Johan sin pekmi Biathlam 15:1-8
15 Cun vancung ah a lianngan i khuaruahhar a simi a dang hmelchunhnak pakhat ka hmuh ṭhan. Rai pasarih a chuahtertu vancungmi pasarih kha ka hmuh hna. Mah rai cu hmanung bik an si, zeicahtiah mah rai thawng in Pathian thinhunnak cu a dong lai.
2 Cun mei he aa cawhmi, thlalang tili he aa lomi kha ka hmuh. Sahrang, a milem le a min nambar a teitu zong ka hmuh hna. Annih cu thlalang tili pawng ah an dir i Pathian tingtang kha an i put.
3 Pathian sal Moses hla le Tuufa hla kha hitin an sa:
“A Ṭhawng Bik Jehovah* Pathian, na rianṭuannak cu a lianngan i khuaruahhar an si. Zungzal Siangpahrang, na lam cu a dingmi le a hmaanmi an si.
4 Jehovah,* nangmah lawnglawng hi zumhawktlakmi na si caah ahodah nangmah ṭih loin le na min sunparnak pe loin a um lai? A dingmi na biaceihnak cu langhter a si cang caah miphun vialte cu na sinah an ra lai i an in biak lai.”
5 Cu hnuah vancung ah a ummi tehte khaannak puan thlam i hmunthiang aa hunmi kha ka hmuh.
6 Rai pasarih a chuahtertu vancungmi pasarih cu hmunthiang in an chuak, a thiang i a cermi khiangraang puan kha an i aih i an ṭang ah sui ṭangmenh kha an i menh.
7 Thilnung pali hna lakin pakhat nih vancungmi pasarih kha zungzal in zungzal tiang a nungmi, Pathian thinhunnak in a khatmi sui khengkuar pasarih kha a pek hna.
8 Hmunthiang cu Pathian sunparnak le ṭhawnnak ruang ah meikhu in a khat. Vancungmi pasarih nih an chuahtermi rai pasarih a dih hlan tiang hmunthiang chung ah ahohmanh an lut kho lo.
