Johan sin pekmi Biathlam 13:1-18
13 Limkeng cu rili thetse cung ah a dir.
Cun ki pahra le lu pasarih a ngeimi sahrang pakhat rili chung in a hung chuahmi kha ka hmuh. A ki ah cun bawiluchin pahra an um i a lu ah cun Pathian thangchiatnak min an um.
2 Ka hmuhmi sahrang cu pawlai he aa lo, a ke cu vom ke bantuk a si i a kaa cu chiandeih kaa bantuk a si. Limkeng nih cun a ṭhawnnak le a bawiṭhutdan le a liannganmi nawlngeihnak kha sahrang cu a pek.
3 Sahrang lu pakhat cu thihpi awk tlak hma put dawh a simi kha ka hmuh. Asinain thihpi awk tlak a hma cu a dam ṭhan. Vawlei mi vialte nih upatnak he sahrang hnu kha an zulh.
4 Sahrang nawlngeihnak a petu limkeng kha mi nih an biak. Sahrang zong an biak i “Hi sahrang he aa lomi ahodah a um? Aho nih dah a doh khawh lai?” tiah an ti.
5 Sahrang cu porhlawtnak bia le Pathian thangchiatnak bia chimnak nawl pek a si i thla 42 chung a duh paoh in thil tuah khawhnak nawl zong pek a si.
6 Pathian thangchiatnak bia a chim leng ah Pathian min, a umnak hmun le vancung ah a ummi hna kha a thangchiat hna.
7 Mithiang mi hna kha doh awk le tei awkah nawl awnh a si i phun kip, mi kip, holh kip le ram kip cung ah nawlngeihnak zong pek a si.
8 Vawleicung ah a ummi vialte nih sahrang cu an biak lai. Anmah lakah ahohmanh hi, thah a rak simi Tuufa i nunnak cazual ah vawlei ser hramthawk* in an min ṭial a si lo.
9 Hna a ngeimi nih thei ko hna seh.
10 Sal ah tlaih awk a simi cu sal ah tlaih a si lai. Vainam in mi a thatmi cu* vainam in thah a si ve lai. Cucaah mithiang mi hna cu inkhawhnak le zumhnak an ngeih a hau.
11 Cun a dang sahrang pakhat vawlei chung in a hung chuahmi kha ka hmuh. Anih cu tuu bantuk in ki pahnih a ngei i limkeng bantuk in bia a hung chim.
12 Mah sahrang nih sahrang pakhatnak i a nawlngeihnak vialte kha amah hmai hrimhrim ah a hman. Thihpi awk tlak hma a ing ko nain a dam ṭhanmi sahrang pakhatnak kha vawlei le a cung i a ummi vialte cu a biakter hna.
13 Hmelchunhnak nganpipi a tuah i mi hmaiah van in vawlei ah mei hmanh a tlakter.
14 Mah sahrang nih sahrang pakhatnak hmaiah hmelchunhnak hna a tuah i vawlei mi kha lam a pialter hna. Cun vainam in hliam a si nain thih loin a nungmi sahrang pakhatnak i milem kha ser awkah vawlei mi kha a fial hna.
15 Sahrang cu sahrang pakhatnak i milem kha nunnak thaw peknak nawl a hmu. Cucaah sahrang pakhatnak i milem cu a holh kho i amah a bia duh lomi paoh kha a thah khawh hna.
16 Sahrang nih cun mihme le mingan, mirum le misifak, miluat le sal an dihlak in an orhlei kut asiloah an cal ah hramhram in hmelchunhnak a khenhter hna.
17 Sahrang min siseh, a min nambar siseh hmelchunhnak a ngeimi dah ti lo nih cun ahohmanh thil an caw kho lo, an zuar kho lo.
18 Cucaah fimnak ngeih a hau: Fimnak a ngeimi nih cun sahrang nambar kha tuak ko seh. Zeicahtiah mah cu minung nambar a si i a nambar cu 666 a si.
