Raica sara na lewena

Raica na lewenivola

 Bula Vakaidewadewa Se Buli?

Na Bula ni Manumanu ni Veikau na Maka

Na Bula ni Manumanu ni Veikau na Maka

NA MANUMANU lailai qo e vaka na vodre, e kune ena vanua kece vakavo ga ena vanua batabata na Antarctica. Ia dua na gauna balavu nodra qoroya voli na kenadau e dua na mataqali maka e tiko ena vuaira kei Merika.

Vakasamataka mada: Era dau basika vakasauri ena gauna ni vulaitubutubu e vica vata na milioni na maka, qai vakamacawa ga nodra bula. Ena gauna lekaleka ni nodra bula, era dau vakatavovoka, lagasere, veivukayaki, ra qai vakawa ni bera nira mate tale. E kurabuitaki ni gauna e mate kina e dua na ilala maka, ena qai basika tale e dua na ilala ni oti e 13 se 17 na yabaki. Qori e vakatau vakalevu ena mataqali maka ena basika. E vakacava sara mada na bula ni manumanu lailai qo?

E vakasakiti dina na bula ni maka. Oti e dua na macawa nodra basika, era dau qai vakatubukawa. Nira vakayaloka na maka yalewa ena tabanikau, e rawa ni yacova sara na 400 ina 600 na levu ni yaloka. Sega ni dede era sa na mate na itubutubu. Ni saulaki na yaloka ni oti e vica na macawa, era lutu ina qele na luve ni maka, ra kelikeli sara e lomaniqele. Qori na vanua era bula voli kina me vica vata na yabaki, ra qai dau domica na wai mai na waka ni kau. Oti e 13 se 17 na yabaki, era biubiu mai lomaniqele ra qai mai bula voli e dela i vuravura me salavata kei na veiveisau e dau yaco ena nodra bula.

E tukuni ena dua na ulutaga ni mekesini me baleta na veika bula ni vereverea na veika e yaco ena bula ni maka, “qai vica vata na senitiuri nodra kurabuitaka voli na kena itukutuku na saenitisi . . . Era se vaqaqa tiko ga na dau dikeva na manumanu lalai na vuna e duatani kina na bula ni maka.” Qori e dua na ka e se sega tiko ga ni kilai ni dikevi na nodra bula na manumanu.

Cava o nanuma? E vu mai na bula vakaidewadewa na veika e yaco ena bula ni maka se sa vakarautaka rawa mai na Kalou?