Johan sin pekmi Biathlam 20:1-15
20 Cun khor thukpi tawh le cikcin nganpi aa putmi vancungmi pakhat vancung in a rung ṭummi kha ka hmuh.
2 Thangchiattu Satan tiah auhmi hlanlio rulpi, limkeng kha a tlaih i kum 1,000 chung a hren.
3 Kum 1,000 a dih hlan tiang miphun hna kha a hlen ti hna nakhnga lo limkeng cu khor thukpi chung ah a thlak, cun a khar i cakhenh a khenh. Cu hnuah limkeng cu caan tlawmpal chung thlah a si ṭhan lai.
4 Cun bawiṭhutdan hna kha ka hmuh, a cung i a ṭhumi hna cu biaceihnak nawl pek an si. Jesuh kong tehte an khaan ruang le Pathian kong an chim ruang ah thah* a simi kha ka hmuh hna. Annih cu sahrang le a milem a bia lomi an si i an cal le an kut ah sahrang hmelchunhnak a ngei lomi an si. Annih cu an nung ṭhan i Khrih he siangpahrang in kum 1,000 chung an uk.
5 Mah cu a pakhatnak thawhṭhannak a si. (A taangmi mithi hna cu kum 1,000 a dih hlan lo an nung rih lai lo.)
6 A pakhatnak thawhṭhannak ah aa telmi cu lunglawmmi le a thiangmi an si. Thih voihnihnak nih a tei kho hna lo. Annih cu Pathian le Khrih tlangbawi an si lai i Khrih he kum 1,000 chung siangpahrang in an uk lai.
7 Kum 1,000 a dihle cangka Satan cu thong chung in chuah a si lai.
8 Gog le Magog tiah timi, vawleicung killi ah a ummi miphun hna kha hlen awkah aa thawh lai i ral doh awkah a pumh hna lai. Annih cu rilikam thetse zat an si.
9 Vawleicung khuazakip ah an i ṭhek i mithiang mi hna riahhmun le Pathian dawtmi khualipi kha an kulh lai. Asinain van in mei a tla lai i a kangh dih hna lai.
10 Anmah a hlengtu Satan cu sahrang le profet deu an umnak, kat mei tili ah paih a si. Cuka ah chunzan in, zungzal in zungzal tiang hrem* an si lai.
11 Cun a raangmi bawiṭhutdan nganpi le a cung ah a ṭhumi kha ka hmuh. Van le vawlei cu a hmaika in an lo i hmuh khawh an si ti lo.
12 Cun mithi cu a hme he, a ngan he bawiṭhutdan hmaiah an dirmi kha ka hmuh. Cazual hna cu aa kau. Cun a dang cazual pakhat zong aa kau; mah cu nunnak cazual kha a si. Mithi mi hna cu cazual chung ah aa ṭialmi an tuahsernak ning in biaceih an si.
13 Rili nih a chung i a ummi mithi kha a chuah hna i thihnak le Thlan* zong nih an chung i a ummi mithi kha an chuah ve hna. Mithi cu anmahle an tuahsernak ning cio in biaceih an si.
14 Thihnak le Thlan* cu mei tili chung ah paih an si. Mei tili cu thih voihnihnak kha a si.
15 Mah leng ah nunnak cauk chung ah an min ṭial a si lomi hna zong mei tili chung ah paih an si.
Footnotes
^ A hrampi, “hreitlung in thah.”
^ Biafang Fianternak ah zoh.
^ Biafang Fianternak ah zoh.
