2 Kronika 34:1-33

  • Yosia batsɔ Yuda maŋtsɛ (1, 2)

  • Yosia hã afee tsakemɔi (3-13)

  • Ana Mla wolo lɛ (14-21)

  • Hulda gba akɛ sane fɔŋ baaba (22-28)

  • Yosia kane wolo lɛ etsɔɔ maŋbii lɛ (29-33)

34  Be ni Yosia+ batsɔ maŋtsɛ lɛ, no mli lɛ, eye afii kpaanyɔ, ni eye nɔ afii 31 yɛ Yerusalem.+  Efee nɔ ni ja yɛ Yehowa hiɛ, ni enyiɛ etsɛ David gbɛi lɛ anɔ, ni egbáaa afã kɛyaaa ninejurɔ loo abɛku.  Yɛ enɔyeli afi ni ji 8 lɛ nɔ, be ni edako lɛ, ebɔi etsɛ David Nyɔŋmɔ lɛ sɛɛgbɛtaomɔ,+ ni yɛ enɔyeli afi ni ji 12 lɛ nɔ lɛ, ebɔi hei grɔŋŋi lɛ,+ kɛ wɔŋ tsei* lɛ, kɛ amagai lɛ,+ kɛ dade amagai lɛ jiemɔ koni ekɛfee Yuda kɛ Yerusalem krɔŋkrɔŋ.+  Amɛkumɔ Baal srɔtoi lɛ afɔleshaa latɛi lɛ hu amɛshwie shi yɛ ehiɛ, ni efolɔ tsofa-kɛ-ŋmashãa latɛi ni mamɔ amɛnɔ lɛ. Agbɛnɛ hu, ekumɔ wɔŋ tsei* lɛ, amagai lɛ, kɛ dade amagai lɛ, ni eshimɔ amɛ munyɔmunyɔ ni ekɛshwã mɛi ni no mli lɛ, amɛshãa afɔlei amɛhãa amɛ lɛ afuuhei lɛ anɔ.+  Ni eshã osɔfoi lɛ awui lɛ yɛ amɛfɔleshaa latɛi lɛ anɔ.+ Nɛkɛ efee ni ehã Yuda kɛ Yerusalem fee krɔŋkrɔŋ.  Ni yɛ maji ni yɔɔ Manase, kɛ Efraim,+ kɛ Simeon, aahu kɛyashi Naftali lɛ, kɛ amɛhewɔ maji ni akpãtã hiɛ lɛ amli hu lɛ,  ekumɔ afɔleshaa latɛi lɛ, ni efolɔ wɔŋ tsei* lɛ ni ejwara amagai lɛ,+ ni eshimɔ amɛ mulumulu; ni efolɔ tsofa-kɛ-ŋmashãa latɛi ni yɔɔ Israel shikpɔŋ muu lɛ fɛɛ nɔ lɛ,+ ni eku esɛɛ etee Yerusalem.  Yɛ enɔyeli afi ni ji 18 lɛ nɔ, be ni efee shikpɔŋ lɛ kɛ sɔlemɔ shĩa lɛ krɔŋkrɔŋ sɛɛ lɛ, etsu Shafan,+ Azalia binuu lɛ, kɛ Maaseia, maŋ lɛ nɔ onukpa lɛ, kɛ Yoa, Yoahaz binuu ni ji saji aŋmalalɔ lɛ koni amɛyasaa Yehowa, e-Nyɔŋmɔ lɛ shĩa lɛ.+  Amɛtee osɔfonukpa Hilkia ŋɔɔ ni amɛkɛ shika ni akɛba Nyɔŋmɔ shĩa lɛ hã lɛ, ni ji shika ni Levibii ni sɔmɔɔ akɛ shinaanaakwɛlɔi lɛ ebua naa kɛjɛ Manase, kɛ Efraim, kɛ Israel wekui ni eshwɛ lɛ,+ kɛ agbɛnɛ hu, Yuda, kɛ Benyamin, kɛ Yerusalembii lɛ fɛɛ adɛŋ lɛ. 10  Kɛkɛ ni amɛkɛhã mɛi ni ahala akɛ amɛkwɛ Yehowa shĩa lɛ nitsumɔ lɛ nɔ lɛ. Ni nitsulɔi ni tsuɔ nii yɛ Yehowa shĩa lɛ mli lɛ kɛ shika lɛ tsu nii kɛsaa shĩa lɛ. 11  Amɛkɛ shika lɛ hã ŋaalɔi lɛ, kɛ tsumalɔi lɛ koni amɛkɛhé tɛi ni ako, kɛ tsei ni akɛbaable nii asɛɛ, koni agbɛnɛ hu amɛkɛ mplaŋi amamɔ tsũi ni Yuda maŋtsɛmɛi lɛ kwɛɛɛ amɛ jogbaŋŋ ni amɛfite lɛ.