Konsey saz lo lavi selibater ek lavi maryaz

“Mon pe dir zot sa . . . pour ed zot fer tou keksoz byen, e fer tou pour ki zot atas avek Senyer san rezerv.”​—1 KOR. 7:35.

1, 2. Akoz en dimoun i devret rod konsey Labib lo lavi selibater ouswa lavi maryaz?

NAPA bokou keksoz dan lavi ki kapab anmenn plis boner, fristrasyon ouswa lenkyetid ki nou relasyon avek dimoun lot sèks. I pa fasil pour fer fas avek sa bann santiman, sanmenm sa nou bezwen rod gidans Bondye. Me i annan ankor lezot rezon pour fer sa. En Kretyen ki satisfe avek son lavi selibater i kapab santi ki son fanmir ouswa zanmi pe met presyon lo li pour marye. En lot i kapab petet anvi marye, me i pa ankor zwenn sa konzwen ideal. Serten i bezwen gidans lo ki mannyer zot pou prepar zot lekor pour sa responsabilite ki en msye ouswa madanm marye i annan. Bann Kretyen ki selibater oubyen ki’n marye i ganny teste lo moralite dan domenn seksyel.

² Apard nou prop boner, sa bann sityasyon i kapab annan lefe lo lafason ki Zeova i konsider nou. Dan sapit 7 son premye let pour bann Korentyen, Pol ti donn gidans lo lavi selibater ek lavi maryaz. I ti anvi ankouraz son lekter pour “fer tou keksoz byen, e fer tou pour ki zot atas avek Senyer san rezerv.” (1 Kor. 7:35) O firamezir ki ou egzamin son konsey lo sa bann size enportan, esey vwar ki mannyer ou kapab servi Zeova pli plennman, ki swa ou marye oubyen ou selibater.

En gro desizyon personnel

3, 4. (a) Ki problenm ki kapab leve parler kan bann dimoun i tro konsernen pour en zanmi ouswa fanmir ki pa ankor marye? (b) Ki mannyer konsey Pol i kapab ed en dimoun pour annan en pwennvi balanse lo maryaz?

³ Parey bann Zwif dan premye syek, dan bokou kiltir bann dimoun i vwar li vreman enportan pour en dimoun marye. Si en zenn onm ouswa en zenn fiy i ariv en serten laz san ki i marye, son bann zanmi ouswa manm fanmir i kapab tant pour enkyet pour li e santi zot pouse pour konsey li. Zot kapab dir li ki i devret fer bokou plis zefor ankor pour rod en konzwen. Zot kapab sizer en dimoun konman en konzwen ideal pour li. Zot menm kapab aranze pour ki de selibater i zwenn kanmarad. Sa bann kalite laranzman i kapab parfwa anmenn lanbarasman, kas bann lanmitye e bles santiman sa bann ki enplike.

⁴ Pol pa ti zanmen fors personn pour marye ouswa pour reste selibater. (1 Kor. 7:7) I ti kontan pour servi Zeova san en madanm, me i ti respekte drwa lezot pour marye. Sak Kretyen ozordi osi i annan sa drwa pour deside pour li menm si i pou marye ouswa reste selibater. Personn pa devret met presyon lo li.

Profit byen lavi selibater

5, 6. Akoz Pol ti ankouraz bann Kretyen pour reste selibater?

⁵ En pwen remarkab dan parol Pol pour bann Korentyen i son pwennvi pozitif lo lavi selibater. (Lir 1 Korentyen 7:8.) Menm si Pol pa ti marye sa letan, i pa ti konsider li pli enportan ki sa bann ki ti’n marye, parey bann sef relizye selibater dan larelizyon Kretyen i fer. Plito, sa zapot ti met lanfaz lo en lavantaz ki bann minis sa bon nouvel ki selibater i annan. Ki sa lavantaz?

⁶ Souvan, en Kretyen selibater i pli fasilman kapab aksepte bann responsabilite dan  servis pour Zeova ki petet en dimoun marye pa ti pou kapab arive desarze. Pol ti ganny en privilez spesyal konman “zapot pour bann pep non-Zwif.” (Rom. 11:13) Lir Akt sapit 13 a 20 e akonpanny Pol ek son bann konpanyon misyonner anmezir zot al dan bann nouvo teritwar e form bann nouvo kongregasyon dan bann landrwa enn deryer lot. Dan son servis, Pol ti eksperyans en kantite difikilte ki pa bokou nou pou fer fas avek. (2 Kor. 11:23-27, 32, 33) Me i ti pey fre pour fer fas avek sa bann difikilte akoz i ti kontan pour ed en kantite zot pour vin bann disip Zezi. (1 Tesa. 1:2-7, 9; 2:19) Eski i ti pou’n kapab akonplir tou sa la si i ti’n marye ouswa annan en fanmir? Petet non.

