Johan sin pekmi Biathlam 4:1-11
4 Mah hnuah vancung ah aa hungmi innka pakhat kha ka hmuh, a hmasa bik ka theihmi aw cu muko tum thawng bantuk a si i “Hika ah rak kai law hmailei ah a um dingmi thil kha kaan hmuhsak lai” tiah a ka ti.
2 Chikkhat te ah Pathian thiang thlarau cu ka cung ah a phan. Vancung ah bawiṭhutdan pakhat ka hmuh i bawiṭhutdan cung ah a ṭhumi zong ka hmuh.
3 A ṭhumi muisam cu jasper lungvar le sardius* lungvar bantuk a si. Bawiṭhutdan velchum cu emeral lungvar bantuk a simi chuncha nih a kulh.
4 Bawiṭhutdan velchum ah a dang bawiṭhutdan 24 a um. Cu bawiṭhutdan hna cung ah cun puan raang aa aih i sui bawiluchin aa chinhmi upa 24 an ṭhutmi kha ka hmuh.
5 Bawiṭhutdan in nimtlau a lek, aw thawng a thang i khua a ri; bawiṭhutdan hmaiah Pathian thlarau pasarih a aiawhmi mei alh pasarih a um.
6 Bawiṭhutdan hmaiah crystal lungvar bantuk a si i thlalang bantuk in a fimmi tili a um.
Bawiṭhutdan a laifang le a velchum ah an hmailei he, an hnulei he mit in a khatmi thilnung pali an um.
7 Thilnung pakhatnak cu chiandeih bantuk a si, thilnung pahnihnak cu cawtum bantuk a si, thilnung pathumnak cu minung hmai bantuk a ngei, thilnung palinak cu a zuang liomi mupi bantuk a si.
8 Thilnung pali hna cu thla paruk cio an ngei i a chunglei he, a lenglei he mit in an khat. “Hlanlio ah le atu ah le hmailei tiang zungzal in a ummi A Ṭhawng Bik Jehovah* Pathian cu a thiang, a thiang, a thiang” tiah chun he, zan he ngol loin an chim.
9 Bawiṭhutdan cung ah a ṭhumi, zungzal in zungzal tiang a nungmi Pathian kha thilnung hna nih sunparnak le upatnak an pek i an lawmh fatin,
10 upa 24 cu bawiṭhutdan ah a ṭhumi hmaiah an bawk i zungzal in zungzal tiang a nungmi Pathian kha an biak. An bawiluchin kha bawiṭhutdan hmaiah an chiah i,
11 “Jehovah* Pathian, nangmah nih zeizong vialte cu na ser, zeizong vialte cu na duhnak bang in ser an si i an hung um. Cucaah sunparnak, upatnak le ṭhawnnak cu hmuh awkah naa tlak” tiah an ti.
