tera te koaua? Tera ana namakin Iehova ibukini bouannanti?
Tabeman mataniwin Aaro, a angareirei bwa Iesu bon te Atua. Ma wareka Ioane 20:17, ao maroroakin titiraki aikai:
-
Tera te koaua? Tii temanna n aomata te Atua ao Iesu?
-
Tera am namakin n ataakin ae Iehova e kanakoia ana tia Kakoaua, bwa a na uarongorongoa te koaua ibukina ao Natina?
6. Ti itangitangiri i marenara
E kabotauia Kristian te Baibara ma bwain nako te rabwata. Wareka 1 I-Korinto 12:25, 26, ao maroroakin titiraki aikai:
-
Tera ae a riai ni karaoia Kristian ni koaua ngkana a karawawataaki Kristian ake tabeman?
-
Tera aron te tangira ae ko a tia n noria irouia Ana Tia Kakoaua Iehova?
Ngkana a karawawataaki Ana Tia Kakoaua Iehova n iteran te aonnaba are teuana, a waekoa n ibuobuoki taani Kakoaua ni katobibia te aonnaba. Nora te katoto teuana, kaota te TAAMNEI. Ao maroroakina te titiraki aei.
-
E kangaa aia mwakuri n ibuobuoki Ana Tia Kakoaua Iehova ni kaotaki iai te tangira?
A kaotiota te tangira Kristian ni koaua nakoia naake a kainnanoa te ibuobuoki
A TAKU TABEMAN: “E boou te Aro ae Ana Tia Kakoaua Iehova.”
-
Man ningai are e atongia iai Iehova taan taromauria bwa ana tia kakoaua?
KAKIMOTOTOANA
Boni Kristian ni koaua Ana Tia Kakoaua Iehova. Bon te utu ngaira ae katobibia te aonnaba aika taan taromauria te Atua, ao ti kabotoi ara koaua i aon te Baibara, ao ti kaotiota te koaua ibukin Iehova.
Kauring
-
E aera ngke ti kabongana te ara ae Ana Tia Kakoaua Iehova?
-
Tera arora i marenara?
-
N am iango, boni Kristian ni koaua Ana Tia Kakoaua Iehova?
NORI NABA AIKAI
Nora te katoto ibukin aroia Ana Tia Kakoaua Iehova ni kaotaraei reirei aika kewe.
Karekei kaekaan am titiraki ibukia Ana Tia Kakoaua Iehova.
“Titiraki Aika Tatabekaki Ibukia Ana Tia Kakoaua Iehova” (te kaongora n jw.org)
E rangi n riribaiia Stephen aomata aika a kaokoro aia reeti ma ngaia, ao e kakaaitaraia. Nora te baere e noria irouia Ana Tia Kakoaua Iehova are e a kairia bwa e na bitaki.
“E a Rikirake ni Buakaka Riki Maiu” (Te Taua-n-Tantani, Turai 1, 2015)
a E teimatoa ara maekatin ae kakawaki riki ae Te Taua-n-Tantani, ni boreeti koaua man te Baibara, ni moa man 1879.
Ko Bae Naba n Tangira
TITIRAKI AIKA TATABEKAKI
Tera te Reirei n te Baibara?
Karekei kaekaan titiraki ni kaineti ma kairan te reirei n te Baibara iroura.