7. Donn legzanp bann Temwen selibater ki’n profit byen zot sirkonstans pour promot lentere Rwayonm.

⁷ Bokou Kretyen ki pa ankor marye i profit zot sirkonstans pour fer en kantite pour lentere Rwayonm. Sara ek Limbania, de pionye selibater Bolivi ti al reste dan en vilaz kot personn pa ti’n prese pour bokou lannen. Eski i ti pou en problenm lefet ki i ti napa kouran laba? Zot ti dir: “Bann zabitan laba pa ganny distrer akoz napa ni radyo ouswa televizyon, alor zot ti pas plis letan pour lir dan zot letan lwazir.” Serten vilazwa ti montre sa de pionye serten vye magazin ek piblikasyon Temwen Zeova ki zot ti pe lir e ki ti’n menm aret ganny enprimen. Vi ki sa de ser ti’n zwenn bann dimoun ki enterese preski devan tou laport, zot ti vwar li difisil pour kapab fini tou lakaz dan sa teritwar. En madanm aze ti dir zot: “I bezwen ki lafen i pros akoz Temwen Zeova in reisi ariv kot nou a lafen de fen.” Serten dan sa vilaz pa ti tarde pour konmans asiste renyon.

8, 9. (a) Ki Pol ti annan antet ler i ti koz lo lavantaz servi Zeova konman en selibater? (b) Ki lavantaz bann Kretyen ki pa ankor marye i annan?

⁸ Byensir, bann Kretyen ki’n marye osi i ganny bann bon rezilta kan zot pres sa bon nouvel dan bann teritwar difisil. Me serten landrwa kot bann pionye selibater i ganny anvoye i kapab vreman difisil pour bann ki marye ouswa ki annan zanfan. Dapre sa ki i ti’n obzerve, Pol ti vwar ki i ti ankor annan bokou travay pour fer pour propaz sa bon nouvel dan sa bann kongregasyon. I ti anvi ki bokou i eksperyans sa menm lazwa parey li.  Pour sa rezon, i ti koz lo lavantaz servi Zeova konman en selibater.

⁹ En ser pionye Leta-z-ini ki selibater ti ekrir: “I annan ki krwar ki en dimoun ki pa marye pa pou zanmen ere. Me mwan mon’n remarke ki en bon lanmitye avek Zeova, se sa ki fer en dimoun toultan ere. Menm si lavi selibater i en sakrifis, i en kado merveye si ou byen profit li.” Konsernan trouv lazwa, i ti ekrir: “Lavi selibater i parey en peron ki kapab anmenn ou ver vre boner, me i pa en lobstak. Mon konnen ki Zeova i annan en gran lafeksyon pour tou dimoun, ki swa zot selibater ouswa zot in marye.” Konmela, sa ser i kontan pour servi dan en pei kot i annan plis bezwen pour bann proklanmater Rwayonm. Si ou en selibater, eski ou kapab servi ou liberte pour partisip bokou plis dan sa travay pour ansenny lezot laverite? Ou osi ou kapab vwar lavi selibater konman en kado presye sorti kot Zeova.

Bann selibater ki ti a kontan marye

10, 11. Dan ki fason Zeova i siport sa bann ki ti a voudre marye en zour me ki pa ankor trouv sa konzwen ideal?

¹⁰ Apre ki zot in viv en pe letan tousel, bokou serviter fidel Zeova i deside pour rod en konzwen pour marye. Zot demann Zeova led pour trouv sa konzwen ideal akoz zot konsyan ki zot bezwen gidans.​—Lir 1 Korentyen 7:36, NW. *

¹¹ Si ou swete marye avek en dimoun ki annan menm dezir avek ou pour servi Zeova avek tou son leker, kontinyen koz lo la avek Zeova dan lapriyer. (Fili. 4:6, 7) Malgre nenport ki kantite letan ou pou bezwen espere, pa zanmen dezespere. Annan konfyans dan nou Bondye lanmour konman sa Enn ki ed ou e ki pou donn ou sa sipor emosyonnel dapre ou bezwen.​—Ebr. 13:6.

