‘Miyelikɛbuamɔ Jɛɔ Yehowa Ŋɔɔ’

Mɛi Babaoo Kpɛlɛ Yehowa Jamɔ Nɔ

BIBLIA gbalɛi ni kɔɔ wɔgbii nɛɛ ahe lɛ tsɔɔ akɛ, gbɔmɛi ni jɛ jeŋmaji fɛɛ mli baake yuu kɛba Yehowa jamɔ ni awo nɔ gojoo lɛ mli. Ákɛ nɔkwɛmɔnɔ lɛ, Yehowa Nyɔŋmɔ tsɔ gbalɔ Hagai nɔ egba akɛ: “Ni mahoso jeŋmaji fɛɛ kwa, ni jeŋmaji lɛ fɛɛ anii ni jara wa lɛ aaaba, ni mikɛ anunyam sɔŋŋ aaawo shia nɛɛ obɔ̃.” (Hagai 2:7) Gbalɔ Yesaia kɛ gbalɔ Mika fɛɛ gba yɛ wɔgbii nɛɛ ni ji “naagbee gbii lɛ” ahe akɛ jeŋmaji kɛ gbɔmɛi srɔtoi baajá Yehowa yɛ gbɛ ni ekpɛlɛɔ nɔ lɛ nɔ.—Yesaia 2:2-4; Mika 4:1-4.

Ani gbalɛi nɛɛ miiná amɛmli baa diɛŋtsɛ ŋmɛnɛ? Nyɛhaa gbalɛi ni eba mli anɔkwale lɛ diɛŋtsɛ ayea enɛ he odase. Yɛ nyɛsɛɛ afii nyɔŋma ni ho lɛ pɛ mli lɛ, mɛi hee ni fa fe 3,110,000 jɔɔ amɛhe nɔ amɛha Yehowa yɛ shikpɔji ni fa fe 230 anɔ. Yɛ anɔkwale mli lɛ, abaptisi Yehowa Odasefoi ni sɔmɔɔ yɛ je lɛŋ fɛɛ amrɔ nɛɛ ateŋ mɛi 10 fɛɛ mɛi 10 mli 6 yɛ nyɛsɛɛ afii nyɔŋma ni ho lɛ mli. Kɛ́ aja mli lɛ, yɛ afi 2004 lɛ mli lɛ, minitii enyɔ fɛɛ minitii enyɔ mli lɛ, mɔ hee baa Kristofoi asafo lɛ mli ákɛ Nyɔŋmɔ tsulɔ ni ejɔɔ ehe nɔ! *

Taakɛ eba lɛ yɛ klɛŋklɛŋ afii 100 lɛ mli lɛ, ŋmɛnɛ, ‘mɛi babaoo ebatsɔmɔ heyelilɔi, ni amɛba Nuŋtsɔ lɛ ŋɔɔ.’ Eyɛ mli akɛ Nyɔŋmɔ webii lɛ ayifalɛ ni yaa hiɛ lɛ diɛŋtsɛ etsɔɔɔ doo akɛ eejɔɔ amɛ moŋ, shi no yeɔ odase akɛ “Yehowa nine” fata ewebii lɛ ahe. (Bɔfoi lɛ Asaji 11:21, NW) Mɛni haa mɛi akpekpei abɔ jáa Yehowa lɛ? Ni mɛɛ hewalɛ nibii ni yaa nɔ nɛɛ náa yɛ bo diɛŋtsɛ onɔ?

Egbalaa Mɛi ni Hiɛ Tsui ni Ja Lɛ

Yesu wie yɛ faŋŋ mli akɛ: “Mɔ ko nyɛŋ aba miŋɔɔ, akɛ ja tsɛ lɛ ni tsu mi lɛ gbala lɛ dã.” (Yohane 6:44) No hewɔ lɛ, yɛ fɛɛ mli lɛ, Yehowa ji mɔ ni gbalaa “mɛi abɔ ní ajie ato naanɔ wala lɛ.” (Bɔfoi lɛ Asaji 13:48) Nyɔŋmɔ mumɔ lɛ baanyɛ aha mɛi ahɛle shi ni amɛsusu amɛ mumɔŋ hiamɔ nii ahe. (Mateo 5:3) Nibii tamɔ henilee ni gbaa mɔ naa, hiɛnɔkamɔ ni ataoɔ kɛ naagbai ni haoɔ mɔ jwɛŋmɔ diɛŋtsɛ nyɛɔ ehaa mɛi komɛi taoɔ Nyɔŋmɔ sɛɛ gbɛ, ni amɛkaseɔ eyiŋtoo kɛha adesai lɛ he nii.—Marko 7:26-30; Luka 19:2-10.

