Ang tanang bilding sa Warwick complex gigamit na. Niadtong Septiyembre, mga 500 ka tawo ang nagpuyo sa Warwick. Apil niini ang mga boluntaryo sa konstruksiyon ug mga full-time personnel nga mibalhin gikag Brooklyn.

Gisusi sa artist ang reflection sa mga mirror tiles nga gamiton sa entrada nga bungbong sa eksibit nga “A People for Jehovah’s Name.” Ang mga tiles gipatuyo ug himo nga morag karaan tan-awon, nga mobagay sa makasaysayanhong tema sa eksibit.

Si Stephen Lett, membro sa Nagamandong Lawas sa mga Saksi ni Jehova, mao ang chairman sa unang Morning Worship program nga gi-broadcast gikan sa Warwick. Nianang buntaga, gibasa ni Brader Lett ang usa ka sulat nga nagpasalamat sa kapig 27,000 ka boluntaryo nga mitabang sa pagtukod sa bag-ong mga pasilidad ug sa daghang uban pa nga misuportar sa proyekto sa lainlaing paagi.

Giplastar sa karpentero ang mga letra diha sa karatula para sa usa sa tulo ka self-guided nga mga eksibit. Kini nga eksibit, “A People for Jehovah’s Name,” naghisgot sa modernong kasaysayan sa mga Saksi ni Jehova sukad sa mga 1870 hangtod karon.

Ang Writing Committee nakigmiting sa mga katabang niini ug sa mga membro sa Writing Department. Ang dagkong mga monitor nagpakita sa artwork nga gisugyot para sa umaabot nga mga publikasyon ug ang ubang mga departamento nga tua sa ubang mga complex makakomunikar sa committee panahon sa mga miting. Ang lamesa, nga gidonar daghang tuig nga miagi, gibalhin gikan sa Brooklyn ngadto sa Warwick.

Ang usa ka katabang sa Coordinators’ Committee, uban sa lain pang personnel nga nagtrabaho ubos sa direksiyon niini, naghisgot ug mga paagi sa pagtabang sa mga naapektohan sa Super Typhoon Haima (Bagyong Lawin), nga miigo sa Pilipinas usa ka adlaw lang nga miagi. Nakatabang ang video-conferencing equipment sa mga departamento sa world headquarters nga mahisgotan dayon ang dinaliang mga isyu ug makakomunikar sa mga sangang buhatan sa tibuok kalibotan.

Dunay bioretention pond sa tunga sa Maintenance Building ug sa dalan sa main entrance. Kini ug ang uban pang mga pond sa Warwick naggamit ug natural nga paagi sa pagsala sa gagmayng mga elemento gikan sa ulan nga makahatag ug polusyon, nga tungod niini naka-save ta ug mga 50 porsiyento nga kantidad nga magasto sa pagtaod ug naandang mga kanal. Dugang pa, ang treated ug gisala nga tubig mahimo nang paawason ngadto sa mga sapa nga dili na makadaot sa mga tanom ug hayop.

Mga trabahante nagdiskarga sa mga gamit diha sa receiving dock. Mga 80 ka boluntaryo ang mitabang sa headquarters personnel sa pagbalhin gikan sa Brooklyn ngadto sa bag-o nilang puy-anan sa Warwick.

Mga panadero nagyabo ug dakong minasa nga harina gikan sa mixing bowl ngadto sa lamesa. Kay bug-at man kaayo ang minasa nga harina nga moabot ug kapig 45 kilos (100 lbs), usa ka bowl hoist ang gamiton aron mas paspas ug luwas ang paghimo niini. Ang bakery sa Warwick duna poy gamit nga gitawag ug retarder/proofer, nga mahimong usbon ang kapaspas o kahinay sa fermentation pinaagi sa pagkontrol sa temperatura ug humidity. Tungod niining automatikong himan, mamenosan ang trabaho sa paglutog linibo ka pan kada semana.

Mga boluntaryo sa Building Services naghakot ug basura pagawas sa Maintenance Building. Lahi sa atong mga pasilidad sa Brooklyn, kadaghanan sa mga bilding sa Warwick konektado, busa mas diyutayng boluntaryo ang gikinahanglan sa paglabay sa mga basura ug sa ma-recycle nga mga butang.

Blouse nga giesprihan ug tubig aron mohumok ang panapton ug sayon rang plansahon diha sa universal form finisher. Sa aberids, ang Laundry Department sa Warwick makalaba ug kapig 5,000 kilos (11,000 lbs) nga mga sinina ug linen kada semana. Aron mamonitor ning mga butanga, may laundry personnel nga magbutang ug bar-code labels. Ang mga labels i-scan sa lainlaing dapit sa laundry aron maseguro nga ang tanang sinina o linen ikahatod balik sa hustong departamento o kuwarto.

