Diyos ba ang Mabasol sa Atong mga Problema?

SA DIHANG nakaagom ug seryosong kadaot sa utok ang hingkod nga anak babaye ni Marion, gihimo ni Marion kon unsay buhaton sa kadaghanan nato *. Siya miampo sa Diyos alang sa tabang. “Dili ako makahinumdom ug laing higayon nga gibati ko ang tumang kawalay-mahimo ug ang pag-inusara,” matod ni Marion. Sa ulahi, migrabe ang kahimtang sa iyang anak babaye, ug si Marion nagduhaduha bahin sa Diyos. “Nganong nahitabo man kini?” nangutana siya. Wala siya makasabot kon nganong ang mahigugmaon ug matinagdanong Diyos wala magtagad kaniya.

Ang kasinatian ni Marion dili gayod talagsaon. Gibati sa daghang tawo sa tibuok kalibotan nga sila gipasagdan sa Diyos sa mga panahon sa panginahanglan. “Nalibog gihapon ako kon nganong gitugotan sa Diyos ang daotang mga hitabo,” matod ni Lisa human sa pagkabuno sa iyang apong lalaki. “Wala mahanaw sa bug-os ang akong pagtuo sa Diyos, apan dili na kini sama kalig-on sa nangagi.” Sa susama, human makasinati sa usa ka way-hinungdan nga trahedya may kalabotan sa iyang batang lalaki, ang usa ka babaye miingon: “Ang Diyos wala maghupay kanako bahin sa nahitabo. Siya wala magpakitag ilhanan sa pagtagad o kahangawa kanako.” Midugang siya: “Dili gayod nako mapasaylo ang Diyos.”

Ang uban masuko sa Diyos sa dihang sila motan-aw sa kalibotan alirong nila. Ilang makita ang mga nasod nga nahupong sa kakabos ug kagutmanan, ang desperadong mga kagiw tungod sa gubat, dili-makalkulo nga gidaghanon sa mga batang nailo tungod sa AIDS, ug minilyong tawo nga gidaot sa ubang mga sakit. Tungod niini ug sa susamang mga trahedya, basolon sa daghan ang Diyos tungod sa daw pagkawalay-pagtagad.

Hinunoa, ang tinuod mao nga ang Diyos dili mabasol tungod sa mga problema nga nagsakit sa katawhan. Ngani, adunay katuohang mga katarongan sa pagtuo nga ang Diyos duol nang mag-ayo sa kadaot nga nasinati sa tawhanong pamilya. Gidapit ka namo sa pagbasa sa sunod artikulo ug imong masabtan nga ang Diyos tinuod nga may pagtagad kanato.

[Footnote]