Biblia kasemɔ ni Kristofoi asafo lɛ eto he gbɛjianɔ lɛ yeɔ buaa aŋkroaŋkroi babaoo ni amɛnáa sanebimɔi ni gbaa amɛnaa lɛ ahetooi, ni enɛ gbalaa amɛ ni amɛbajáa Yehowa.

“Kɛ́ Nyɔŋmɔ yɛ lɛ, belɛ mɛni hewɔ ayaa nɔ ayeɔ mɛi sane ni ejaaa lɛ?” Sanebimɔ nɛɛ gba Davide ni yɔɔ Italy ní juɔ shi ehɔ̃ɔ tsofai ni mla eŋmɛɛɛ gbɛ lɛ naa. Ebɛ jamɔŋ saji ahe miishɛɛ pɔtɛ̃ɛ ko, shi ebi sane ni mli wa nɛɛ koni ekɛtée naataamɔ shi. Ewie akɛ: “Misusuuu akɛ abaaha mi sanebimɔ nɛɛ hetoo ni sa ní kɔneɔ mɔ yiŋ hu. Shi Odasefonyo ni kɛ mi gba sane lɛ to etsui shi waa, ni ekɛ Biblia mli ŋmalɛi hu fi nɔ ni ewieɔ lɛ sɛɛ. Nakai sane ni wɔgba lɛ ná minɔ hewalɛ waa.” Davide ejaje eshihilɛ gbɛ, ni eesɔmɔ Yehowa ŋmɛnɛ.

Mɛi krokomɛi hu baa Yehowa asafo lɛ fã ni yɔɔ shikpɔŋ nɔ lɛ mli ejaakɛ amɛmiitao shihilɛ kpakpa ni shishinumɔ yɔɔ mli. Akɛni jwɛŋmɔŋ hela  he datrɛfonyo yoo ko ni yɔɔ Zagreb, yɛ Croatia lɛ miitao helatsamɔ kɛha lɛ diɛŋtsɛ ehenumɔŋ naagbai hewɔ lɛ, etee eyana enaanyo datrɛfonyo nuu ko ni ehé gbɛi waa. Enaa kpɛ ehe beni datrɛfonyo nuu lɛ kɛ Yehowa Odasefoi anitsumɔhe nine ni yɔɔ Zagreb lɛ tɛlifon nɔmba kɛ Odasefonyo ko hu ni ele lɛ lɛ gbɛi ha lɛ. Datrɛfonyo nuu lɛ kɛɛ lɛ akɛ: “Ole nɔ ko, misusuɔ akɛ gbɔmɛi nɛɛ baanyɛ aye abua bo. Kɛ́ miha otee sɔlemɔ lɛ, amagai ni wala bɛ amɛmli sɔŋŋ obaayana yɛ jɛmɛ—mɔ ko mɔ ko etswaaa esɛŋ yɛ jɛmɛ, ni amɛshwila yɛ Nyɔŋmɔjamɔ gbɛfaŋ. Misusuuu akɛ sɔlemɔ ni obaaya lɛ baanyɛ aye abua bo. Miha helatsɛmɛi komɛi etee Yehowa Odasefoi lɛ aŋɔɔ, ni misusuɔ akɛ ebaahi jogbaŋŋ akɛ bo hu obaayana amɛ.” Odasefoi lɛ jɛ amɛsuɔmɔ mli amɛyasara datrɛfonyo yoo nɛɛ, ni amɛkɛ lɛ je Biblia mli nikasemɔ shishi no sɛɛ etsɛɛɛ. Yɛ otsii fioo komɛi asɛɛ lɛ, jwɛŋmɔŋ hela he datrɛfonyo nɛɛ kɛ miishɛɛ jaje akɛ Nyɔŋmɔ yiŋtoo he nilee ni ená lɛ eha shishinumɔ eba eshihilɛ mli.—Jajelɔ 12:13.