+ 12  Ni hii lɛ ye anɔkwa yɛ nitsumɔ lɛ mli.+ Ahala Yahat, kɛ Obadia, ni ji Levibii ni jɛ Meraribii+ lɛ ateŋ lɛ, kɛ Zakaria, kɛ Meshulam, ni ji Levibii ni jɛ Kohatbii+ lɛ ateŋ lɛ ato amɛnɔ koni amɛsɔmɔ akɛ nɔkwɛlɔi. Agbɛnɛ hu, Levibii fɛɛ ni le lalatswaa jogbaŋŋ lɛ+ 13  ji mɛi ni kwɛ apaafoi* lɛ anɔ, ni amɛ nɔŋŋ ji mɛi ni tsuɔ nitsumɔi srɔtoi lɛ anɔkwɛlɔi; ni Levibii lɛ ekomɛi ji woloŋmalɔi, nɔkwɛlɔi, kɛ agbonaakwɛlɔi.+ 14  Be ni amɛjieɔ shika ni akɛba Yehowa shĩa lɛ,+ osɔfo Hilkia na Yehowa Mla wolo+ lɛ ni etsɔ Mose nine nɔ ekɛhã lɛ.+ 15  No hewɔ lɛ, Hilkia kɛɛ Shafan, ni ji woloŋmalɔ lɛ akɛ: “Mina Mla wolo lɛ yɛ Yehowa shĩa lɛ.” Kɛkɛ ni Hilkia kɛ wolo lɛ hã Shafan. 16  Kɛkɛ ni Shafan kɛ wolo lɛ bahã maŋtsɛ lɛ ni ekɛɛ maŋtsɛ lɛ akɛ: “Otsuji lɛ miitsu nɔ fɛɛ nɔ ni akɛwo amɛdɛŋ lɛ. 17  Amɛtsɔ shika ni aná yɛ Yehowa shĩa lɛ, ni amɛkɛhã hii ni ahala lɛ kɛ mɛi ni tsuɔ nitsumɔ lɛ.” 18  Shafan, ni ji woloŋmalɔ lɛ, kɛɛ maŋtsɛ lɛ hu akɛ: “Osɔfo Hilkia kɛ wolo ko ehã mi.”+ Kɛkɛ ni Shafan bɔi wolo lɛ kanemɔ yɛ maŋtsɛ lɛ hiɛ.+ 19  Be ni maŋtsɛ lɛ nu Mla lɛ mli wiemɔi lɛ nɔŋŋ lɛ, egbála etadei lɛ.+ 20  Kɛkɛ ni maŋtsɛ lɛ fã Hilkia, kɛ Ahikam,+ Shafan binuu lɛ, kɛ Abdon, Mikaia binuu lɛ, kɛ Shafan, woloŋmalɔ lɛ, kɛ Asaia, maŋtsɛ lɛ tsulɔ lɛ akɛ: 21  “Nyɛyaa, nyɛyabia Yehowa nii nyɛhãa mi kɛ mɛi ni eshwɛ yɛ Israel kɛ Yuda lɛ yɛ wiemɔi ni yɔɔ wolo nɛɛ ni ana lɛ mli lɛ naa; ejaakɛ Yehowa mli ewo la waa ewo wɔ, ejaakɛ wɔtsɛmɛi lɛ booo Yehowa wiemɔi lɛ toi, anɔkwa, amɛyeee nibii fɛɛ ni aŋmala yɛ wolo nɛɛ mli lɛ anɔ.”+ 22  No hewɔ lɛ, osɔfo Hilkia, kɛ mɛi ni maŋtsɛ lɛ tsu lɛ tee gbalɔ yoo Hulda ŋɔɔ.+ Shalum, mɔ ni kwɛɔ atadei lɛ anɔ lɛ ŋa ji lɛ; Shalum tsɛ ji Tikwa, ni Tikwa tsɛ ji Harhas. Yerusalem Kpokpaa Hee lɛ mli Hulda yɔɔ; ni amɛkɛ lɛ yawie yɛ jɛmɛ.