Johan sin pekmi Biathlam 9:1-21
9 Vancungmi panganak nih a muko a tum tikah vancung in arfi pakhat vawlei ah a tlakmi kha ka hmuh. Pathian nih arfi cu khor thukpi tawh kha a pek.
2 Khor thukpi kha a hun tikah a chung in meikhu a hung chuak. Meiphu nganpi chung in a chuakmi meikhu bantuk a si. Khor thukpi chung in a chuakmi meikhu ruang ah nika le van cu an mui dih.
3 Meikhu chung in khaubawk an chuak i vawlei ah an phan. Pathian nih vawlei ah a ummi tlangngaikuang hna ngeihmi ṭhawnnak bantuk kha khaubawk cu a pek hna.
4 “Vawleicung i ramhring, thinghring le thingkung kha hrawk hna hlah u. An cal ah Pathian hmelchunhnak a ngei lomi lawng kha hrawk hna u” tiah ti an si.
5 Khaubawk cu mi thahnak nawl kha pek an si lo, thla nga chung hremnak nawl tu pek an si. An mi hremnak a fah ning cu tlangngaikuang nih mi a henhmi bantuk a si.
6 Cu caan ah cun mi nih thihnak kha an kawl len lai nain an hmu hrimhrim lai lo. Thih an duh tuk ko lai nain thihnak nih cun a zamtak hna lai.
7 Khaubawk hna an muisam cu raltuknak caah timhcia a simi rangtum bantuk a si; an lu ah sui bawiluchin bantuk kha an i chinh i an hmai cu minung hmai bantuk a si.
8 An sam cu nu sam bantuk a si i an ha cu chiandeih ha bantuk a si.
9 An ṭangphaw cu thir ṭangphaw bantuk a si i an thla zah thawng cu raltuknak ah a tli cutmatmi rangleng tampi thawng bantuk a si.
10 Tlangngaikuang bantuk in mei an ngei i an mei cu siivai a ngeimi hling bantuk a si. An mei cu mi kha thla nga chung fahnak pek khawhnak ṭhawnnak a ngei.
11 Siangpahrang pakhat an ngei i anih cu khor thukpi vancungmi kha a si. A min cu Hebru holh in Abaddon* ti a si i Greek holh in Apollion* ti a si.
12 Thil ṭihnung pakhat a dih cang. Mah hnuah a dang thil ṭihnung pahnih a ra rih lai.
13 Vancungmi paruknak nih a muko a tum tikah Pathian hmaiah a ummi sui biakṭheng ki hna lakin aw pakhat kha ka theih.
14 Cu aw nih cun muko aa putmi vancungmi paruknak kha “Zufrates tivapi ah hrenmi vancungmi pali kha thlah hna” tiah a ti.
15 Rikhiahmi kum le thla le ni le suimilam caah timhcia in a ummi vancungmi pali cu mi cheuthum cheukhat kha thah awkah thlah an si.
16 Rang cung ralkap hna cu nuai 200* an si tiah an timi kha ka theih.
17 Langhnak ah ka hmuhmi rangtum hna le a cung ah aa citmi hna muisam cu hitihin a si: An ṭangphaw cu mei bantuk in a sen, hyacinth lungvar bantuk in a dum i kat bantuk in a aihre. Rang hna i an lu cu chiandeih lu bantuk a si i an kaa in mei le meikhu le kat a chuak.
18 An kaa chung in a chuakmi rai pathum, mei le meikhu le kat nih minung cheuthum cheukhat kha a thah hna.
19 Rangtum hna i an ṭhawnnak cu an kaa le an mei ah a um. An mei cu rul bantuk a si i lu a ngei, an mei in mi kha harnak an pek hna.
20 Mah rai ruang ah thi loin a taangmi hna cu anmah kut in an serchommi thil ruang ah an i ngaichih hlei lo; khuachia biak le sui, ngun, dar, lung le thing in sermi siasal, zeihmanh a hmu kho lomi le a thei kho lomi le a kal kho lomi biak kha an ngol hlei lo.
21 An lainawnnak, an khuachia thiamnak, an nupa sualnak* le an firnak hna zong kha an i ngaichih hlei lo.
Footnotes
^ A sullam “Hrawhnak.”
^ A sullam “Hrawktu.”
^ Asiloah “20,000 × 10,000.” 200,000,000.
^ Greek, por·nei′a. Biafang Fianternak ah zoh.
