Hagai 2:1-23
2 Nyɔɔŋ ni ji kpawo lɛ nɔ gbi ni ji 21 lɛ nɔ lɛ, Yehowa kɛ gbalɔ Hagai+ wie akɛ,
2 “Ofainɛ, bi Zerubabel,+ Shealtiel binuu lɛ, ni ji Yuda amralo lɛ,+ kɛ Osɔfonukpa Yoshua,+ Yehozadak+ binuu lɛ, kɛ maŋbii lɛ ateŋ mɛi ni eshwɛ lɛ akɛ:
3 ‘Namɔ yɔɔ nyɛteŋ lolo ní na shĩa* nɛɛ tsutsu anunyam lɛ?+ Te nyɛnaa lɛ tɛŋŋ bianɛ? Ani nyɛnaaa akɛ ejeee nɔ ko kwraa kɛ́ akɛto tsutsu nɔ lɛ he?’+
4 “‘Shi agbɛnɛ, wajemɔ ohe, Zerubabel,’ Yehowa kɛɛ, ‘ni wajemɔ ohe, Osɔfonukpa Yoshua, Yehozadak binuu.’
“‘Ni nyɛwajea nyɛhe, nyɛ shikpɔŋ lɛ nɔ bii fɛɛ,+ ní nyɛtsua nii,’ Yehowa kɛɛ.
“‘Ejaakɛ mikɛ nyɛ yɛ,’+ Yehowa, taiatsɛ lɛ kɛɛ.
5 ‘Nyɛkaia shi ni miwo nyɛ be ni nyɛshi Ejipt lɛ,+ ni mimumɔ lɛ yɛ nyɛteŋ lolo.*+ Nyɛkashea gbeyei.’”+
6 “Ejaakɛ nɔ ni Yehowa, taiatsɛ lɛ, kɛɛ nɛ, ‘Eshwɛ shi kome ekoŋŋ—etsɛŋ kwraa—ni mahoso ŋwɛi kɛ shikpɔŋ kɛ ŋshɔ kɛ shikpɔŋ gbiŋ.’+
7 “‘Ni mahoso jeŋmaji lɛ fɛɛ, ni jeŋmaji lɛ fɛɛ anibii ni jara wala* lɛ baaba;+ ni mikɛ anunyam baawo shĩa nɛɛ obɔ,’+ Yehowa, taiatsɛ lɛ kɛɛ.
8 “‘Jwiɛtɛi lɛ minɔ ni, ni shika tsuru lɛ hu, minɔ ni,’ Yehowa, taiatsɛ lɛ kɛɛ.
9 “‘Shĩa nɛɛ wɔsɛɛ anunyam lɛ baada fe tsutsu nɔ lɛ,’+ Yehowa, taiatsɛ lɛ kɛɛ.
“‘Ni mahã toiŋjɔlɛ ahi biɛ nɛɛ,’+ Yehowa, taiatsɛ lɛ kɛɛ.”
10 Nyɔɔŋ ni ji nɛɛhu lɛ nɔ gbi ni ji 24 lɛ nɔ, yɛ Dario nɔyeli afi ni ji enyɔ lɛ mli lɛ, Yehowa kɛɛ gbalɔ Hagai+ akɛ:
11 “Nɔ ni Yehowa, taiatsɛ lɛ, kɛɛ nɛ, ‘Ofainɛ, bi osɔfoi lɛ mla lɛ he sane akɛ:+
12 “Kɛji mɔ ko hiɛ loo krɔŋkrɔŋ yɛ etade mli,* ni etade lɛ sa blodo loo flɔ loo wain loo mu loo niyenii fɛɛ niyenii he lɛ, ani nii lɛ baatsɔ krɔŋkrɔŋ?”’”
Osɔfoi lɛ hã hetoo akɛ: “Dabi!”
13 Kɛkɛ ni Hagai bi akɛ: “Mɔ ko ni he tseee akɛni eta gbonyo* ko he lɛ hewɔ lɛ, kɛji eta nibii nɛɛ eko he lɛ, ani nii lɛ baatsɔ nɔ ko ni he tseee?”+
Osɔfoi lɛ hã hetoo akɛ: “Ebaatsɔ nɔ ko ni he tseee.”
14 No hewɔ lɛ, Hagai kɛɛ: “‘Nakai maŋ nɛɛ ji, ni nakai jeŋmaŋ nɛɛ ji yɛ mihiɛ,’ Yehowa kɛɛ, ‘ni nakai amɛninenaa nitsumɔi fɛɛ ji; nɔ fɛɛ nɔ ni amɛkɛbahãa yɛ jɛmɛ lɛ he tseee.’
