I B’A lɔn denɲɛnin nin ye mɔgɔ min ye wa? Yezu lo. A wolotɔ lo wɛɛrɛ dɔ kɔnɔ, yɔrɔ min na u be bɛgɛnw mara. Mariyamu be Yezu lara bɛgɛnw ka dumunikɛminan dɔ kɔnɔ. Nka, mun na Mariyamu ni Yusufu be yan wɛɛrɛ kɔnɔ ni bɛgɛnw ye? Musow jigiyɔrɔ kɔni tɛ, tiɲɛn tɛ?

O kɔni. Mariyamu jigira o wɛɛrɛ kɔnɔ sabu Ɔrɔmu masacɛ Ogusiti tun ye sariya dɔ sigi ko bɛɛ ka taga a tɔgɔ sɛbɛ a wolodugu la. Yusufu tun wolola yan Bɛtilehɛmu dugu la. Tuma min na ale ni Mariyamu sera yen, u ma yɔrɔ sɔrɔ lonanjigiso si kɔnɔ. O lo y’a to u be yan wɛɛrɛ kɔnɔ ni bɛgɛnw ye. O loon yɛrɛ la, Mariyamu ye Yezu wolo! Nka i ko i ɲɛɛ b’a la, foyi ma kɛ denɲɛnin na.

I ɲɛɛ be sagadɛndɛbagaw la wɛɛrɛ donda la wa? U be nana Yezu lo filɛ. U tun b’u ka sagaw dɛndɛna kongo la sufɛ, ani yeelen dɔ manamanana k’u lamini. Mɛlɛkɛ dɔ tun lo! U siranna kosɔbɛ. Nka mɛlɛkɛ y’a fɔ u ye ko: ‘Aw kana siran, bari ne nana kibaro diiman dɔ fɔ aw ye. Bi, Kisibaga wolola aw ye Dawuda ka dugu la. An Matigi Krista lo. Aw bena a lanin ye bɛgɛnw ka dumunikɛminan dɔ kɔnɔ, faniw melekenin b’a la.’ O yɔrɔnin bɛɛ, mɛlɛkɛ caaman y’a daminɛ ka Ala tando. O kama, sagadɛndɛbagaw sinna ka taga Yezu yɔrɔ ɲini ani u y’a ye wɛɛrɛ kɔnɔ.

I b’a lɔn fɛɛn min kama Yezu lɔyɔrɔ ka bon kosɔbɛ wa? I b’a lɔn a ye mɔgɔ min ye tigitigi wa? I hakili b’a la ko an tun kumana Ala Dencɛ fɔlɔ koo la gafe nin ka maana fɔlɔ la wa? O Dencɛ nin ye baara kɛ ni Jehova ye k’a dɛmɛ ka sankolo ni dugukolo ni fɛɛn tɔɔw bɛɛ dan. O Dencɛ nin ye Yezu lo ye!

Jehova y’a Dencɛ niin ta sankolo la k’a don Mariyamu kɔnɔ na. O cogo la, deen y’a daminɛ ka bonya Mariyamu kɔnɔ na i ko denɲɛnin tɔɔw be bonya u bamusow kɔnɔ na cogo min na. Nka, o deen tun ye Ala Dencɛ ye. A laban, Yezu wolola yan wɛɛrɛ kɔnɔ Bɛtilehɛmu dugu la. Sisan, i b’a faamu fɛɛn min kama mɛlɛkɛw ninsɔndiyara kosɔbɛ ka Yezu wololi koo fɔ mɔgɔw ye wa?