Wolo Ni Akɛmaje Filipibii Lɛ 2:1-30

  • Kristofoi aheshibaa (1-4)

  • Kristo heshibaa kɛ enɔwómɔ (5-11)

  • Nyɛtsua nyɛ diɛŋtsɛ nyɛyiwalaheremɔ he nii (12-18)

    • Nyɛtsoa akɛ kanei (15)

  • Etsu Timoteo kɛ Epafrodito (19-30)

2  No hewɔ lɛ, kɛ́ Kristo mli hewalɛwoo ko yɛ, kɛ́ suɔmɔ miishɛjemɔ ko yɛ, kɛ́ mɔhesusumɔ ko* yɛ, kɛ́ suɔmɔ kɛ musuŋtsɔlɛ ko yɛ lɛ,  nyɛhãa mimiishɛɛ lɛ ayia obɔ, akɛ nyɛmiijwɛŋ nɔ kome, nyɛhiɛ suɔmɔ kome, nyɛfee ekome,* ni nyɛhiɛ susumɔ kome.+  Nyɛkajɛa naataamɔ*+ loo nyɛhe ni nyɛnaa tsɔ+ mli nyɛfea nɔ ko nɔ ko, shi moŋ nyɛkɛ heshibaa* abua mɛi krokomɛi akɛ amɛnɔ kwɔlɔ fe nyɛ,+  be mli ni nyɛtaoɔ nibii ni hi hã mɛi krokomɛi,+ shi jeee nibii ni hi hã nyɛ pɛ lɛ.+  Nyɛyaa nɔ nyɛhiɛa jwɛŋmɔ nɛɛ ni Kristo Yesu hu ná eko lɛ,+  mɔ ni hiɛ Nyɔŋmɔ su moŋ,+ shi ebaaa ejwɛŋmɔ mli kɔkɔɔkɔ akɛ ebaashɔ̃ hegbɛ ko, koni ekɛ Nyɔŋmɔ aye egbɔ.+  Dabi, shi moŋ, eŋmɛɛ nɔ fɛɛ nɔ he, ni eŋɔ nyɔŋ su,+ ni ebatsɔ gbɔmɔ.*+  Nɔ ni fe nakai lɛ, be ni eba akɛ gbɔmɔ lɛ,* eba ehe shi, ni ebo Nyɔŋmɔ toi kɛtee gbele mli tɔ̃ɔ,+ hɛɛ, gbele yɛ piŋmɔ tso* nɔ.+  Enɛ nɔŋŋ hewɔ lɛ, Nyɔŋmɔ wó enɔ ni ehã lɛ gbɛhe ni nɔ kwɔ,+ ni ejɛ mlihilɛ mli ehã lɛ gbɛ́i ni ta gbɛ́i krokomɛi fɛɛ nɔ,+ 10  koni yɛ Yesu gbɛ́i mli lɛ, mɛi ni yɔɔ ŋwɛi kɛ mɛi ni yɔɔ shikpɔŋ lɛ nɔ kɛ mɛi ni yɔɔ shikpɔŋ lɛ shishi lɛ anakutso fɛɛ nakutso akula shi+ 11  ni lilɛi fɛɛ lilɛi ajaje akɛ Yesu Kristo ji Nuŋtsɔ,+ kɛwo Nyɔŋmɔ, ni ji Tsɛ lɛ hiɛ nyam. 12  No hewɔ lɛ, mɛi ni misumɔɔ, bɔ ni nyɛboɔ Nyɔŋmɔ toi daa nɛɛ, jeee be ni miyɔɔ nyɛŋɔɔ kɛkɛ, shi moŋ, amrɔ nɛɛ ni mibɛ nyɛŋɔɔ nɛɛ po lɛ nyɛfeɔ fe nakai lɛ, nyɛyaa nɔ nyɛkɛ gbeyeishemɔ kɛ hekpokpomɔ atsua nyɛ diɛŋtsɛ nyɛyiwalaheremɔ he nii. 13  Ejaakɛ Nyɔŋmɔ ji mɔ ni kanyaa nyɛ bɔ ni sa ehiɛ, ni ehãa nyɛshweɔ, ni ehãa nyɛnáa hewalɛ ni nyɛkɛaafee hu. 14  Nyɛyaa nɔ nyɛfea nii fɛɛ ni huhuuhuwiemɔi+ kɛ ŋwanejei bɛ mli,+ 15  koni nyɛfee mɛi ni shwamɔ ko bɛ amɛhe, ni nyɛfee krɔŋŋ, Nyɔŋmɔ bii+ ni kpa ko bɛ amɛhe yɛ yinɔ kɔɔdɔŋ ni bɛ eŋɛlɛ nɔ nɛɛ teŋ,+ mɛi ateŋ ni nyɛtsoɔ yɛ akɛ kanei yɛ je lɛ mli lɛ,+ 16  ni nyɛya nɔ nyɛhiɛ wala wiemɔ lɛ mli kpɛŋŋ.