Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Yehowa Odasefoi

Ga

Ani Yehowa Odasefoi Nyɛɔ Mɛi Anɔ Koni Amɛtsake Amɛjamɔ?

Ani Yehowa Odasefoi Nyɛɔ Mɛi Anɔ Koni Amɛtsake Amɛjamɔ?

Dabi, wɔfeee nakai. Wɔfee lɛ faŋŋ yɛ wɔ-magazin titri ni ji, Buu-Mɔɔ lɛ mli akɛ: Ejaaa gbɛ akɛ abaanyɛ mɛi anɔ koni amɛtsake amɛjamɔ.” * Yiŋtoi ni nyiɛ sɛɛ nɛɛ ahewɔ wɔnyɛɛɛ mɛi anɔ lɛ:

  • Yesu enyɛɛɛ mɛi anɔ koni amɛkpɛlɛ etsɔɔmɔi lɛ anɔ kɔkɔɔkɔ. Ele akɛ mɛi fioo pɛ baakpɛlɛ eshɛɛ saji lɛ anɔ. (Mateo 7:13, 14) Be ni ekaselɔi lɛ ateŋ mɛi komɛi anane tɔ̃tɔ̃ yɛ ewiemɔi lɛ ahewɔ lɛ, eŋmɛ gbɛ ni amɛtee moŋ fe ní eeenyɛ amɛ nɔ koni amɛkɛ lɛ ahi shi.Yohane 6:60-62, 66-68.

  • Yesu tsɔɔ esɛɛnyiɛlɔi ni amɛkanyɛ mɛi anɔ koni amɛtsake amɛhemɔkɛyeli. Yɛ nɔ najiaŋ ni amɛbaanyɛ mɛi anɔ ni amɛkpɛlɛ Maŋtsɛyeli sane kpakpa lɛ nɔ lɛ, ewo kaselɔi lɛ hewalɛ ni amɛtao toibolɔi ni sa.Mateo 10:7, 11-14.

  • Akɛni Yehowa kpɛlɛɔ jamɔ ni jɛ tsui muu fɛɛ mli lɛ nɔ hewɔ lɛ, nilee bɛ mli akɛ abaanyɛ mɔ ko nɔ ni akɛ lɛ agba sane.5 Mose 6:4, 5; Mateo 22:37, 38.

Ani wɔnitsumɔ lɛ ji nɔnyɛɛ nɔ?

Eji anɔkwale akɛ wɔshiɛɔ Biblia mli sane lɛ kɛyaa “shikpɔŋ lɛ nɔ hei ni yɔɔ shɔŋŋshɔŋŋ lɛ,” ni wɔfeɔ enɛ yɛ shĩa fɛɛ shĩa taakɛ afã wɔ yɛ Biblia lɛ mli lɛ. (Bɔfoi 1:8; 10:42; 20:20) Ni bei komɛi lɛ, afolɔɔ wɔnaa akɛ wɔnyɛɔ mɛi anɔ koni amɛtsake amɛjamɔ tamɔ bɔ ni afolɔ mra beiaŋ Kristofoi lɛ anaa lɛ. (Bɔfoi 18:12, 13) Kɛ̃lɛ, enɛ ji naafolɔmɔ kɛkɛ. Wɔ kɛ wɔjamɔ lɛ fĩii mɛi anɔ. Moŋ lɛ, wɔheɔ wɔyeɔ akɛ esa akɛ aŋmɛ gbɛ koni mɛi akase nii, koni amɛdamɔ nɔ ni amɛkase lɛ nɔ amɛkpɛ amɛyiŋ.

Wɔnyɛɛɛ mɛi anɔ koni amɛtsake amɛjamɔ, ni wɔkɛ jamɔ ehaaa wɔhiɛ kɛtaooo maŋkwramɔ hegbɛi, agbɛnɛ hu, wɔhãaa mɛi nibii ni wɔkɛ kɔne amɛyiŋ koni amɛbafata wɔhe, ni wɔfeee nibii hu kɛkɔneee mɛi ayiŋ. Enɛ yɛ srɔto kwraa yɛ mɛi ni tsɛɔ amɛhe Kristofoi shi amɛkɛ amɛnifeemɔi gbeɔ Kristo he guɔ lɛ anɔ lɛ he. *

Ani mɔ ko yɛ hegbɛ akɛ etsakeɔ ejamɔ?

Gbalɔ Abraham shi jamɔ ni ewekumɛi yɔɔ mli

Hɛɛ, Biblia lɛ tsɔɔ akɛ mɛi yɛ hegbɛ akɛ amɛtsakeɔ amɛjamɔ. Amaniɛbɔi ni yɔɔ mli lɛ ekomɛi tsɔɔ mɛi komɛi ni shi jamɔ ni amɛwekumɛi yɔɔ mli lɛ, ni amɛ diɛŋtsɛ amɛhala akɛ amɛbaasɔmɔ anɔkwa Nyɔŋmɔ lɛ. Abraham, Rut, mɛi komɛi ni hi Ateene lɛ, kɛ bɔfo Paulo fee enɛ he nɔkwɛmɔnɔ. (Yoshua 24:2; Rut 1:14- 16; Bɔfoi 17:22, 30 34; Galatiabii 1:14, 23) Kɛfata he lɛ, Biblia lɛ eteee shi ewooo mɛi po ni kpɛɔ yiŋ ni nilee bɛ mli ni amɛshiɔ jamɔ ni Nyɔŋmɔ kpɛlɛɔ nɔ lɛ.1 Yohane 2:19.

