Johan sin pekmi Biathlam 8:1-13
8 Tuufa nih cakhenh pasarihnak a phoih tikah vancung cu suimilam a cheu hrawng dai ṭhup in a um.
2 Cun Pathian hmaiah a dirmi vancungmi pasarih kha ka hmuh hna i annih cu muko pasarih pek an si.
3 Rimhmui khanghnak sui kheng aa putmi a dang vancungmi pakhat cu a ra i biakṭheng pawng ah a dir. Mithiang mi hna thlacamnak kha Pathian nih a ngaih lioah bawiṭhutdan hmai i sui biakṭheng cung pekchanh awkah rimhmui tampi pek a si.
4 Rimhmui a khu cu mithiang mi hna thlacamnak he vancungmi kut in Pathian hmaiah a kai.
5 Asinain vancungmi nih biakṭheng cung i meiṭil* kha rimhmui khanghnak kheng ah a rawn colh i vawlei ah a hlonh. Mah tikah khua a ri, aw thawng a thang, nimtlau a lek i li aa hnin.
6 Vancungmi pasarih cu an muko pasarih tum awkah timhcia an si cang.
7 Vancungmi pakhatnak nih a muko a tum tikah thi he aa cawhmi rial le mei cu vawlei ah an tla. Vawlei cheuthum cheukhat le thingkung cheuthum cheukhat cu an kang dih. Ramhring vialte zong an kang dih.
8 Vancungmi pahnihnak nih a muko a tum tikah a alh hluahmahmi, tlang nganpi he aa lomi thil pakhat cu rili ah a tla. Mah tikah rili cheuthum cheukhat cu thi ah an cang dih.
9 Rili chung i thilnung cheuthum cheukhat cu an thi dih. Tilawng cheuthum cheukhat cu an rawk dih.
10 Vancungmi pathumnak nih a muko a tum tikah meiinn bantuk in a ceumi arfi nganpi pakhat cu vancung in tiva cheuthum cheukhat le cerhti put hna cung ah a tla.
11 Cu arfi a min cu A Kha ti a si. Ti cheuthum cheukhat cu ti-kha ah an cang dih. Ti a khaat tuk caah mi tampi cu an thi.
12 Vancungmi palinak nih a muko a tum tikah nika cheuthum cheukhat, thlapa cheuthum cheukhat le arfi cheuthum cheukhat cu tuk an si. Cucaah nika, thlapa le arfi cheuthum cheukhat cu an mui dih. Chun cheuthum cheukhat le zan cheuthum cheukhat chung ceunak a um lo.
13 Cun khua ka hun zoh i vanlai ah a zuangmi mupi pakhat kha ka hmuh. “A taangmi vancungmi pathum nih an muko an tum cang lai. Muko aw ruang ah vawlei mi hna cu thil ṭihnung an tong lai, thil ṭihnung an tong lai, thil ṭihnung an tong lai!” tiah a aumi kha ka theih.
Footnotes
^ A hrampi, “mei.”
