Wolo Ni Akɛmaje Galatiabii Lɛ 1:1-24

  • Ŋamɔ (1-5)

  • Sane kpakpa kroko bɛ (6-9)

  • Sane kpakpa ni Paulo shiɛ lɛ jɛ Nyɔŋmɔ ŋɔɔ (10-12)

  • Bɔ ni fee ni Paulo tsake kɛ enitsumɔ lɛ shishijee (13-24)

1  Mi Paulo, ni ji bɔfo, ni jeee gbɔmɛi hala mi, ni jeee gbɔmɔ ko nɔ atsɔ ahala mi, shi moŋ Yesu Kristo+ kɛ Nyɔŋmɔ, ni ji Tsɛ lɛ,+ mɔ ni tee lɛ shi kɛjɛ gbohii ateŋ lɛ ji mɛi ni hala mi lɛ,  mi kɛ nyɛmimɛi fɛɛ ni kɛ mi yɔɔ lɛ, kɛ wolo nɛɛ miimaje Galatia asafoi lɛ:  Dromɔ kɛ toiŋjɔlɛ ni jɛ Nyɔŋmɔ, wɔ-Tsɛ lɛ, kɛ Nuŋtsɔ Yesu Kristo dɛŋ lɛ ahã nyɛ.  Ekɛ lɛ diɛŋtsɛ ehe hã yɛ wɔhe eshai+ lɛ ahewɔ koni ejie wɔ kɛjɛ jeŋ fɔŋ*+ ni yɔɔ amrɔ nɛɛ mli yɛ wɔ-Nyɔŋmɔ kɛ wɔ-Tsɛ lɛ suɔmɔ naa,+  Nyɔŋmɔ ji mɔ ni akɛ anunyam ahã kɛya naanɔi anaanɔ. Amen.  Eefee mi naakpɛɛ akɛ shwiaa nɛɛ nɔŋŋ lɛ nyɛmiitsi nyɛhe* kɛmiije mɔ ni tsɔ Kristo dromɔ lɛ nɔ etsɛ nyɛ lɛ he kɛmiiya sane kpakpa kroko he.+  Jeee akɛ sane kpakpa kroko yɛ; moŋ lɛ, mɛi komɛi yɛ ni miihao nyɛ+ ni amɛmiitao ni amɛtsake Kristo lɛ he sane kpakpa lɛ hiɛ.  Shi kɛji wɔ po, loo bɔfo ko ni jɛ ŋwɛi po, bajaje sane kpakpa ko etsɔɔ nyɛ ni esoro no yɛ sane kpakpa ni wɔjaje wɔtsɔɔ nyɛ lɛ he lɛ, etsɔ mɔ ni alomɔ.  Bɔ ni wɔkɛɛ kɛtsɔ hiɛ lɛ, agbɛnɛ miikɛɛ ekoŋŋ akɛ, Mɔ fɛɛ mɔ ni jajeɔ sane kpakpa ko etsɔɔ nyɛ ni esoro no yɛ nɔ ni nyɛmɔ mli lɛ he lɛ, etsɔ mɔ ni alomɔ. 10  Anɔkwa, amrɔ nɛɛ, gbɔmɛi ayiŋ mitaoɔ akɛ makɔne aloo Nyɔŋmɔ yiŋ? Aloo miitao masa gbɔmɛi ahiɛ? Kɛ́ mikã he miisa gbɔmɛi ahiɛ lɛ, belɛ jeee Kristo nyɔŋ ji mi. 11  Ejaakɛ, nyɛmimɛi, miitao ni nyɛle akɛ, sane kpakpa ni mijaje mitsɔɔ nyɛ lɛ, ejɛɛɛ gbɔmɛi aŋɔɔ;+ 12  ejaakɛ jeee gbɔmɔ ko dɛŋ miná kɛjɛ, ni jeee tsɔɔmɔ hu atsɔɔ mi, shi moŋ Yesu Kristo tsɔ kpojiemɔ ko nɔ ejie etsɔɔ mi. 13  Eji anɔkwale akɛ, nyɛnu mitsutsu jeŋba yɛ Yudafoi ajamɔ lɛ mli lɛ he,+ akɛ mitee nɔ miwa Nyɔŋmɔ asafo lɛ yi waa* ni mikpãtã asafo lɛ hiɛ;+ 14  ni no mli lɛ miiya mihiɛ waa yɛ Yudafoi ajamɔ lɛ mli fe mitipɛŋfoi babaoo yɛ mimaŋbii lɛ ateŋ, ejaakɛ mihiɛ dɔ naakpa yɛ mitsɛmɛi lɛ akusumii lɛ ahe.+ 15  Shi be ni Nyɔŋmɔ, mɔ ni jie mi kɛjɛ minyɛ musuŋ ni etsɔ edromɔ lɛ nɔ etsɛ mi lɛ,+ susu akɛ ehi jogbaŋŋ akɛ 16  etsɔ minɔ ejie e-Bi lɛ kpo etsɔɔ, koni mijaje ehe sane kpakpa lɛ mitsɔɔ jeŋmaji lɛ,+ mikɛ adesa ko* eyasusuuu he amrɔ nɔŋŋ; 17  ni mikwɔɔɔ kɛyaaa Yerusalem hu kɛyaaa mɛi ni ji bɔfoi dani mi hu mitsɔ bɔfo lɛ aŋɔɔ, shi moŋ mitee Arabia, ni miku misɛɛ kɛba Damasko+ ekoŋŋ. 18  Kɛkɛ ni no sɛɛ afii etɛ lɛ, mikwɔ kɛtee Yerusalem+ koni miyasara Kefa,*+ ni mihi eŋɔɔ gbii 15. 19  Shi minaaa bɔfoi krokomɛi lɛ ateŋ mɔ ko, akɛ ja Yakobo,+ Nuŋtsɔ lɛ nyɛmi nuu lɛ kɛkɛ. 20  Agbɛnɛ, nɔ ni kɔɔ nibii ni miŋmaa nyɛ nɛɛ ahe lɛ, miima nɔ mi miihã nyɛ yɛ Nyɔŋmɔ hiɛ akɛ mimaleee. 21  No sɛɛ lɛ, mitee Siria kɛ Kilikia+ kpokpai lɛ anɔ. 22  No mli lɛ, mi diɛŋtsɛ lɛ, asafoi ni yɔɔ Yudea ni kɛ Kristo efee ekome lɛ enako mi dã. 23  Amɛnuɔ kɛkɛ akɛ: “Mɔ ni tsutsu ko lɛ ewaa wɔ yi lɛ,+ amrɔ nɛɛ eejaje hemɔkɛyeli ni tsutsu ko lɛ ekpãtã hiɛ lɛ he sane kpakpa lɛ eetsɔɔ.”+ 24  No hewɔ lɛ, amɛwo Nyɔŋmɔ hiɛ nyam yɛ mihewɔ.

Shishigbɛ Niŋmaa

Loo “yinɔ fɔŋ; shihilɛ gbɛjianɔtoo fɔŋ.” Kwɛmɔ Wiemɔi Titrii Amligbalamɔ lɛ.
Loo “shwiaa nɛɛ nɔŋŋ lɛ aajie nyɛ.”
Greek sht. ŋm., “mitee nɔ miwa Nyɔŋmɔ asafo lɛ yi kɛteke nɔ.”
Greek sht. ŋm., “heloo kɛ lá ko.”
Atsɛɔ lɛ Petro hu.