Eski i annan kelken ki responsab tou mesanste?

“MON ti donn dyab ponnyendmen.” Sanmenm ki en komandan lafors Nasyon-z-ini Rwanda ti dir ler i ti pe reflesir lo sa ki ti’n arive an 1994 apre ki son sef ti’n dir li pa aret sa zenosid dan sa pei. Ler i ti pe fer komanter lo sa kantite vyolans ek kriyote ki ti pe arive sa letan, en lot temwen ti dir: “Si en dimoun i ankor pa oule krwar ki Satan i egziste, vin zwenn mwan kot latonm en lamas dimoun Rwanda.” Eski Dyab ki vreman responsab pour tou sa bann kriyote?

Laplipar dimoun pa oule krwar ki en move lespri envizib ki responsab pour sa kantite vyolans ek kriyote. Bokou i krwar ki sa i akoz lemal ki form parti nou natir e rezon ki nou fer sa ki mal i akoz nou bann move dezir egois. Lezot i krwar ki en group sekre dimoun ris e pwisan in manipil lezot pour plizyer dizenn lannen pour ki zot kapab diriz lemonn. Me byensir, i osi annan serten ki blanm bann gouvernman ek dirizan zot pei pour tou bann lenzistis ek soufrans ki zot vwar.

Ki ou panse ou? Akoz i annan sitan lemal, kriyote, atrosite ek soufrans dan sa lemonn ozordi malgre tou bann zefor ki pe ganny fer pour met zot anba kontrol? Akoz limanite i paret pe kontinyen al ver son prop destriksyon e pa pe ekout tou bann lavertisman? Eski i annan kelken ki responsab pour tou sa la? Lekel ki pe vreman diriz sa lemonn? Larepons i kapab sirprann ou.