+ Kɛkɛ lɛ, maná nɔ ko madamɔ nɔ maná miishɛɛ babaoo yɛ Kristo gbi lɛ nɔ, akɛni mile akɛ foi ni mida lɛ efeko efolo, aloo nitsumɔ ni mitsu waa lɛ, efeko efolo lɛ hewɔ. 17  Shi kɛ́ aafɔse mi tamɔ dãa afɔle+ aashwie afɔle+ lɛ kɛ sɔɔmɔ krɔŋkrɔŋ* ni nyɛhemɔkɛyeli lɛ egbala nyɛ kɛba he lɛ nɔ po lɛ, maná he miishɛɛ, ni mikɛ nyɛ fɛɛ baaná miishɛɛ waa. 18  Nakai nɔŋŋ esa akɛ nyɛ hu nyɛmii ashɛ nyɛhe, ni nyɛkɛ mi aná miishɛɛ. 19  Agbɛnɛ, mihiɛ kã nɔ yɛ Nuŋtsɔ Yesu mli akɛ etsɛŋ ni matsu Timoteo+ kɛba nyɛŋɔɔ, koni kɛ́ ababɔ mi nyɛhe amaniɛ lɛ, no awo mi hewalɛ. 20  Ejaakɛ mibɛ mɔ ko ni subaŋ tamɔ enɔ lɛ, ni baajɛ tsui krɔŋŋ mli etsu nyɛsaji ahe nii. 21  Ejaakɛ mɛi krokomɛi lɛ fɛɛ miitao amɛ diɛŋtsɛ amɛnii, shi jeee Yesu Kristo nii. 22  Shi nyɛle odase ni lɛ diɛŋtsɛ eye yɛ ehe, akɛ, tamɔ bi+ kɛ epapa lɛ, ekɛ mi sɔmɔ akɛ nyɔŋ koni sane kpakpa lɛ ashwere. 23  No hewɔ lɛ, lɛ ji mɔ ni mihiɛ kã nɔ akɛ, kɛ́ mina bɔ ni nibii baaya lɛ kɛhã mi nɔŋŋ lɛ, matsu lɛ. 24  Anɔkwa, miyɛ nɔmimaa yɛ Nuŋtsɔ lɛ mli akɛ, mi diɛŋtsɛ hu etsɛŋ ni maba.+ 25  Shi amrɔ nɛɛ, misusuɔ akɛ ehe miihia ni matsu Epafrodito, minyɛmi nuu kɛ minaanyo nitsulɔ kɛ minaanyo asraafonyo, kɛ nyɛ hu nyɛbɔfo kɛ tsulɔ ni tsuɔ mihiamɔ nii ahe nii ehãa mi lɛ, nyɛŋɔɔ,+ 26  ejaakɛ eeshwe ni ena nyɛ fɛɛ, ni akɛni nyɛnu akɛ no mli lɛ ebɛ hewalɛ hewɔ lɛ, ehao. 27  Hela mɔ lɛ lɛɛlɛŋ, ni ebɛŋkɛ gbele po; shi Nyɔŋmɔ na lɛ mɔbɔ, anɔkwa, jeee lɛ pɛ, shi mi hu, koni mikaye awerɛho mishi awerɛho nɔ. 28  No hewɔ lɛ, mikɛ oyaiyeli kpele miitsu lɛ, koni kɛ́ nyɛna lɛ lɛ, nyɛná miishɛɛ babaoo ekoŋŋ, ni mi hu mikaye mitsui fe nine. 29  No hewɔ lɛ, nyɛherea lɛ atuu tamɔ bɔ ni afɔɔ feemɔ yɛ Nuŋtsɔ lɛ mli lɛ kɛ miishɛɛ fɛɛ, ni nyɛyaa nɔ nyɛbua gbɔmɛi ni tamɔ nɛkɛ akɛ mɛi ni sa woo,+ 30  ejaakɛ shwɛ sharao ni egbo yɛ Kristo nitsumɔ lɛ* hewɔ, ni ekɛ ewala wo oshãra mli* koni ebaye nyɛnajiaŋ kɛsɔmɔ mi yɛ sɔɔmɔ ni ehiii nyɛ sɔɔmɔ akɛni nyɛbɛ biɛ lɛ hewɔ.+

Shishigbɛ Niŋmaa

Greek sht. ŋm., “mumɔ mli gbɛfaŋnɔnamɔ ko.”
Loo “nyɛfee ekome yɛ susuma mli.”
Loo “mansɔ̃tsɔɔ.”
Loo “heshibaa jwɛŋmɔ.”
Greek sht. ŋm., “ebatsɔ tamɔ bɔ ni gbɔmɛi yɔɔ lɛ.”
Greek sht. ŋm., “be ni ana esu akɛ gbɔmɔ lɛ.”
Loo “sɔɔmɔ ní asɔmɔɔ yɛ mɛi krokomɛi ahilɛkɛhamɔ hewɔ.”
Shishitsɔɔmɔi komɛi kɛɔ akɛ, “yɛ Nuŋtsɔ lɛ nitsumɔ lɛ.”
Loo “ekɛ esusuma wo oshãra mli.”