Jeŋmaji Ekomefeemɔ Kuu lɛ yɛ mla ni fiɔ sɛɛ akɛ aŋkroaŋkroi yɛ hegbɛ akɛ amɛtsakeɔ amɛjamɔ. Nakai mla lɛ kɛɔ akɛ, mɔ fɛɛ mɔ yɛ “hegbɛ akɛ etsakeɔ ejamɔ loo ehemɔkɛyeli,” etao nilee, ni kɛ́ enine shɛ nɔ lɛ, etsɔɔ mɛi krokomɛi,” ní jamɔ he nilee hu fata lɛ. * Kɛ̃lɛ, hegbɛ nɛɛ kɛ sɔ̃ bafɔɔ mɔ fɛɛ mɔ nɔ akɛ, ebu hegbɛ ni mɔ ko yɔɔ akɛ ebaahiɛ ehemɔkɛyeli mli loo ebaakpoo susumɔi ni ekɛ kpãaa gbee lɛ.

Kɛ́ mɔ ko tsake jamɔ lɛ, ani no tsɔɔ akɛ ebuuu weku lɛ kusumii?

Esaaa akɛ ebaa lɛ nakai. Biblia lɛ woɔ wɔhewalɛ akɛ, wɔwo gbɔmɛi fɛɛ, ekɔɔɔ he eko jamɔ mli ni amɛyɔɔ. (1 Petro 2:17) Kɛfata he lɛ, Yehowa Odasefoi boɔ Biblia lɛ famɔ akɛ, amɛkɛ woo ahã amɛfɔlɔi lɛ atoi kɛji amɛkɛ amɛ ehiɛɛɛ hemɔkɛyeli kome po.Efesobii 6:2, 3.

Fɛɛ sɛɛ lɛ, jeee mɔ fɛɛ mɔ kpɛlɛɔ nɔ ni Biblia lɛ kɛɔ lɛ nɔ. Nyɛmiyoo ko ni jɛ Zambia lɛ wie akɛ: “Yɛ he ni mijɛ lɛ, kɛ́ mɔ ko tsake ejamɔ lɛ, abuɔ lɛ akɛ ekwa eweku lɛ ni eyeee weku lɛ anɔkwa.” Nyɛmiyoo nɛɛ wie nakai yɛ shihilɛ ni lɛ diɛŋtsɛ ekɛ kpe be ni ekɛ Yehowa Odasefoi bɔi Biblia lɛ kasemɔ ni ekpɛ mli akɛ ebaatsake ejamɔ lɛ. Ekɛfata he akɛ: “Mifɔlɔi kɛ mi wie shii abɔ akɛ, minifeemɔ lɛ egba amɛnaa waa, ni mihã amɛnine enyɛ shi. Ebafee shihilɛ ko ni wa waa kɛhã mi, ejaakɛ mibuɔ mifɔlɔi waa. . . . Miisumɔ ni maye Yehowa anɔkwa moŋ fe ni mafi jamɔŋ kusumii asɛɛ, ni no etsɔɔɔ akɛ miikwa miweku lɛ.” *

^ kk. 8 Akɛ nɔkwɛmɔnɔ lɛ, yɛ afi 785 Ŋ.B. lɛ, Charlemagne wo akpɔ akɛ, agbe mɔ fɛɛ mɔ ni yɔɔ Saxony ni ekpɛlɛɛɛ ni abaptisiɔ lɛ akɛ Kristofonyo lɛ. Augsburg Toiŋjɔlɛ Kpaŋmɔ ni maji ni kɛ amɛhe miitswa yɛ Roma Maŋtsɛyeli Krɔŋkrɔŋ lɛ mli lɛ fee yɛ afi 1555 Ŋ.B. lɛ fee lɛ faŋŋ akɛ, esa akɛ maŋ fɛɛ maŋ nɔ lumɔ kɛ ehe adɔmɔ Roma Katolik jamɔ loo Luther jamɔ, ni esa akɛ maŋbii lɛ ateŋ mɔ fɛɛ mɔ afĩ enɔyelɔ lɛ jamɔ sɛɛ. Kɛ́ ofĩii onɔyelɔ jamɔ sɛɛ lɛ, mla ŋmɛɔ gbɛ akɛ ahã oshi maŋ lɛ mli.

^ kk. 11 Hegbɛi nɛɛ ekomɛi hu yɛ African Charter on Human and Peoples’ Rights, American Declaration of the Rights and Duties of Man, 2004 Arab Charter on Human Rights, the ASEAN (Association of Southeast Asian Nations) Human Rights Declaration, European Convention on Human Rights, kɛ International Covenant on Civil and Political Rights. Kɛ̃lɛ, maji ni kpɛlɛɔ nɛkɛ mla naa hegbɛi nɛɛ anɔ lɛ ehiɛɛɛ susumɔ kome yɛ mlai nɛɛ kɛnitsumɔ mli.

^ kk. 14 Biblia lɛ tsɔɔ akɛ Yehowa ji anɔkwa Nyɔŋmɔ lɛ gbɛ́i.

Ekrokromɛi Hu Nɛ

SAJI NI MƐI FƆƆ BIMƆ

Ani Yehowa Odasefoi Fiteɔ Wekui Aloo Amɛtswaa Wekui Amɛmaa Shi?

Bei komɛi lɛ, afolɔɔ Yehowa Odasefoi anaa akɛ amɛfiteɔ wekui. Shi ani eji anɔkwale akɛ Odasefoi fiteɔ wekui

SANEKPAKPA NI JƐ NYƆŊMƆ ŊƆƆ!

Mɛni Ji Sanekpakpa ni Kɔɔ Jamɔ He?

Ani be ko baashɛ ni mɛi fɛɛ bafee ekome kɛja anɔkwa Nyɔŋmɔ koome lɛ?