Oblahii kɛ Oblayei—Ani Nyɛmiiya Nyɛhiɛ yɛ Mumɔŋ?

BENI Hideo susuɔ be mli ni eyɔɔ nɔtsamɔ skul lɛ he lɛ, ekɛɛ akɛ: “Eyɛ mli akɛ miyaa Kristofoi akpeei moŋ, shi no mli lɛ, mibɛ shwelɛ ni mli wa akɛ masɔmɔ Yehowa. Bei pii lɛ mifeɔ he mfoniri yɛ mijwɛŋmɔ mli akɛ miji mɔ ni ehe gbɛi waa yɛ miklasbii lɛ ateŋ, ní mikɛ hewoo ko miishi ako yɛ gbɛjegbɛ lɛ nɔ kɛ mihemɔ yoo ko. No mli lɛ, otii pɔtɛɛi komɛi mamɔɔɔ mihiɛ, ni mibɛ shwelɛ ko kwraa akɛ maya mihiɛ yɛ mumɔŋ.” Taakɛ Hideo ji lɛ, etamɔ nɔ ni oblahii kɛ oblayei babaoo nyiɛ kɛkɛ, ni amɛbɛ shwelɛ akɛ amɛaashɛ otii ni sɛɛnamɔ yɔɔ he lɛ ahe, loo ni amɛaaná hiɛyaa ko.

Kɛ́ oji oblanyo loo oblayoo fioo lɛ, ekolɛ onáa miishɛɛ kɛ́ okɛ ohe wo akaŋshii loo shwɛmɔ ko mli. Shi, ekolɛ onuŋ he nakai nɔŋŋ yɛ mumɔŋ nibii agbɛfaŋ. Ani obaanyɛ oná mumɔŋ otii ahe miishɛɛ? Susumɔ lalatsɛ lɛ wiemɔi nɛɛ ahe okwɛ: “Yehowa odase lɛ ma shi shiŋŋ, ehaa kwashia leɔ nii. . . . Yehowa kitã lɛ yɛ krɔŋŋ, ni ehaa mɔ hiŋmɛii anɔ tseɔ.” (Lala 19:8, 9) Nyɔŋmɔ Wiemɔ lɛ baanyɛ akudɔ “kwashia” koni efee nii yɛ nilee mli, ‘ni eha ehiŋmɛii anɔ atse.’ Hɛɛ, mumɔŋ nibii baanyɛ aha oná miishɛɛ. Shi mɛni he hiaa bɔni afee ni onu he nakai? Nɛgbɛ esa akɛ oje shishi kɛjɛ?

Ná Kanyamɔ Koni Osɔmɔ Nyɔŋmɔ

Klɛŋklɛŋ lɛ, esa akɛ oná kanyamɔ. Susumɔ oblanyo Maŋtsɛ Yosia ni jɛ Yuda lɛ sane lɛ he okwɛ. Beni ayana Yehowa Mla wolo lɛ yɛ sɔlemɔwe lɛ, Yosia ha akane, ni nɔ ni enu lɛ sa etsui he waa. Nɔ ni jɛ mli ba ji akɛ, “Yosia jie nihii nii lɛ fɛɛ kɛjɛ shikpɔji ni ji Israelbii lɛ anii lɛ anɔ.” (2 Kronika 34:14-21, 33) Nyɔŋmɔ Wiemɔ lɛ kanemɔ tsirɛ Yosia ni efee babaoo koni ekɛha jamɔ krɔŋŋ ashwere.

