E se vaqaqai tiko ga me yacova mai nikua se kila vakacava na mona na ka e totoka. E sega ni vakamacalataka na iVolatabu se rawa vakacava qori. E kaya ga nida taleitaka na veika totoka baleta nida buli meda ucuya na Kalou. (Vakatekivu 1:27; Dauvunau 3:11) E tukuna tale ga na iVolatabu ni vakatubuqoroqoro na sala e buli keda kina na Kalou, qai vereverea na veika era cakava na veitikiniyagoda. Ni vakamacalataka qori na daunisame, a kaya: “Au vakacaucautaki kemuni [na Kalou] ni vakatubuqoroqoro qai veivakurabuitaki na noqu buli.”—Same 139:14.

Ia sa kauaitaki tale vakasivia nikua na irairai, qai veicalati na ka era veiuqeti kina na kabani ni vakaraitaki isulusulu kei na tabana ni itukutuku. E vakamacalataki ena ivola na Body Image ni dau tukuni vei ira na lewenivanua “nira na qai marau ga se lomavakacegu ke totoka na kedra irairai.” Na rai cala qori e guilecavi kina na ka e bibi cake mai na irairai, oya na loma ni tamata.—1 Samuela 16:7.

E laurai ni levu nikua era vakayagataka na kedra irairai mera veibacani kina. Ena vakadidike ni isoqosoqo na American Psychological Association (APA) ena 2007, e tukuni kina ni “veivagarogaroi na kedra irairai na yalewa ena veitabana ni itukutuku me maketetaki ga kina na ivoli.” Ia e tiko na vuna vinaka e uqeti keda kina na iVolatabu meda kua ni muria na ivakarau qori!—Kolosa 3:5, 6.

“Me kua ni kemuni idivi na veika e sau . . . , me kemuni idivi ga na tamata e loma, e tokara na isulu e sega ni rusa rawa, oya na yalomalumalumu kei na yalomalua, e talei sara ena mata ni Kalou.”—1 Pita 3:3, 4.

Era kaya eso ni dodonu mo “raqataka na totoka ni kemu irairai!” Sa takalevu na rai qori nikua. Ena dua tale na vakadidike ni isoqosoqo na APA, e tukuni kina nira vinakata na goneyalewa kei ira mada ga na gonelalai mera “wedevi . . . , mera raikiviti qai taleitaki ena vuku ni kedra irairai.” Ia e tukuna tale ga na APA ni rai va qori e  rawa ni vakaleqa nona ivakarau ni veimaliwai e dua kei na nona bula vakayago. E rawa ni vakavuna nona lomaocaoca, lomabibi, beci koya, se sevaki koya tale.

“Mo kauta tani mai lomamu na ka e vakatubuleqa, mo biuta tani na ka ca mai yagomu, ni ka wale na gauna vakaitabagone kei na gauna e tudonu kina e dua.”—Dauvunau 11:10.

Erau cavuti vata ena iVolatabu na “yalomatua” kei na rakorako. (1 Timoci 2:9) E levu nikua e donu nodra rai, era sega ni dokadokataka se kauaitaka vakasivia na kedra irairai. E vakadonui ira qori na Kalou, era taleitaki qai dokai nira dau veikauaitaki. (Maika 6:8) E rawarawa nodra kunea na itokani, nodra kunea tale ga e dua na kedra isa e vinakata me dei qai marautaki na vakawati, e sega ni kauaitaka ga na veiyacovi.

Sa rauta me veivakasalataki na iVolatabu me keda idivi “na tamata e loma.” (1 Pita 3:3, 4) E rawa ni veisau na totoka ni keda irairai ni toso na gauna. Ia na tamata e loma se na totoka ni noda itovo ena keda idivi ena noda bula taucoko, qai rawa nida vakavinakataka tiko ga ni toso na gauna! E kaya na Vosa Vakaibalebale 16:31: “E isala totoka na ulu sikoa ni kune ena sala ni yalododonu.” Se da mani gone se qase, eda na rokovi qai lomavakacegu ke da muria na ivakasala ni iVolatabu me baleta na irairai.

“E rawa ni lasu na matakamica, e rawa ni seavu na matavinaka, ia na yalewa e dokai Jiova ena vakacaucautaki.” —Vosa Vakaibalebale 31:30.