12. Akoz en Kretyen i devret reflesir byen kan i ganny demande maryaz?

¹² En Kretyen selibater ki ti a voudre marye i kapab ganny demande maryaz par en dimoun ki pa tro tro serye dan laverite, ouswa menm avek en dimoun ki pa Temwen. Si sa i ariv avek ou, rapel ki sa douler ki en dimoun i kapab gannyen akoz i’n mal swazir en konzwen pour marye avek i kapab pli for ki sa dezir ki i ti annan ler i ti ankor selibater. Enn fwa ki ou’n marye, se pour le meyer e pour le pir, savedir zot devret reste ansanm pour larestan zot lavi. (1 Kor. 7:27) Pa bezwen taye pour marye zis akoz ou dezespere, parski ou pou regrete pli tar.​—Lir 1 Korentyen 7:39.

Prepar ou pour sa ki maryaz i anmennen

13-15. Ki problenm en koup i devret diskit lo la ler zot pe pwente?

¹³ Menm si Pol ti ankouraz kongregasyon pour servi Zeova konman bann selibater, i pa ti krwar ki i ti pli siperyer ki sa bann ki ti deside marye. Plito, son konsey enspire ti ed bann koup osi pour fer fas avek bann realite dan lavi maryaz e fer zot linyon vin pli solid.

¹⁴ Serten koup i bezwen aziste lafason ki zot krwar maryaz pou ete. Ler zot pe pwente, de dimoun i kapab krwar ki zot lanmour i inik, ekstraordiner e ki sa pou sifi pour zot trouv boner dan zot maryaz. Zot marye e dan zot rev zot krwar ki nanryen pa pou separ zot avek kanmarad e ki zot pou touzour ere. Sa fason panse pa rezonnab. I gou pour annan sa bann laspe romantik dan maryaz, me zis sa i pa ase pour ed en nouvo ek nouvel marye ler zot rankontre bann difikilte ki annan dan tou maryaz.​—Lir 1 Korentyen 7:28. *

¹⁵ Bokou parmi bann dimoun ki fek marye i sirprann, menm dezapwente kan zot konzwen i annan en pwennvi diferan avek zot lo bann size enportan. Zot kapab vwar  zot pa pe dakor avek kanmarad lo lafason ki zot devret depans larzan e detann zot, kote zot pou reste e ki kantite fwa zot pou al vizit zot fanmir. Zot tou le de zot annan bann laspe dan zot personnalite ki kapab irit kanmarad. Pandan ki zot pe pwente, i fasil pour pran sa bann keksoz alalezer, me pli tar i kapab met en kantite presyon lo maryaz. I byen pour en koup koz lo sa bann defo avan zot marye.

16. Akoz en koup i devret tonm dakor lo lafason ki zot fer fas avek bann defi dan lavi maryaz?

¹⁶ Pour kapab reisi e ere, en koup i devret travay ansanm pour fer fas avek sa bann defi. Zot devret tonm dakor lo konman pour disiplin zanfan e konman pour pran swen avek bann paran aze. Bann problenm familyal i kapab met bokou presyon lo sa koup, me sa pa devret separ zot. Si zot aplik konsey Labib, zot pou rezourd en kantite problenm, siport sa bann ki pa kapab ganny rezourd e kontinyen reste ere ansanm.​—1 Kor. 7:10, 11.

17. Ki lenkyetid pour bann “zafer lemonn,” en koup i ekspekte gannyen?

¹⁷ Pol ti mansyonn en lot realite konsernan lavi maryaz dan 1 Korentyen 7:32-34. (Lir.) En dimoun ki’n marye i “enkyet li avek bann zafer lemonn,” parey manze, lenz, landrwa reste ek lezot ankor ki pa relye avek bann keksoz spirityel. Akoz sa i le ka? Ler i ti ankor tousel, petet en frer ti pas plis letan dan minister. Me konman en msye marye, i bezwen pran serten sa letan e depans son lenerzi pour pran swen avek son madanm pour fer li plezir. Sityasyon i parey pour en madanm marye anver son msye. Akoz son lasazes, Zeova i rekonnet sa bezwen. Zeova i konnen ki pour en maryaz reisi, sa madanm ek sa msye i bezwen pran en pe sa letan ek lenerzi ki oparavan zot ti servi pour servi Li kan zot ti ankor selibater.