Bo hu obaanyɛ oná suɔmɔ koni osɔmɔ Yehowa kɛji okane Biblia lɛ daa ni ojwɛŋ nɔ ni okaneɔ lɛ nɔ lɛ. No ji nɔ ni kanya Hideo. Ekɛ gbɛgbalɔ onukpa ko, ni ji Yehowa Odasefoi abe-fɛɛ sɔɔlɔ ko bɔi bɔɔ. Gbɛgbalɔ lɛ ji Biblia kaselɔ ko ni yɔɔ ekãa, ni ebɔɔ mɔdɛŋ koni ekɛ Biblia tsɔɔmɔi lɛ atsu nii yɛ eshihilɛ mli. Akɛni gbɛgbalɔ lɛ nɔkwɛmɔnɔ lɛ wo Hideo hewalɛ babaoo hewɔ lɛ, Hideo je shishi akɛ eeefee nakai nɔŋŋ, ni ená shwelɛ ni mli wa waa akɛ ebaasɔmɔ Nyɔŋmɔ kɛ mɛi krokomɛi. Nɔ ni jɛ ehiɛ ni etee yɛ mumɔŋ lɛ mli ba ji akɛ, eshihilɛ bafee nɔ ni yiŋtoo yɔɔ he.

Biblia lɛ kanemɔ daa gbi baanyɛ afee kanyamɔ nɔ̃ kɛha oblahii kɛ oblayei. Takahiro tsɔɔ mli akɛ: “Be fɛɛ be ni mayakã shi ni makai akɛ mikaneko mi-Biblia kanemɔ kɛha gbi lɛ, miteɔ shi ni miyakaneɔ. Nɔ ni ejɛ mli kɛba ji akɛ, mináa  Yehowa gbɛtsɔɔmɔ. Daa Biblia kanemɔ ye ebua mi babaoo ni mitee hiɛ yɛ mumɔŋ. Akɛni mitswa mifai shi akɛ maná babaoo feemɔ yɛ Yehowa sɔɔmɔ mli hewɔ lɛ, beni migbe nɔtsamɔ skul naa sɛɛ etsɛɛɛ kɛkɛ ni mikɛ mihe wo daa gbɛgbamɔ nitsumɔ lɛ mli. Ni miiná gbɛgbamɔ nitsumɔ lɛ he miishɛɛ waa diɛŋtsɛ.”

Kɛfata Biblia lɛ kanemɔ he lɛ, mɛni hu baanyɛ aye abua bo ni owaje kanyamɔ ni oná koni ojie Yehowa yi lɛ? Tomohiro nyɛ ji mɔ ni tsɔɔ lɛ Biblia mli anɔkwale lɛ. Ekɛɛ akɛ: “Beni miye afii 19 ni mikase wolo ni ji Life Does Have a Purpose lɛ jogbaŋŋ sɛɛ dani Yehowa suɔmɔ lɛ kɛ Yesu kpɔmɔ afɔleshaa lɛ sa mitsui he waa. Nakai hiɛsɔɔ kɛha Nyɔŋmɔ suɔmɔ lɛ kanya mi koni mafee babaoo yɛ Yehowa sɔɔmɔ mli.” (2 Korintobii 5:14, 15) Taakɛ Tomohiro ji lɛ, kɛ́ oblahii kɛ oblayei tiuɔ teemɔŋ Biblia nikasemɔ sɛɛ lɛ, ewoɔ amɛ hewalɛ koni amɛya amɛhiɛ yɛ mumɔŋ.

Shi kɛ́ yɛ enɛɛmɛi fɛɛ sɛɛ, ni obɛ tsuiŋ shwelɛ akɛ osɔmɔ Yehowa hu? Ani mɔ ko yɛ ni obaanyɛ oya eŋɔɔ kɛha yelikɛbuamɔ? Bɔfo Paulo ŋma akɛ: “Ejaakɛ Nyɔŋmɔ . . . miitsu nii yɛ nyɛmli bɔni afee ni nyɛsumɔ ni nyɛfee hu.” (Filipibii 2:13, NW) Kɛ́ osɔle oha Yehowa kɛha yelikɛbuamɔ lɛ, ekɛ emumɔ krɔŋkrɔŋ lɛ ní baawo bo hewalɛ, jeee koni ‘ofee’ kɛkɛ, shi moŋ koni ‘osumɔ’ hu lɛ baaha bo. Enɛ tsɔɔ akɛ Nyɔŋmɔ mumɔ krɔŋkrɔŋ lɛ baaha bɔ ni oshweɔ ni ofee nɔ fɛɛ nɔ ni obaanyɛ yɛ Yehowa sɔɔmɔ mli lɛ aya hiɛ, ni ebaaye ebua bo koni oda yɛ mumɔŋ. Bɔ fɛɛ bɔ ni eji lɛ, ná hekɛnɔfɔɔ yɛ Yehowa hewalɛ lɛ mli, ni owaje otsui!