+ 23  Yoo lɛ kɛɛ amɛ akɛ: “Nɔ ni Yehowa, Israel Nyɔŋmɔ lɛ kɛɛ nɛ, ‘Nyɛyakɛa nuu lɛ ni tsu nyɛ miŋɔɔ lɛ akɛ: 24  “Nɔ ni Yehowa kɛɛ nɛ, ‘Mikɛ sane fɔŋ baaba maŋ nɛɛ kɛ emli bii lɛ anɔ,+ ni ji loomɔi fɛɛ ni aŋmala yɛ wolo+ lɛ ni akane yɛ Yuda maŋtsɛ lɛ hiɛ lɛ mli lɛ. 25  Ejaakɛ amɛje misɛɛ+ ni amɛmiishã lasu afɔle amɛmiihã nyɔŋmɔi krokomɛi koni amɛkɛ amɛninenaa nitsumɔi lɛ fɛɛ awo mimli la,+ mimli baawo la awo maŋ nɛɛ aahu akɛ agbeŋ.’”+ 26  Shi yɛ Yuda maŋtsɛ lɛ ni tsu nyɛ koni nyɛbabi Yehowa nii lɛ gbɛfaŋ lɛ, nɔ ni nyɛkɛa lɛ nɛ, “Nɔ ni Yehowa, Israel Nyɔŋmɔ lɛ kɛɛ nɛ: ‘Wiemɔi ni onu lɛ hewɔ lɛ,+ 27  otsake otsui* ni oba ohe shi yɛ Nyɔŋmɔ hiɛ yɛ nɔ ni ewie yɛ maŋ nɛɛ kɛ emli bii lɛ ahe, ni oba ohe shi yɛ mihiɛ ni ogbála otadei lɛ ni ofó yɛ mihiɛ, no hewɔ lɛ, mi hu minu oyaafo lɛ,+ Yehowa kɛɛ. 28  No hewɔ lɛ, mahã ogbo* yɛ toiŋjɔlɛ mli ni abaafu bo yɛ ofuuhe lɛ, ni ohiŋmɛii enaŋ sane fɔŋ ni baaba maŋ nɛɛ kɛ emli bii lɛ anɔ lɛ.’”’”+ Kɛkɛ ni amɛba ni amɛbabɔ maŋtsɛ lɛ amaniɛ. 29  Ni maŋtsɛ lɛ tsu ni ayabua Yuda kɛ Yerusalem onukpai lɛ fɛɛ anaa kɛba eŋɔɔ.+ 30  No sɛɛ lɛ, maŋtsɛ lɛ kɛ Yuda hii lɛ kɛ Yerusalembii lɛ kɛ osɔfoi lɛ kɛ Levibii lɛ fɛɛ—maŋbii lɛ fɛɛ, mɔ bibioo jio, mɔ wulu jio, kwɔ kɛtee Yehowa shĩa lɛ. Ekane kpaŋmɔ wolo ni ana yɛ Yehowa shĩa lɛ mli wiemɔi lɛ fɛɛ yɛ amɛtoiiaŋ.+ 31  Kɛkɛ ni maŋtsɛ lɛ yadamɔ egbɛhe lɛ ni ekpaŋ*+ yɛ Yehowa hiɛ akɛ, ebaanyiɛ Yehowa sɛɛ ni ebaaye ekitãi lɛ, kɛ ekaimɔi lɛ, kɛ etaomɔ nii lɛ anɔ kɛ etsui fɛɛ kɛ esusuma* fɛɛ,+ ni ji akɛ ebaaye kpaŋmɔ nɛɛ mli wiemɔi ni aŋmala yɛ wolo nɛɛ mli lɛ nɔ.+ 32  Agbɛnɛ hu, ehã mɛi fɛɛ ni yɔɔ Yerusalem kɛ Benyamin lɛ mɔ kpaŋmɔ lɛ mli. Ni Yerusalembii lɛ ye Nyɔŋmɔ, ni ji amɛtsɛmɛi a-Nyɔŋmɔ lɛ kpaŋmɔ lɛ nɔ.+ 33  Kɛkɛ ni Yosia jie nibii fɛɛ ni yɔɔ nyaŋemɔ* lɛ kɛje Israelbii lɛ ashikpɔji lɛ fɛɛ nɔ,+ ni ehã mɔ fɛɛ mɔ ni yɔɔ Israel lɛ sɔmɔ Yehowa, amɛ-Nyɔŋmɔ lɛ. Yɛ egbii lɛ amli fɛɛ lɛ, amɛgbaaa afã kɛjeee Yehowa, amɛtsɛmɛi a-Nyɔŋmɔ lɛ sɛɛ.

Shishigbɛ Niŋmaa

Loo “jatsuterelɔi.”
Hebri sht. ŋm., “otsui he ejɔ bɔdɔɔ.”
Hebri sht. ŋm., “mabua onaa mafata otsɛmɛi lɛ ahe.” Eji lalawiemɔ ni akɛtsuɔ nii kɛhãa gbele.
Loo “ekpaŋ ekoŋŋ.”
Loo “jie amagai.”