Rut 1:1-22

  • Elimelek kɛ eweku lɛ fã kɛtee Moab (1, 2)

  • Naomi, kɛ Orpa, kɛ Rut tsɔmɔ yei okulafoi (3-6)

  • Rut shiii Naomi kɛ e-Nyɔŋmɔ lɛ (7-17)

  • Naomi kɛ Rut ku amɛsɛɛ kɛtee Betlehem (18-22)

1  Agbɛnɛ, eba mli akɛ, yɛ bei ni kojolɔi+ lɛ yeɔ nɔ* lɛ amli lɛ, hɔmɔ ko ba shikpɔŋ lɛ nɔ; ni nuu ko jɛ Betlehem+ yɛ Yuda ni etee eyato gbɔ yɛ Moab kpokpaa*+ lɛ nɔ, ekɛ eŋa kɛ ebihii enyɔ.  Atsɛɔ nuu lɛ Elimelek,* ni atsɛɔ eŋa lɛ Naomi,* ni ebihii enyɔ lɛ hu agbɛ́ii ji Malon* kɛ Kilion.* Efratbii ji amɛ, ni amɛjɛ Betlehem yɛ Yuda. Ni amɛba Moab kpokpaa lɛ nɔ amɛbahi jɛmɛ.  Be ko sɛɛ lɛ, Elimelek, Naomi wu lɛ gbo, ni eshwɛ lɛ kɛ ebihii enyɔ lɛ.  Sɛɛ mli lɛ, hii lɛ kɛ Moab yei bote gbalashihilɛ mli; atsɛɔ yei lɛ ateŋ mɔ kome Orpa, ni atsɛɔ mɔ kroko lɛ hu Rut.+ Amɛhi jɛmɛ aaafee afii nyɔŋma.  Kɛkɛ ni ebihii enyɔ lɛ, Malon kɛ Kilion hu gboi, ni ebashwɛ yoo lɛ kome too yɛ ebihii enyɔ lɛ kɛ ewu lɛ sɛɛ.  No hewɔ lɛ, ekɛ eshaayeimɛi enyɔ lɛ yiŋ, ni amɛku amɛsɛɛ kɛjɛ Moab kpokpaa lɛ nɔ, ejaakɛ enu akɛ Yehowa ebadro emaŋbii lɛ* ni ehã amɛ niyenii.*  Ekɛ eshaayeimɛi enyɔ lɛ shi he ni amɛyɔɔ lɛ. Ni be ni amɛyi gbɛ akɛ amɛmiiku amɛsɛɛ kɛmiiya Yuda shikpɔŋ lɛ nɔ lɛ,  Naomi kɛɛ eshaayeimɛi enyɔ lɛ fɛɛ akɛ: “Nyɛyaa, nyɛteŋ mɔ fɛɛ mɔ aku esɛɛ kɛya emami shĩa. Yehowa ajie suɔmɔ ni tsakeee kpo atsɔɔ nyɛ,+ tamɔ bɔ ni nyɛjie kpo nyɛtsɔɔ hii ni egboi lɛ kɛ mi lɛ.  Yehowa adro nyɛteŋ mɔ fɛɛ mɔ* ni ená he ko ehi shweshweeshwe* yɛ ewu shĩa.”+ Kɛkɛ ni eshɔ amɛnaa, ni amɛfó waa. 10  Nɔ ni nɔŋŋ ni amɛkɛɔ lɛ ji: “Dabi, wɔkɛ bo baaya omaŋbii lɛ aŋɔɔ.” 11  Shi Naomi kɛɛ akɛ: “Mibiyei, nyɛkua nyɛsɛɛ. Mɛni hewɔ nyɛkɛ mi baaya? Manyɛ mafɔ bihii ni baanyɛ abatsɔmɔ nyɛwumɛi lo?+ 12  Mibiyei, nyɛkua nyɛsɛɛ. Nyɛyaa, ejaakɛ migbɔ tsɔ bɔ ni manyɛ mabote gbalashihilɛ mli. Kɛ́ miyɛ hiɛnɔkamɔ akɛ manyɛ maná wu nyɔɔŋ nɛɛ mli po, ni manyɛ mafɔ bihii hu lɛ, 13  ani nyɛbaamɛ amɛ kɛyashi amɛbaadara? Ani nyɛboteŋ gbalashihilɛ mli ekoŋŋ yɛ amɛhewɔ? Dabi, mibiyei, nyɛsane miidɔ mi waa, ejaakɛ Yehowa kɛ mi eye kɛ joomɔ.”