Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IVAKASALA INA VUVALE | VAKAWATI

Na iWali ni Veiba

Na iWali ni Veiba

ITUVAKI DREDRE

Ni o veivosakitaka e dua na ka kei watimu, vakacava drau dau veiba tu ga? O leqataka ni o na cakava e dua na ka ena vakacudrui watimu qai tini ina veiba katakata?

Ke vaka kina, mo nuidei ni rawa ni wali na ituvaki qori. Ia mo na kila mada e liu na vuna drau dau veiba kina.

VU NI VEIBA

Nanuma cala.

E tukuna o Tulia * e dua na yalewa vakawati: “So na gauna e dau taura cala o watiqu eso na ka au tukuna, seu nanuma niu a tukuna vua e dua na ka, ia au a sega dina ni tukuna.”

Duidui rai.

Se mani vakacava na nomudrau dau cakacaka vata vakaveiwatini, ena duidui tiko ga na nomudrau rai ena so na ka. Na cava na vuna? Baleta ni sega tu ga ni tautauvata na nodrau rai e le rua, na duidui ni rai qori e rawa ni vakavuna me marautaki se vakilai na dredre ena vakawati. Ia e levu na veiwatini era dau veiba ni duidui na nodra rai.

iVakaraitaki ca.

E kaya e dua na yalewa vakawati o Raijeli: “Rau dau veiba na noqu itubutubu rau qai dau veisavosa. Niu sa vakawati, au dau vosa vei watiqu me vaka ga na nona dau vosa o Na vei Ta. Au sega ni dau veidokai.”

Kila na vuna.

Eso tale na ka e dau vakavuna na veiba katakata, sega ni ka e veivosakitaki tiko ena gauna ya. Kena ivakaraitaki, ena rairai tekivu na veiba ni tukuna e dua vei kemudrau, “O dau bera tu ga!” e sega ni kena ibalebale ni vinakata o koya mo vakatotolo, ia e vinakata ga me kauaitaki.

Se mani cava e vakavuna na veiba, ena rawa ni vakavu tauvimate qai tini sara ina veisere ke yaco wasoma. Na cava gona me caka me kua kina na veiba?

 KA O RAWA NI CAKAVA

Ena rawa ni wali na veiba ke kilai na ka e vakavuna. Tovolea mo drau cakava mada qo ni vinaka tu na ituvaki e vale.

1. Drau yadua na tikinipepa, drau qai vola na veika drau se qai veibataka ga. Kena ivakaraitaki, ena rawa ni vola o tagane, “O maliwai ira tu ga na nomu itokani ena loma ni siga taucoko, o sega mada ga ni qiri mai mo tukuna na vanua o tu kina.” E rawa ni vola o yalewa, “O cudru baleta niu dau veimaliwai kei ira na noqu itokani.”

2. Tovolea mo drau yalorawarawa ni veitalanoataka na taro qo: Vakacava e bibi dina na ka e veibataki ya? E rawa ni guilecavi ga? Ena so na ituvaki, e vinaka mo drau veirogorogoci, drau qai raibaleta na ituvaki qori ena loloma me rawa ni drau veiyaloni tiko ga.—iVakavuvuli vakaivolatabu: Vosa Vakaibalebale 17:9.

Ke drau raica ni sega wale ga na betena na veika drau veibataka qori, drau veivosoti, drau qai guilecava.—iVakavuvuli vakaivolatabu: Kolosa 3:13, 14.

Ia ke drau nanuma ni bibi na ka drau veibataka, drau tovolea qo.

3. Vola na ka o nanuma ena gauna drau a veiba tiko kina, me cakava tale ga qori o watimu. Kena ivakaraitaki, ena rawa ni vola o tagane, “Au raica ni o sa maliwai ira tu ga na nomu itokani, e sega ni levu na gauna daru vakayagataka vata.” Ena rawa ni vola o yalewa, “Au raica ni o dau via ovisataki au tu ga.”

4. Drau veisau tikinipepa, qai wilika na ka drau dui vola. Na cava e kauaitaka vakalevu o watimu ena gauna drau a veiba kina? Drau veivosakitaka e dua tale na sala drau rawa ni walia kina na leqa, mo drau kua ga ni veiba.—iVakavuvuli vakaivolatabu: Vosa Vakaibalebale 29:11.

5. Drau veitalanoataka na veika drau vulica mai na vakatutu qori. Sala cava drau na muria kina na vakatutu qori mo drau kua kina ni veiba ena dua na gauna mai muri?

^ para. 7 Sa veisau eso na yaca.