Mɛi ni kɛ naagbai ni mli wawai ekpe lɛ ateŋ mɛi babaoo eyɔse akɛ Biblia mli anɔkwalei lɛ pɛ ji nɔ ni nyɛɔ eshɛjeɔ mɔ mii diɛŋtsɛ. Yɛ Greece lɛ, gbekɛ nuu ko ni eye afii kpawo lɛ kpɔ kɛjɛ amɛskultsũ yiteŋ ebagbee shi, ni egbo. Nyɔji fioo komɛi asɛɛ lɛ, Odasefoi enyɔ komɛi kɛ gbekɛ nuu nɛɛ nyɛ kpe, ni amɛbɔ mɔdɛŋ koni amɛshɛje emii kɛtsɔ gbohiiashitee he hiɛnɔkamɔ lɛ ni amɛkɛ lɛ susu he lɛ nɔ. (Yohane 5:28, 29) Hiɛnɔkamɔ nɛɛ he sane ni yoo nɛɛ nu lɛ ha ejwa yaafo. Kɛkɛ ni nyɛmimɛi yei lɛ bi lɛ akɛ: “Kɛji obaasumɔ ni ole Biblia lɛ mli saji babaoo lɛ, mɛɛ be obaasumɔ koni wɔbasara bo?” Eha amɛ hetoo akɛ: “Amrɔ nɛɛ nɔŋŋ.” Yoo lɛ kɛ amɛ tee eshia, ni amɛ kɛ lɛ je Biblia mli nikasemɔ shishi. Ŋmɛnɛ, yoo nɛɛ kɛ eweku lɛ fɛɛ miisɔmɔ Yehowa.

Ani Ooná Mli Gbɛfaŋnɔ?

Niiashikpamɔi ni tamɔ enɛɛmɛi miiya nɔ yɛ je lɛŋ fɛɛ. Yehowa miibua anɔkwa jálɔi ni jɛ maji srɔtoi fɛɛ amli lɛ anaa, ni eetsɔse amɛ. Nɛkɛ kuu ni jɛ maji srɔtoi amli nɛɛ yɛ gbɛkpamɔ ni yɔɔ miishɛɛ akɛ abaabáa amɛyi kɛjɛ nibii agbɛjianɔtoo fɔŋ nɛɛ hiɛkpatamɔ ni baa lɛ mli kɛyabote jalɛ jeŋ hee lɛ mli.—2 Petro 3:13.

Akɛni Yehowa jɔɔmɔ yɛ mɛi anaabuamɔ nitsumɔ wulu nɛɛ nɔ hewɔ lɛ, nitsumɔ lɛ miiya nɔ kɛmiibɛŋkɛ enaagbee yɛ omanyeyeli mli ni nɔ ko nɔ ko bɛ ní tsĩɔ naa. (Yeaia 55:10, 11; Mateo 24:3, 14) Ani okɛ ekãa miitsu Maŋtsɛyeli shiɛmɔ nitsumɔ nɛɛ? Kɛ́ oofee nakai lɛ, no lɛ, ná nɔmimaa akɛ Nyɔŋmɔ baafi osɛɛ, ni ákɛ, taakɛ lalatsɛ lɛ kɛɛ lɛ, bo hu obaanyɛ okɛɛ akɛ: ‘Miyelikɛbuamɔ jɛɔ Yehowa ŋɔɔ.’—Lala 121:2.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 9]

“Mɔ ko nyɛŋ aba miŋɔɔ, akɛ ja tsɛ lɛ ni tsu mi lɛ gbala lɛ dã.”—YOHANE 6:44

[Akrabatsa ni yɔɔ baafa 8]

NAMƆ HAA SHWEREMƆ NƐƐ BAA?

“Kɛjeee Yehowa maa tsũ lɛ, no lɛ yakatswaa mɛi ni maa lɛ gboɔ he deŋme.”—Lala 127:1.

“Nyɔŋmɔ ha shwere. Belɛ agbɛnɛ jeee mɔ ni tɛo lɛ ji nɔ ko, ni jeee mɔ ni shwie nɔ nu lɛ hu, shi moŋ mɔ ni ha eshwere, ni ji Nyɔŋmɔ lɛ.”—1 Korintobii 3:6, 7.