*+ 14  Amɛfó waa ekoŋŋ, no sɛɛ lɛ, Orpa shɔ eshaayoo lɛ naa ni eshi. Shi Rut kpɛtɛ Naomi. 15  No hewɔ lɛ, Naomi kɛɛ lɛ akɛ: “Naa! Okurafã, ni ji okulafo lɛ eku esɛɛ kɛmiiya emaŋbii kɛ enyɔŋmɔi lɛ aŋɔɔ. Okɛ okurafã lɛ aku sɛɛ kɛya.” 16  Shi Rut kɛɛ akɛ: “Kaanyɛ minɔ doo akɛ mishi bo, ni miku misɛɛ ni mikpa osɛɛnyiɛmɔ; ejaakɛ he ni obaaya lɛ, jɛmɛ maya, he ni obaawɔ lɛ, jɛmɛ mawɔ. Omaŋbii baatsɔmɔ mimaŋbii, ni o-Nyɔŋmɔ lɛ, mi-Nyɔŋmɔ.+ 17  He ni ooogbo yɛ lɛ, jɛmɛ magbo yɛ, ni jɛmɛ abaafu mi yɛ. Yehowa kɛ mi aye, ni ekɛ mi aye ekoŋŋ kɛjeee gbele kɛkɛ ni baagbala mi kɛ bo teŋ.” 18  Be ni Naomi na akɛ Rut eŋmɔ eyiŋ kpɔ akɛ ekɛ lɛ baaya lɛ, ekpa eyiŋ kɔnemɔ. 19  Ni amɛyi enyɔ lɛ fɛɛ tsa amɛnyiɛmɔ lɛ nɔ kɛyashi amɛshɛ Betlehem.+ Be ni amɛshɛ Betlehem nɔŋŋ lɛ, maŋ lɛ mli fɛɛ fee hoo yɛ amɛhewɔ, ni yei lɛ kɛɛkɛɛ akɛ: “Naomi kɛ̃ nɛ?” 20  Shi ekɛɛ yei lɛ akɛ: “Nyɛkatsɛa mi Naomi.* Nyɛtsɛa mi Mara,* ejaakɛ Ofe lɛ kɛ mi eye kɛ joomɔ.+ 21  Mitee obɔ, shi Yehowa ehã miku misɛɛ kɛ midɛ̃ folo. Mɛni hewɔ esa akɛ nyɛtsɛ mi Naomi, be ni Yehowa ji mɔ ni ete shi ewo mi, ni Ofe lɛ ji mɔ ni kɛ amanehulu eba minɔ lɛ?”+ 22  Bɔ ni fee ni Naomi kɛ eshaayoo Rut, Moab yoo lɛ ku amɛsɛɛ kɛjɛ Moab kpokpaa+ lɛ nɔ kɛba nɛ. Amɛbashɛ Betlehem yɛ be ni ajeɔ barle* kpamɔ+ shishi lɛ mli.

Shishigbɛ Niŋmaa

Hebri sht. ŋm., “kojolɔi lɛ kojoɔ.”
Loo “ŋa.”
Eshishi ji, “Mi-Nyɔŋmɔ Lɛ, Maŋtsɛ Ni.”
Eshishi ji, “Mimiishɛɛ.”
Eeenyɛ efee akɛ aná gbɛ́i lɛ kɛjɛ Hebri wiemɔ ko ni shishi ji “fee gbedee; hela mɔ lɛ” lɛ mli.
Eshishi ji, “Mɔ Ni Yeee Omanye; Mɔ Ni Baa Naagbee.”
Loo “Yehowa egbala ejwɛŋmɔ kɛba emaŋ lɛ nɔ.”
Hebri sht. ŋm., “blodo.”
Loo “Yehowa ake nyɛteŋ mɔ fɛɛ mɔ nii.”
Hebri sht. ŋm., “ená hejɔɔmɔhe.”
Loo “Yehowa nine ete shi ewo mi.”
Eshishi ji, “Mimiishɛɛ.”
Eshishi ji, “Joomɔ.”
Eji wiiti henɔ ko.