Okɛ Otii Amamɔ Shi Aha Ohe

Akɛni otswa ofai shi akɛ obaafee babaoo yɛ Yehowa sɔɔmɔ mli hewɔ lɛ, esa akɛ okɛ otii amamɔ shi aha ohe bɔni afee ni onyɛ oya ohiɛ yɛ mumɔŋ. Mana, ni ji Kristofonyo oblayoo fioo lɛ kɛɛ akɛ: “Otii ni mikɛmamɔ mihiɛ lɛ bafee yelikɛbuamɔ nɔ kpele diɛŋtsɛ kɛha mi. Manyɛ maya mihiɛ kɛ ekãa, moŋ fe nɔ ni maya sɛɛsɛɛ. Beni otii ni mikɛmamɔ mihiɛ lɛ yɔɔ mijwɛŋmɔ mli lɛ, mikɛ hiɛdɔɔ sɔle miha Yehowa kɛha gbɛtsɔɔmɔ, ni minyɛ mitee mihiɛ ni nɔ ko gbalaaa mijwɛŋmɔ.”

Esa akɛ otii ni okɛmamɔ ohiɛ lɛ afee nɔ ni yɔɔ diɛŋtsɛ ni nine nyɛɔ eshɛɔ nɔ. Biblia lɛ yitso ko ni obaakane daa gbi lɛ baanyɛ afee oti ko ni shishinumɔ yɔɔ he. Obaanyɛ oje nibii amlitaomɔ hu shishi. Kɛ wɔɔfee enɛ he nɔkwɛmɔnɔ kɛ nɔ ko yɛ Blɔfo wiemɔ mli lɛ, obaanyɛ ni okase Yehowa sui ni ato naa yɛ saneyitso bibioo ni ji “Qualities by Name” lɛ shishi lɛ ni jeɔ kpo yɛ saneyitso ni ji “Jehovah” shishi yɛ Watch Tower Publications Index lɛ mli lɛ. Ato wiemɔi aaashɛ 40 naa ni obaanyɛ osusu he, ni ŋwanejee ko bɛ he akɛ saji amlitaomɔ nɛɛ baagbala bo kɛbɛŋkɛ Yehowa he, ni ekanya bo koni ofee babaoo oha lɛ. Nɔ ni fata otii krokomɛi ni nine nyɛɔ eshɛɔ nɔ lɛ ahe ji saji ahetoo ni obaaha kɛ hoo lɛ shikome yɛ Kristofoi akpeei srɔtoi fɛɛ ni biɔ ni toibolɔi kɛ amɛhe awo mli lɛ ashishi, kɛ hoo lɛ asafo lɛ mli bii lɛ ateŋ mɔ kome ni ooole lɛ jogbaŋŋ kɛmɔ shi yɛ kpee fɛɛ kpee shishi, kɛ ha ni ohaŋ gbi ko aho ni osɔleee ohaaa Yehowa ni owieee ehe otsɔɔɔ mɛi krokomɛi lɛ.

