Yoshua 24:1-33

  • Yoshua wie Israel yinɔsane he (1-13)

  • Awo amɛ hewalɛ ní amɛsɔmɔ Yehowa (14-24)

    • “Mi kɛ mishĩabii lɛ, wɔbaasɔmɔ Yehowa” (15)

  • Kpaŋmɔ ni Yoshua kɛ Israel kpaŋ (25-28)

  • Yoshua gbele kɛ efuu (29-31)

  • Afu Yosef wui yɛ Shekem (32)

  • Eleazar gbele kɛ efuu (33)

24  Ni Yoshua bua Israel wekui lɛ fɛɛ anaa yɛ Shekem, ni etsɛ Israel onukpai lɛ kɛ amɛwekunukpai lɛ kɛ amɛkojolɔi lɛ kɛ amɛnɔkwɛlɔi lɛ kɛba,+ ni amɛbadamɔ anɔkwa Nyɔŋmɔ lɛ hiɛ.  Yoshua kɛɛ maŋbii lɛ fɛɛ akɛ: “Nɔ ni Yehowa, Israel Nyɔŋmɔ lɛ, kɛɛ nɛ, ‘Blema lɛ, Faa* lɛ sɛɛ nyɛtsɛmɛi+ lɛ hi+—Tera, ni ji Abraham kɛ Nahor papa lɛ—ni no mli lɛ, amɛsɔmɔɔ nyɔŋmɔi krokomɛi.+  “‘Sɛɛ mli lɛ, miŋɔ nyɛtsɛ Abraham+ kɛjɛ Faa* lɛ sɛɛ ni mihã eyakpa Kanaan shikpɔŋ lɛ fɛɛ nɔ, ni mihã eseshibii lɛ fa babaoo.+ Midro lɛ Isak;+  ni Isak lɛ, midro lɛ Yakob kɛ Esau.+ Sɛɛ mli lɛ, mikɛ Seir Gɔŋ lɛ hã Esau akɛ enɔ;+ ni Yakob kɛ ebii* lɛ kpeleke shi kɛtee Ejipt.+  Sɛɛ mli lɛ, mitsu Mose kɛ Aaron,+ ni mihao Ejipt kɛ nibii ni mifee yɛ amɛteŋ lɛ,+ ni no sɛɛ lɛ, mijie nyɛ kɛje kpo.  Be ni mijie nyɛtsɛmɛi lɛ kɛje Ejipt+ ni nyɛbashɛ ŋshɔ lɛ naa lɛ, Ejiptbii lɛ kɛ ta shwiilii kɛ okpɔŋɔnɔtaralɔi tiu nyɛtsɛmɛi lɛ kɛtee Ŋshɔ Tsuru lɛ naa tɔ̃ɔ.+  Ni amɛbolɔ amɛtsɛ Yehowa,+ no hewɔ lɛ, ekɛ duŋ fo nyɛ kɛ Ejiptbii lɛ ateŋ, ni ehã ŋshɔ lɛ ba ni ebaha amɛnɔ,+ ni nyɛ diɛŋtsɛ nyɛhiŋmɛii na nɔ ni mifee yɛ Ejipt lɛ.+ Ni nyɛhi ŋa lɛ nɔ afii pii.*+  “‘Ni mikɛ nyɛ ba Amorbii ni yɔɔ Yordan lɛ sɛɛ* lɛ ashikpɔŋ lɛ nɔ, ni amɛkɛ nyɛ wu.+ Shi mikɛ amɛ wo nyɛdɛŋ bɔ ni afee ni nyɛŋɔ amɛshikpɔŋ lɛ, ni mikpãtã amɛhiɛ yɛ nyɛhiɛ.+  Kɛkɛ ni Zipor binuu Balak, ni ji Moab maŋtsɛ lɛ, te shi ni ekɛ Israel bawu. Ni etsu ayatsɛ Beor binuu Bileam kɛba koni ebalomɔ nyɛ.+ 10  Shi mibooo Bileam toi.+ No hewɔ lɛ, ejɔɔ nyɛ shii abɔ,+ ni mijie nyɛ yɛ edɛŋ.+ 11  “‘Ni nyɛfo Yordan+ lɛ ni nyɛba Yeriko.+ Ni Yeriko hiɛnyiɛlɔi* lɛ kɛ Amorbii lɛ kɛ Perizbii lɛ kɛ Kanaanbii lɛ kɛ Hitbii lɛ kɛ Girgashbii lɛ kɛ Hivbii lɛ kɛ Yebusbii lɛ kɛ nyɛ wu, shi mikɛ amɛ wo nyɛdɛŋ.+ 12  No hewɔ lɛ, mihã amɛhao* dani nyɛyashɛ jɛmɛ, ni no wo amɛ foi kɛje nyɛhiɛ+—Amorbii lɛ amaŋtsɛmɛi enyɔ lɛ. Jeee nyɛklante naa, ni jeee nyɛgãi naa hu nyɛfee enɛ.+ 13  No hewɔ lɛ, mikɛ shikpɔŋ ni nyɛgboko he deŋme ko kɛ maji ni jeee nyɛ nyɛto lɛ hã nyɛ,+ ni nyɛhi mli. Nyɛmiiye wain ŋmɔji kɛ oliv ŋmɔji ni jeee nyɛ nyɛfee lɛ amli nii.’+ 14  “No hewɔ lɛ, nyɛshea Yehowa gbeyei ni nyɛkɛ tsui krɔŋŋ asɔmɔa lɛ,* ni nyɛyea lɛ anɔkwa,*+ ni nyɛjiea nyɔŋmɔi ni nyɛtsɛmɛi lɛ sɔmɔ yɛ Faa* lɛ sɛɛ kɛ Ejipt lɛ kɛjea nyɛteŋ,+ ni nyɛsɔmɔa Yehowa. 15  Agbɛnɛ, kɛji esaaa nyɛhiɛ akɛ nyɛbaasɔmɔ Yehowa lɛ, no lɛ, ŋmɛnɛ gbi nɛɛ, nyɛhalaa mɔ ni nyɛbaasɔmɔ,+ kɛji nyɔŋmɔi ni nyɛtsɛmɛi lɛ sɔmɔ yɛ Faa* lɛ sɛɛ lɛ jio,+ Amorbii ni nyɛyɔɔ amɛshikpɔŋ lɛ nɔ lɛ anyɔŋmɔi lɛ jio.