Sulat Gikan sa Norway

Pagduaw sa Dako ug Puting Kamingawan

SAYO kadto sa buntag sa tingtugnaw. Giwahing namo ang kortina aron makita kon maayo ba ang panahon. Nalipay kaayo mi kay hayag kaayo ang langit! Magsangyaw mig tulo ka adlaw sa Finnmarksvidda—usa ka dakong patag sa bukid amihanan sa Arctic Circle.

Bugnaw kaayo sa Norway kon tingtugnaw, busa nagpanagana mi pag-adto sa amihanang bahin sa kamingawan. Maayo na lang kay kauban namo ang tulo ka Saksi ni Jehova nga taga-didto. Nahibalo sila kon unsay dahomon busa gihatagan mi nilag maayong mga sugyot.

Diyutay ra ang dalan dinhi. Ang labing maayong paagi nga maduaw ang mga tawo sa hilit nga mga dapit mao ang pagsakay sa snowmobile. Among gikarga ang among sinina, pagkaon, ug ekstrang gasolina sa among mga snowmobile ug sa balsa. Nanganawkanaw ang halapad, natabonag yelo nga patag ibabaw sa bukid. Ang niyebe naggilakgilak samag mga brilyanteng nahayagan sa adlaw. Nindot kaayo ang talan-awon!

Ang Finnmarksvidda maoy pinuy-anan sa mga reindeer, moose, lynx, koneho, singgalong, wolverine, ug pipila ka oso. Apan ang gikahinaman gyod namo mao ang pagduaw sa mga tawong nagpuyo nianang dapita. Gusto kaayo namong makahimamat ug mga tawong Sami, nga namuhig mga reindeer o nagtrabaho diha sa mga sak-anan sa bukid.

Sa gawas sa unang sak-anan, among nahibalag ang pipila ka batan-ong manag-klasmet nga nag-ski sa kabanikanhan. Mihunong sila aron sa pagpakig-estorya namo, nga nangutana kon nag-unsa mi. Siyempre, nalipay mi sa pagpatin-aw kanila. “Pag-ayoayo mo!” miingon ang usa kanila sa dihang nanglakaw na mi. Sakay na usab sa among mga snowmobile mitabok mi sa dagko, nabagtok nga mga lanaw ug puti nga kamingawan. Makakita kaha mig panon sa mga reindeer?

Samtang nagpaingon mi sa usa ka gamayng balay, gitimbaya mi sa usa ka lalaki. Usa siya sa pipila lang nga namuyo didto. Sa dihang nakita niya nga naguba ang among balsa, mitanyag siyang ayohon kini. Relaks ra kaayo siya; ang mga tawo dinhi wala magdali. Busa relaks ra pod mi. Human niyag ayo sa balsa, amo siyang gipasalamatan ug gipaambit kaniya ang pipila ka punto sa Bibliya bahin sa kon nganong gitugotan sa Diyos ang pag-antos. Namati siya pag-ayo.  Sa wala pa mi manglakaw, iyang gidawat ang librong Unsay Tinuod nga Gitudlo sa Bibliya? ug ang mga magasing Bantayanang Torre ug Pagmata! Siya mipahiyom ug miingon, “Salamat sa inyong pagduaw.”

Human sa pipila pa ka duaw, nagkilumkilom na, ug mipaingon na mi sa balay nga among sak-an. Sa wala damha nakakita mig singgalong. Ang pulang balhibo niini naklaro pag-ayo tungod sa kaputi sa niyebe. Kini mihunong sa makadiyot, mitan-aw namo, ug dayon milakaw. Nianang tungora misugod na pag-ulag niyebe, maong lisod makita ang agianan. Nalipay kaayo mi sa dihang among nakita ang among sak-anan. Naghaling mi sa dapogan, ug nag-anam ka init ang among gisak-an. Bisag gikapoy mi sa tibuok adlawng biyahe, kami malipayon.

Morag dali ra kaayong mibuntag. Gikarga na pod namo ang mga butang sa snowmobile ug mibiyahe paingon sa kapatagan. Among gisubay ang usa ka suba ug nakaabot mi sa laing sak-anan sa bukid. Dinhi among nahibalag ang usa ka batan-ong lalaki, ug among gipaambit kaniya ang makapadasig nga mensahe sa Bibliya. Dayon, gitultolan mi niya sa dalan nga mas sayon agian.

Miabot na ang kataposang adlaw sa among pagduaw. Pagsulod namo sa Stabbursdalen National Park, misugat namo ang nindot kaayong talan-awon. Among nakita sa halayo ang natabonag-yelong kabukiran nga naggilakgilak tungod sa kahayag sa adlaw. Unya nakakita mig dakong panon sa mga reindeer! Sila nanibsib, nga naggamit sa ilang dagkong kuko sa pagkalot ug mga lumotlumot nga natabonan sa yelo. Sa unahan, nakakita mig tawong nagsultig Sami, nga naglingkod sa iyang snowmobile. Nagbantay siya sa iyang mga reindeer. Ang iyang iro mitabang kaniya sa pagbantay sa panon aron dili kini magkatibulaag. Sa makadiyot, ang iro mihunong ug nakapanimaho namo. Apan, mibalik ra dayon kini sa iyang trabaho. Among gisangyawan ang magbalantay. Siya mahigalaon ug namati kanamo.

Sa among pagpamauli, naghunahuna mi sa tanan namong nahimamat sa among 300 kilometros nga panaw. Gibati namong usa ka pribilehiyo nga duna mi gamayng nahimo sa pagduaw sa mga tawo niining dako ug puti nga kamingawan.

[Picture Credit Line sa panid 15]

© Norway Post