Kɛ́ okɛ ohe woko Teokrase Sɔɔmɔ Skul lɛ mli lolo lɛ, enɛ baafee oti ni sa kɛha bo. Ani okɛ ohe woɔ maŋshiɛmɔ nitsumɔ lɛ mli? Kɛ jeee nakai lɛ, ekolɛ obaasumɔ ni otsu nii ni obatsɔ shiɛlɔ ni abaptisiko lɛ. Ekã shi faŋŋ akɛ, nɔ ni baanyiɛ enɛ sɛɛ ji wekukpãa ni kã okɛ Yehowa teŋ lɛ he ni ooosusu kɛ hiɛdɔɔ kɛ ohe nɔ ni obaajɔɔ oha lɛ lɛ. Oblahii kɛ oblayei babaoo bɔɔ mɔdɛŋ ni amɛhi shi yɛ amɛhenɔjɔɔmɔ lɛ naa kɛtsɔ be-fɛɛ sɔɔmɔ lɛ ni amɛaashɛ he lɛ nɔ.

 Yɛ be mli ni ehi akɛ okɛ otii aaamamɔ ohiɛ yɛ oshihilɛ mli lɛ, kwɛmɔ jogbaŋŋ yɛ akaŋshii mumɔ ni oooná lɛ he. Obaaná miishɛɛ babaoo yɛ nɔ ni ofeɔ lɛ mli kɛji okɛ ohe etooo mɛi krokomɛi ahe.—Galatabii 5:26; 6:4.

Ekolɛ onuɔ he akɛ obɛ niiashikpamɔ, ni ewa kɛha bo akɛ okɛ otii ni shishinumɔ yɔɔ he aaamamɔ ohiɛ. Belɛ nyiɛmɔ ŋaawoo ni Biblia lɛ kɛhaa lɛ sɛɛ akɛ: “Ba otoi shi, ní onu nilelɔi awiemɔi.” (Abɛi 22:17) Taomɔ yelikɛbuamɔ kɛjɛ ofɔlɔi loo Kristofoi krokomɛi ni edara yɛ mumɔŋ lɛ aŋɔɔ. Yɛ anɔkwale mli lɛ, esa akɛ fɔlɔi kɛ mɛi krokomɛi kɛ nilee atsu nii ni amɛfee mɛi ni woɔ mɔ hewalɛ yɛ sane nɛɛ mli. Henumɔ ni oblahii kɛ oblayei bibii baaná akɛ aanyɛ amɛnɔ ni amɛshɛ oti ko ni mɛi krokomɛi kɛmamɔ shi kɛha amɛ lɛ ahe lɛ baanyɛ afite miishɛɛ ni amɛyɔɔ lɛ, ni ebaanyɛ ni eha yiŋtoo ni yɔɔ otii ni akɛmamɔɔ shi lɛ asɛɛ lɛ po afee yaka. Enɛ ba oblayoo ko nɔ, mɔ ni kɛɛ akɛ: “Mifɔlɔi kɛ otii babaoo ni eko nyiɛ eko sɛɛ, tamɔ mihe ni mikɛ aaawo Teokrase Sɔɔmɔ Skul lɛ mli, shiɛmɔ nitsumɔ lɛ mli gbɛfaŋnɔ ni maná, ní aaabaptisi mi, kɛ ni matsɔ gbɛgbalɔ mamɔ mihiɛ. Mibɔ mɔdɛŋ waa koni mashɛ otii nɛɛ eko fɛɛ eko he. Kɛ́ mishɛ oti kome he lɛ, mifɔlɔi ejieee miyi, shi yɛ no najiaŋ lɛ, amɛkɛ oti kroko maa mihiɛ koni mibɔ mɔdɛŋ ni mashɛ he. Nɔ ni jɛ mli ba ji akɛ, minu he be fɛɛ be akɛ aanyɛ minɔ koni mashɛ otii ahe. Etɔ mi waa, ni minuuu miishɛɛ ko kwraa he akɛ mitsu nɔ ko migbe naa.” Mɛni ji naagba lɛ? Otii lɛ fɛɛ sa, shi amɛjeee lɛ diɛŋtsɛ enɔ̃. Bɔni afee ni oye omanye lɛ, esa akɛ oná kanyamɔ ni otsɔ hiɛ okɛ otii amamɔ shi oha bo diɛŋtsɛ ohe!