18. Ki azisteman konsernan bann aktivite lwazir serten i bezwen fer apre zot maryaz?

 ¹⁸ Me pa se tou. Si en koup i bezwen pran en pe sa letan ek lenerzi ki zot ti abitye donnen dan servis Bondye pour pran swen avek kanmarad, eski pa zot devret fer parey avek bann moman detant ki zot ti annan kan zot ti selibater? Ki lefe i pou annan lo en madanm marye si son msye ti kontinyen pas tou son letan dan sport e avek son bann zanmi? Ki mannyer en msye ti pou santi si son madanm ti pas en kantite letan dan bann aktivite lwazir avek son bann zanmi? I pa pou pran bokou letan pour sa konzwen ki pe ganny neglize santi li tousel, malere e abandonnen. Sa i kapab ganny evite si sa bann ki’n marye i fer tou pour ranforsi zot relasyon konman msye ek madanm.​—Efe. 5:31.

Zeova i ekspekte nou pir moralman

19, 20. (a) Akoz i pa enposib pour bann dimoun marye ganny tante pour pratik limoralite seksyel? (b) Ki danze en koup marye i kapab met zot lekor ladan si zot lwen avek kanmarad pour en bon pe letan?

¹⁹ Bann serviter Zeova i determinen pour reste pir moralman. Serten i deside marye pour zot kapab reste pir dan sa domenn. Me, maryaz pa neseserman protez nou lo kote limoralite seksyel. Dan letan lontan, en lavil avek miray toultour ti pou en proteksyon si selman bann dimoun ti reste dan sa lavil. Si en dimoun ti al an deor baro letan ki bann voler ek bandi ti pas pase, i ti kapab ganny vole ouswa touye. Pareyman, bann koup marye pa pou tonm dan limoralite seksyel si selman zot respekte sa laranzman ki Loter maryaz in met an plas pour zot.

²⁰ Pol ti dekrir sa bann limit dan 1 Korentyen 7:2-5. En msye i devret annan relasyon seksyel zis avek son madanm, e en madanm osi parey, i merit annan relasyon seksyel zis avek son msye. Zot tou le de zot devret “ranpli [zot] devwar,” andotmo, zot annan sa drwa pour annan relasyon seksyel avek zot konzwen. Par kont, serten msye ek madanm i pas en kantite letan lwen avek kanmarad, ki swa akoz zot in al vakans, ouswa akoz zot louvraz, e zot pa pe “ranpli [zot] devwar” seksyelman anver zot konzwen. Mazin move konsekans ki i kapab annan si akoz en “mank kontrol,” en dimoun i arive les li tonm dan latrap Satan e i komet adilter. Zeova i beni bann sef fanmir ki pran swen avek zot lakour san ki zot bezwen met zot lavi maryaz an danze.​—Ps. 37:25.

Byenfe pour obeir konsey Labib

21. (a) Akoz desizyon konsernan lavi selibater ouswa lavi maryaz i difisil pour fer? (b) Akoz konsey dan 1 Korentyen sapit 7 i bon?

²¹ Desizyon an rapor avek lavi selibater ek lavi maryaz i parmi bann desizyon pli difisil ki en dimoun i bezwen fer. Tou imen i enparfe e lenperfeksyon i lakoz laplipar problenm ant bann imen. Alor, menm bann ki Zeova i kontan e beni pa kapab san poursan evit tou dezapwentman, ki swa zot selibater ouswa marye. Si ou aplik konsey saz ki dan 1 Korentyen sapit 7, ou pa pou annan sitan bokou problenm. Dan lizye Zeova ou pou “fer byen,” ki swa ou selibater ouswa ou’n marye. (Lir 1 Korentyen 7:37, 38.) Annan laprouvasyon Bondye i sa pli bon lobzektif ki ou kapab atenn. Si ou annan son laprouvasyon, ou pou annan en bon lavi la konmela e a lavenir dan nouvo lemonn. Sa letan, relasyon ant bann msye ek madanm pa pou anba bann presyon parey i le ka dan nou letan.

[Not anba lo paz]

Eski ou kapab reponn?

• Akoz personn pa devret met presyon lo son kanmarad pour marye?

• Dan ki fason ou kapab pli byen servi ou letan konman en selibater?

• Ki mannyer en koup ki pe pwente i kapab prepare pour bann defi ki maryaz i anmennen?

• Akoz maryaz pa garanti en proteksyon kont limoralite seksyel?

[Kestyon]

[Portre lo paz 16]

Bann selibater i ganny bokou lazwa kan zot servi plis zot letan dan minister

[Portre lo paz 18]

Ki azisteman serten i bezwen fer apre ki zot in marye?