Raica sara na lewena

Raica na lewenivola

Vale era vaka na valelaca ena buca o Tash Rabat

 VANUA KEI NA LEWENA | KYRGYZSTAN

Veisiko i Kyrgyzstan

Veisiko i Kyrgyzstan

E TOKA o Kyrgyzstan ena dua na yasa i Esia, ratou qai toka wavolita na vanua qo o Kazakhstan, Uzbekistan, Tajikistan, kei Jaina. E solegi ena waicevata na kena veiulunivanua cecere. Na ulunivanua cecere duadua e Kyrgyzstan e 7,439 na mita na kena cere mai waitui. E toka tale ga na kena veikauloa. O Kyrgyzstan e dua ga vei ira na vica na vanua e vuravura e vakaloga ni walnut (vuvale vata kei na pinati).

Vuli iVolatabu tiko e dua na iVakadinadina i Jiova kei na marama ni Kyrgyzstan

E kedra idivi na lewe i Kyrgyzstan na veikauaitaki kei na veidokai. E dau laurai vakalevu na nodra vakarokoroko nira veivosaki kei na dua e qase cake, vodo basi, motoka se so tale na sala ni veilakoyaki, se gauna ni kana kei na soqo.

Dua na vuvale e rawa ni tolu na kena gone se sivia. Ke gone duadua ena vuvale na tagane, ni oti mada ga na nona vakamau ena tiko ga e vale me qaravi rau na nona itubutubu me yacova na nodrau mate.

O ira tale ga na goneyalewa era sa vakavulici sara  ga nira se gone ena cakacaka ni vale. Gauna era qai itabagone kina, era sa rawa ni qarava e dua na vuvale. E dau lavaki na iduguci me baleti koya na yalewavou. Qori e rawa ni wili kina na iyaya ni moce, na isulu, kei na ibe ni vale. Ena solia na taganevou na ilavo kei na qelenimanumanu me iduguci kei yalewa.

E dau vakamatei na sipi se ose ena soqo ni marau se veibulu. E laurai tale ga ena gauna va qori na nodra veidokai na lewe i Kyrgyzstan. Ni wasewasei na lewenimanumanu, era na kana kece na tiko ena soqo qai vakatau na kedra iwasewase ena nodra yabaki ni bula se na nodra itutu. Na kedra kakana taleitaki mai Kyrgyzstan na beshbarmak, (waki vata kina na lewenimanumanu, varasa, falawa, kei na yaloka) ra qai dau kania sara ga e ligadra.

Na komuz e dua na iyaya ni ivakatagi