Susumɔ Yesu Kristo he okwɛ. Beni eba shikpɔŋ lɛ nɔ lɛ, ele nɔ ni e-Tsɛ, Yehowa kpaa gbɛ kɛjɛɔ edɛŋ. Yehowa suɔmɔnaa nifeemɔ jeee oti ko kɛkɛ ni ma Yesu hiɛ, shi moŋ eji nitsumɔ ko ni esa akɛ etsu egbe naa. Te Yesu bu enitsumɔ lɛ eha tɛŋŋ? Ekɛɛ akɛ: “Miŋmaa ji akɛ mafee mɔ ni tsu mi lɛ suɔmɔnaa nii, ni magbe enitsumɔ lɛ naa.” (Yohane 4:34) Yesu ná miishɛɛ yɛ Yehowa suɔmɔnaa nifeemɔ he, ni etsu nɔ ni e-Tsɛ kpaa gbɛ yɛ edɛŋ lɛ he nii. Etamɔ niyenii kɛha Yesu—enáa miishɛɛ ni etsui nyɔɔ emli ákɛ eeetsu nitsumɔ ni akpaa gbɛ yɛ edɛŋ lɛ he nii egbe naa. (Hebribii 10:5-10) Bo hu obaanyɛ oná miishɛɛ, kɛji oná kanyamɔ ni sa koni ofee nibii ni ofɔlɔi woɔ bo hewalɛ ni ofee lɛ.

Kaaha Ekpakpafeemɔ Miitɔ Bo

Bei abɔ ni oyɔɔ oti ko yɛ ojwɛŋmɔ mli lɛ, tsu nii waa koni onine ashɛ nɔ. Galatabii 6:9 lɛ kɛɔ akɛ: “Shi nyɛkahaa ekpakpafeemɔ miitɔa wɔ, ejaakɛ kɛ́ wɔnijiaŋ ejeee wui lɛ, wɔbaakpa hu yɛ be ni sa mli.” Okɛ ohe akafɔ bo diɛŋtsɛ ohewalɛ loo nyɛmɔ pɛ nɔ. Bɔ fɛɛ bɔ ni fee lɛ, okɛ naatsĩi baakpe, ni yɛ bei komɛi amli lɛ, okɛ nijiaŋwujee henumɔi ni sɛɛ etsɛɛɛ po baakpe. Shi Biblia lɛ maa nɔ mi kɛhaa wɔ akɛ: “Kaimɔ [Nyɔŋmɔ] yɛ ogbɛ̀i fɛɛ mli, ni lɛ eeejaje otempɔŋi lɛ!” (Abɛi 3:6) Yehowa baawaje bo beni otsuɔ nii waa koni onine ashɛ mumɔŋ otii ni okɛmamɔ ohiɛ lɛ anɔ lɛ.

Hɛɛ, kɛtsɔ shwelɛ ni oooná akɛ ooosɔmɔ Yehowa kɛ agbɛnɛ kɛtsɔ mumɔŋ otii ahe ni oooshɛ lɛ nɔ lɛ, obaanyɛ oha ‘mɛi fɛɛ ana oshweremɔ lɛ faŋŋ.’ (1 Timoteo 4:15) Kɛkɛ lɛ obaaná Nyɔŋmɔ sɔɔmɔ shihilɛ gbɛ ni shishinumɔ yɔɔ he lɛ mli ŋɔɔmɔ.

[Mfoniri ni yɔɔ baafa 9]

Biblia lɛ ni oookane kɛ nɔ ni okaneɔ lɛ nɔ ní ooojwɛŋ lɛ baakanya bo ni osɔmɔ Yehowa

[Mfoniri ni yɔɔ baafa 10]

Yesu tsu nɔ ni e-Tsɛ kpaa gbɛ yɛ edɛŋ lɛ he nii