Gisusi ug giayo sa mekaniko ang boom lift nga gigamit sa powerhouse. Pinaagi sa pagmenitar sa makinarya, mas dugay ning madaot ug luwas gamiton.

Giayo sa technician ang usa ka computer application nga nagpasalida sa introductory display sa eksibit nga “Faith in Action.”

Mga karpentero nagplastar ug bisikleta, gama niadtong 1903, para sa display sa eksibit nga “A People for Jehovah’s Name.” Kining gidonar nga bisikleta giayo didto sa Warwick, ug gamiton sa pagpakita sa paningkamot ug sakripisyo sa mga Estudyante sa Bibliya (karon gitawag nga mga Saksi ni Jehova) nga naggamit niini sa pagpakaylap sa mensahe sa Bibliya.

Mga karpentero nagtaod ug bildo nga mag-ali sa display diha sa “Photo-Drama of Creation,” usa ka binase sa Bibliya nga pelikula ug slide presentation nga gipasalida niadtong 1914 ug natan-aw sa mga siyam ka milyong tawo nianang tuiga.

Mga archivist ug graphic artist nag-andam sa 1544 nga edisyon sa Zurich Latin Bible aron i-display sa eksibit nga “The Bible and the Divine Name.” Ang pula nga arrow nga makita sa kilid sa Bibliya, sa atubangang bahin sa hulagway nagtudlo sa personal nga ngalan sa Diyos nga Jehova. Nag-amping gyod ang mga archivist nga mapreserbar ang karaang mga Bibliya. Pananglitan, ang mga panid gibutangag mga estrap nga polyester film, kontrolado ang temperatura sa gallery, ug ang fiber-optic nga mga suga sa mga display gisusi pag-ayo aron dili madaot ang karaang mga papel.

Escorted nga mga bisita nalingaw sa pagtan-aw sa Warwick complex gikan sa 23 metros (75-ft) nga tower. Sugod niadtong Abril 3, 2017, mahimo nang magpareserba ug tour sa self-guided nga mga eksibit ug sa Warwick facilities. Kadtong gustong mag-tour kinahanglang magpareserba ug oras pinaagi sa online reservation system nga makita sa among website sa seksiyon nga BAHIN KANAMO > MGA OPISINA UG TOUR.

Archivist nagplastar ug talagsaon kaayong unang edisyon sa 1611 King James Version diha sa display case niini. Ang mga display cases gituyo pagdisenyo ug gihimo sa mga boluntaryo sa Warwick.

Graphic artist nagplastar sa kalo diha sa display case. Kini nga kalo kang Joseph F. Rutherford, kinsa nanguna sa mga Saksi ni Jehova mga 100 ka tuig nga miagi. Kini nga gallery, nga bahin sa eksibit nga “A People for Jehovah’s Name,” nagpakita sa mga paningkamot sa karaang mga Saksi sa pagsangyaw sa maayong balita sa Gingharian.

Sa tabang sa audio recording team, usa ka magbabasa nag-asoy sa self-guided exhibit nga “The Bible and the Divine Name.” Paglabayg usa ka semana, kini nga recording booth ug ang uban pang mga gamit gibalhin gikan sa Brooklyn ngadto sa Warwick, ug ang recording studio gigamit na pag-usab. Kini nga studio (usa ka satellite studio sa pangunang mga recording studio sa Watchtower Educational Center sa Patterson) gigamit usab sa pagrekord sa New World Translation, The Watchtower ug Awake!, mga artikulo para sa jw.org, ug uban pang audio publication.

Gipintalan sa asistant sa karpentero ang mga kilid sa three-dimensional nga photo display. Kini nga display, nga bahin sa eksibit nga “A People for Jehovah’s Name,” naghisgot sa makasaysayanhong mga hulagway sa mga Estudyante sa Bibliya sa ulahing bahin sa katuigang 1900.

Gipintalan sa artist ang usa ka estatuwa nga Caleb, karakter sa animated series nga Mahimong Higala ni Jehova. Kini nga estatuwa ibutang sa gallery nga nagpakita sa mga gamit ug mga program nga gihimo sa mga Saksi ni Jehova para sa mga bata.

Karpentero nagtabas ug mga hulagway ug vinyl nga mga karatula para sa eksibit nga “A People for Jehovah’s Name.” Kapig 250 ka tawo, apil ang mga tighimog kabinet, computer programmers, designers, electricians, tile-setters, videographers, ug writers, ang nagtrabaho sa tulo ka eksibit nga mga museum sukad sa pagsugod hangtod natapos.