Raica sara na lewena

Raica na lewenivola

 ULUTAGA LEVU | SALA MEDA LEWAI KEDA VINAKA KINA

3. Kua ni Soro, Sasaga Tiko Ga

3. Kua ni Soro, Sasaga Tiko Ga

Era kaya e levu ni na qai matau vei iko e dua na ivakarau ni oti e 21 na siga. Ia era kaya na dauvakadidike ni so e sega ni va sara qori na kena dede, eso tale e taura toka e dua na gauna balavu mera cakava na veiveisau ena nodra bula. Me kua ni vakayalolailaitaki iko qori.

Raica mada e dua na ituvaki qo: O vinakata mo vakaukauayago vakatolu ena dua na macawa.

  • iMatai ni macawa, o rawata nomu isausau.

  • iKarua ni macawa, o calata e dua na siga.

  • iKatolu ni macawa, o rawata nomu isausau.

  • iKava ni macawa, o sega sara ga ni vakaukauayago.

  • iKalima ni macawa, o rawata tale na nomu isausau. Tekivu mai na gauna ya, o sa rawata e veimacawa na nomu isausau.

E lima na macawa na nomu sasaga tiko mo muria e dua na ivakarau vou. Ke o nanuma mada ga ni dua toka na gauna balavu qori, o na marau ga ni o kila o sa rawata na nomu isausau.

IVAKAVUVULI VAKAIVOLATABU: “De bale vakavitu na yalododonu ena duri tale.”Vosa Vakaibalebale 24:16.

E veiuqeti na iVolatabu meda kua ni dau soro, meda sasaga tiko ga. Meda kua ni leqataka na levu ni gauna eda bale kina, meda vakadeitaka ga meda duri tale ena gauna kece eda bale kina.

KA O RAWA NI CAKAVA

  • Kua ni nanuma ni sa tawayaga na nomu sasaga ke o sega ni rawata na nomu isausau ena so na gauna. Mo namaka ni na vakalatilati eso na ka ena nomu sasaga.

  • Vakasamataka na gauna e dau rawa vinaka kina na nomu sasaga. Kaya mada o saga tiko mo vakavinakataka na ivakarau ni nomu veimaliwai kei ratou na luvemu. E vinaka mo taroga: ‘Bau dua na gauna au via kailavaki ratou kina na luvequ, ia au qai sega ni cakava? Na cava ga au a cakava? Au rawa ni cakava tale vakacava ya?’ Na taro va qori ena uqeti iko mo sasaga tiko ga, me kua ni vakayalolailaitaki iko na ituvaki dredre o sotava.

Vakacava o via kila na sala ena vukei iko kina na ivakavuvuli vakaivolatabu mo valuta na lomaocaoca, me mamarau na nomu vuvale, mo vakila tale ga na marau dina? Tarogi ira na iVakadinadina i Jiova, se rai ena neimami website na jw.org.

Meda kua ni leqataka na levu ni gauna eda bale kina, meda vakadeitaka ga meda duri tale ena gauna kece eda bale kina