15 “‘Shi agbɛnɛ, nyɛfainɛ, nyɛsusua enɛ he jogbaŋŋ* kɛjɛ ŋmɛnɛ gbi nɛɛ nɔ kɛyaa: Dani akɛ tɛ fɔ̃ tɛ nɔ yɛ Yehowa sɔlemɔ shĩa lɛ,+
16 no mli lɛ, te nibii tamɔ tɛŋŋ? Kɛ́ mɔ ko tee ŋmaa* ni abua naa he, ni eekpa gbɛ akɛ ebaaná susumɔ nii 20 lɛ, enáa 10 pɛ; ni kɛ́ mɔ ko tee wainŋaa bu he koni eyayɛ susumɔ nii 50 kɛjɛ bu lɛ mli lɛ, enáa 20 pɛ;+
17 Mihã jeŋ dɔlɛ ni hãa ŋmɔshi nibii ŋalaa kɛ hela ni hãa tsei gboiɔ kɛ nyɔŋmɔŋtɛi kpãtã nyɛninenaa nitsumɔi lɛ fɛɛ ahiɛ,+ shi nyɛteŋ mɔ kome po ekuuu esɛɛ kɛbaaa miŋɔɔ,’ Yehowa kɛɛ.
18 “‘Nyɛfainɛ, nyɛsusua enɛ he jogbaŋŋ* kɛjɛ ŋmɛnɛ gbi nɛɛ nɔ kɛyaa, kɛjɛ nyɔɔŋ ni ji nɛɛhu lɛ nɔ gbi ni ji 24 lɛ nɔ, kɛjɛ gbi nɔ ni atswa Yehowa sɔlemɔ shĩa lɛ faneshi lɛ;+ nyɛsusua enɛ he jogbaŋŋ:
19 Ani dumɔwui yɛ nitoohe lɛ* lolo?+ Wain tso kɛ agbami tso kɛ pomegranet tso kɛ oliv tso lɛ woko yibii lolo, aloo jeee nakai? Kɛjɛ ŋmɛnɛ gbi nɛɛ nɔ kɛyaa lɛ, majɔɔ nyɛ.’”+
20 Yehowa kɛɛ Hagai nɔ ni ji shii enyɔ nɔ, yɛ nyɔɔŋ lɛ nɔ gbi ni ji 24 lɛ nɔ+ akɛ:
21 “Kɛɛmɔ Zerubabel, Yuda amralo lɛ akɛ, ‘Miiba mibahoso ŋwɛi kɛ shikpɔŋ lɛ.+
22 Mabutu maŋtsɛyelii asɛi, ni makpãtã jeŋmaji lɛ amaŋtsɛyelii ahewalɛ hiɛ;+ ni mabutu shwiili kɛ emlitaralɔi, ni okpɔŋɔi kɛ amɛnɔtaralɔi baanyɔnyɔi, amɛteŋ mɔ fɛɛ mɔ baanyɔ yɛ enyɛmi klante naa.’”+
23 “‘Nakai gbi lɛ nɔ lɛ,’ Yehowa, taiatsɛ lɛ kɛɛ, ‘maŋɔ bo, mitsulɔ Zerubabel,+ Shealtiel binuu lɛ,’+ Yehowa kɛɛ, ‘ni mahã otsɔ tamɔ niianaasɔomɔ ga, ejaakɛ bo ji mɔ ni mihala,’ Yehowa, taiatsɛ lɛ kɛɛ.”
Shishigbɛ Niŋmaa
^ Loo “sɔlemɔ shĩa.”
^ Shishitsɔɔmɔi komɛi kɛɔ akɛ, “be ni mimumɔ lɛ damɔ nyɛteŋ lolo lɛ.”
^ Loo “jeŋmaji lɛ fɛɛ anibii ni asumɔɔ.”
^ Ni ji, atade lɛ ŋwɛigbɛ he ni blema lɛ akɛtsuɔ nii akɛ kotoku lɛ.
^ Loo “susuma.” Kwɛmɔ Wiemɔi Titrii Amligbalamɔ lɛ.
^ Hebri sht. ŋm., “nyɛkɛ nyɛtsui afɔ̃a enɛ nɔ.”
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
^ Hebri sht. ŋm., “nyɛkɛ nyɛtsui afɔ̃a enɛ nɔ.”
^ Loo “ŋmaa bu lɛ mli.”
