Johan sin pekmi Biathlam 12:1-17
12 Cun vancung ah hmelchunhnak nganpi pakhat a lang: Minu pakhat cu nika kha aa thuam, thlapa kha a ke tang ah a chiah i a lu ah arfi 12 in sermi bawiluchin kha aa chinh.
2 Minu cu nau a pawi i a hrin dengmang cang caah nau nganfah in a hrum-ai.
3 Cun vancung ah a dang hmelchunhnak pakhat a lang ṭhan. Mei bantuk in a senmi limkeng nganpi pakhat cu lu pasarih le ki pahra a ngei i a lu ah bawiluchin pakhat cio aa chinh.
4 A mei in vancung arfi cheuthum cheukhat kha a hui i vawlei ah a thlak dih hna. Minu nih nau a hrinle cangka nau kha dolh ding in limkeng cu minu hmaiah a dir ko.
5 Minu nih miphun vialte thir fung in a uktu ding fapa te kha a hrin. A fapa cu bawiṭhutdan cung ah a ṭhumi Pathian sinah an kalpi colh.
6 Minu cu Pathian nih a timhpiaknak hmun, ramcar ah a zam. Cuka ah ni 1,260 chung an rak zohkhenh.
7 Vancung ah raldohnak a um: Mikhael* le a vancungmi nih limkeng kha an doh i limkeng le a vancungmi zong nih an rak doh ve hna.
8 Asinain annih cu an sung.* Vancung ah umnak hmun zong an ngei ti lo.
9 Cucaah vawleicung pumpi a hleng dihtu, Thangchiattu Satan tiah auhmi hlanlio rulpi, limkeng nganpi cu vawlei ah thlak a si. A vancungmi hna zong amah he thlak an si ve.
10 Vancung in aw thangpi nih hitin a ti:
“Pathian khamhnak a phan cang, a ṭhawnnak a lang cang, a Pennak dirh a si cang, Khrih nawlngeihnak langhter a si cang. Pathian hmaiah kan unau hna kha chunzan in sual a puhtu cu thlak a si cang!
11 Tuufa thi ruang ah le tehte an khaanmi bia ruang ah amah cu an tei. Thih ding a si hmanh ah an nunnak pek kha an sian.
12 Cucaah van le vancung ah a ummi hna, i lawm u! Vawlei le rili tu cu thil ṭihnung an tong cang lai. Zeicahtiah Satan cu nan sinah a rung ṭum cang i caan tawite lawng ka ngei cang ti a hngalh caah a thin a linh in a lin ko.”
13 Limkeng nih vawlei ah thlak ka si cang ti kha a hngalh tikah fapa a hringmi nu kha a hrem.
14 Asinain minu cu a umnak hmun, ramcar ah a zuan khawh nakhnga mupi nganpi thla pahnih pek a si. Rulpi he aa hlatnak cuka ah caankhat, caanhnih le caancheu chung* zohkhenh a si.
15 Mah tikah rulpi nih a kaa chung in ti kha tiva bantuk in minu hnulei in a chuahter, minu kha ti nih fenh seh law thi seh ti a duh caah a si.
16 Asinain vawlei nih minu kha a rak bawmh, vawlei nih a kaa a aan i limkeng kaa chung in a chuakmi tiva ti kha a dolh.
17 Mah tikah limkeng cu minu cung ah a thin a hung tuk i minu tefa a taang rihmi hna kha doh awkah aa thawh. Annih cu Pathian nawlbia a zulmi le Jesuh kong tehte khaannak rian a ngeimi an si.