+ Shi mi kɛ mishĩabii lɛ, wɔbaasɔmɔ Yehowa.” 16  Kɛkɛ ni maŋbii lɛ hã hetoo akɛ: “Ekaba lɛ nakai kɔkɔɔkɔ akɛ wɔbaakwa Yehowa ní wɔyasɔmɔ nyɔŋmɔi krokomɛi. 17  Yehowa, wɔ-Nyɔŋmɔ lɛ, ji mɔ ni jie wɔ kɛ wɔtsɛmɛi lɛ kɛje* Ejipt shikpɔŋ lɛ nɔ,+ kɛje nyɔŋyeli shĩa lɛ,+ ni lɛ ji mɔ ni fee okadii wuji nɛɛ yɛ wɔhiɛ,+ ni lɛ ji mɔ ni tee nɔ ebu wɔhe yɛ gbɛi fɛɛ ni wɔtsɔ nɔ lɛ anɔ, kɛ maji fɛɛ ni wɔtsɔmɔ amɛteŋ kɛho lɛ ahe.+ 18  Yehowa shwie maji lɛ fɛɛ, ni Amorbii ni hi shikpɔŋ lɛ nɔ dani wɔba lɛ hu fata he. No hewɔ lɛ, wɔ hu wɔbaasɔmɔ Yehowa, ejaakɛ lɛ ji wɔ-Nyɔŋmɔ.” 19  Ni Yoshua kɛɛ maŋbii lɛ akɛ: “Nyɛnyɛŋ Yehowa nyɛsɔmɔ, ejaakɛ Nyɔŋmɔ ni yɔɔ krɔŋkrɔŋ ji lɛ;+ Nyɔŋmɔ ni biɔ ni ajá ekome too pɛ ji lɛ.+ Ekɛ nyɛtɔmɔi* kɛ nyɛhe eshai lɛ ekeŋ nyɛ.+ 20  Kɛ́ nyɛkwa Yehowa ni nyɛyasɔmɔ maŋsɛɛ nyɔŋmɔi lɛ, no lɛ, lɛ hu ebaatsɔ ehiɛ ewo nyɛ ni ebaakpãtã nyɛhiɛ kwraa, be ni efee nyɛ ekpakpa lɛ sɛɛ.”+ 21  Shi maŋbii lɛ kɛɛ Yoshua akɛ: “Dabi, Yehowa nɔŋŋ wɔbaasɔmɔ!”+ 22  No hewɔ lɛ, Yoshua kɛɛ maŋbii lɛ akɛ: “Nyɛji odasefoi nyɛshi nyɛ diɛŋtsɛ nyɛhe akɛ, nyɛ diɛŋtsɛ nyɛjɛ nyɛsuɔmɔ mli nyɛhala akɛ nyɛbaasɔmɔ Yehowa.”+ Kɛkɛ ni amɛkɛɛ: “Odasefoi ji wɔ.” 23  “No hewɔ lɛ, nyɛjiea maŋsɛɛ nyɔŋmɔi ni yɔɔ nyɛteŋ lɛ kɛjea nyɛteŋ, ní nyɛkɛ nyɛtsuii ahãa Yehowa, Israel Nyɔŋmɔ lɛ.” 24  Maŋbii lɛ kɛɛ Yoshua akɛ: “Wɔbaasɔmɔ Yehowa, wɔ-Nyɔŋmɔ lɛ, ni wɔbaabo egbee toi!” 25  No hewɔ lɛ, Yoshua kɛ maŋbii lɛ kpaŋ yɛ nakai gbi lɛ nɔ, ni ewo amɛ kitã* kɛ mla yɛ Shekem. 26  Ni Yoshua ŋma wiemɔi nɛɛ yɛ Nyɔŋmɔ Mla wolo+ lɛ mli, ni ewó tɛ wulu+ ko ni ekɛma tso agbo ni yɔɔ Yehowa jamɔhe lɛ masɛi lɛ shishi. 27  Yoshua tee nɔ ekɛɛ maŋbii lɛ fɛɛ akɛ: “Naa! Tɛ nɛɛ baatsɔ odasefonyo ni baaye odase eshi wɔ,+ ejaakɛ enu nɔ fɛɛ nɔ ni Yehowa kɛɛ wɔ lɛ, ni ebaaye odase eshi nyɛ, koni nyɛkakwa nyɛ-Nyɔŋmɔ lɛ.” 28  Kɛkɛ ni Yoshua wo maŋbii lɛ gbɛ, mɔ fɛɛ mɔ tee egboshinii nɔ.+ 29  Nibii nɛɛ asɛɛ lɛ, Nun binuu Yoshua, ni ji Yehowa tsulɔ lɛ, gbo be ni eye afii 110.+ 30  No hewɔ lɛ, amɛfu lɛ yɛ shikpɔŋ ni ji egboshinii lɛ nɔ, yɛ Timnat-sera+ ni yɔɔ Efraim gɔji lɛ anɔ, yɛ Gaash Gɔŋ lɛ kooyigbɛ lɛ. 31  Israelbii lɛ tee nɔ amɛsɔmɔ Yehowa gbii abɔ fɛɛ ni Yoshua yɔɔ wala mli, kɛ gbii abɔ fɛɛ ni onukpai ni hi shi yɛ Yoshua gbele sɛɛ ní le nibii fɛɛ ni Yehowa efee ehã Israel lɛ yɔɔ wala mli lɛ.+ 32  Yosef wui+ ni Israelbii lɛ kɛjɛ* Ejipt kɛba lɛ, afu yɛ Shekem, yɛ shikpɔŋ ni Yakob kɛ kapɛji 100+ hé yɛ Shekem tsɛ Hamor bihii lɛ adɛŋ lɛ nɔ;+ ni etsɔ Yosefbii* lɛ agboshinii.+ 33  Ni Eleazar, Aaron binuu lɛ hu gbo.+ No hewɔ lɛ, amɛfu lɛ yɛ ebinuu Finehas+ Gɔŋkpɔ ni akɛhã lɛ yɛ Efraim gɔji lɛ anɔ lɛ nɔ.

