Sa United Nations Conference bahin sa Climate Change (COP21), nga gihimo niadtong Nobyembre 30 ngadto sa Disyembre 12, 2015, ang mga delegado gikan sa 195 ka nasod nagkatigom didto sa Paris, France, aron hisgotan kon sa unsang paagi mamenosan ang kadaot nga mahimo sa mga tawo ngadto sa klima sa yuta. Mga 38,000 ka tawo​—lakip ang mga opisyales sa gobyerno, mga scientist, mga environmentalist, ug mga negosyante​—ang mitambong sa maong conference. Libolibo sab ang mibisita sa public information area aron makakat-og dugang bahin sa climate change.

Bisag wala motambong ang mga Saksi ni Jehova niini nga conference, interesado sab sila bahin sa kalikopan o environment. Ginatos kanila ang nakigbahin sa espesyal nga kampanya didto sa Paris sa pagpaambit sa ilang binase sa Bibliya nga paglaom nga mabuhi sa usa ka planeta nga walay polusyon.

Samtang nagbiyahe diha sa pangpublikong transportasyon, nakaestorya sa usa ka Saksi ang usa ka lalaki nga taga-Peru, nga nagsul-ob ug tradisyonal nga sinina sa Peru. Miingon ang maong lalaki nga bisag maayo siyag panglawas ug malipayong nagpuyo sa usa ka nindot nga bukid, nabalaka gihapon siya sa kaugmaon sa atong planeta. Natandog siya sa makapadasig nga paglaom nga gipaambit kaniya, ug malipayon niyang gidawat ang contact card nga nagtudlo ngadto sa atong website, ang www.jw.org.

Diha sa tren, naestorya sa duha ka Saksi ang usa ka Amerikano nga environmental scientist. Nahingangha siya sa pagkahibalo nga ang mga Saksi ni Jehova kaduha nakadawat ug Four Green Globes rating gikan sa Green Building Initiative para sa ilang duha ka bag-ong natukod nga mga bilding nga ang disenyo ug pagtukod niini matawag nga “environmentally sustainable” o dili makadaot sa kalikopan. Kini nga mga bilding atua sa sangang buhatan sa mga Saksi ni Jehova sa Wallkill, New York, U.S.A. Malipayon usab nga gidawat sa maong lalaki ang contact card.

Kay nakadayeg sa sinserong interes sa mga Saksi bahin sa kalikopan o environment, daghan ang misaad nga ilang tan-awon ang atong website. Dihang nahibaloan sa usa ka delegado nga taga-Canada nga naningkamot ang mga Saksi sa pagpanalipod sa “nesting area” sa langgam nga eastern bluebird didto sa Warwick, New York, ang nahimutangan sa bag-ong world headquarters sa mga Saksi, siya miingon: “Ornithologist ko niadto sa wala pa ko moapil aning pagpanalipod sa environment. Karon pa ko nahibalo nga gitahod diay pag-ayo sa mga Saksi ni Jehova ang ihalas nga mga mananap ug ang kalasangan. Basahon nako ang inyong mga publikasyon ug tan-awon nako ang inyong website aron makakat-on pa kog dugang bahin ninyo!”