Shishigbɛ Niŋmaa

Ni ji, Yufrate Faa lɛ.
Ni ji, Yufrate Faa lɛ.
Hebri sht. ŋm., “ebihii.”
Hebri sht. ŋm., “gbii pii.”
Ni ji, Yordan lɛ bokãgbɛ.
Shishitsɔɔmɔi komɛi kɛɔ akɛ, “shikpɔjiatsɛmɛi.”
Shishitsɔɔmɔi komɛi kɛɔ akɛ, “mihã amɛtsui fã; mihã ŋmiŋmi mɔmɔ amɛ.”
Loo “ni nyɛsɔmɔa lɛ yɛ gbɛ ni shwamɔ ko bɛ he nɔ.”
Loo “ni nyɛsɔmɔa lɛ yɛ anɔkwale mli.”
Ni ji, Yufrate Faa lɛ.
Ni ji, Yufrate Faa lɛ.
Loo “jie wɔ kɛ wɔtsɛmɛi lɛ ni ekɛ wɔ kwɔ kɛshi.”
Loo “nyɛtuatsemɔi; nyɛmlatɔmɔi.”
Loo “ehã amɛ taomɔ nii.”
Loo “kɛkwɔ kɛjɛ.”
Hebri sht. ŋm., “Yosef bihii.”