Ang Kasegurohan ug Katagbawan sa Trabaho Nameligro

“ANG katungod sa pagtrabaho” hinungdanon alang sa tanang tawo, sumala sa Universal Declaration of Human Rights, nga gideklarar sa Hiniusang Kanasoran. Ugaling lang, dili gayod magarantiyahan ang maong katungod. Ang kasegurohan sa trabaho maapektohan sa daghang butang—gikan sa kahimtang sa lokal nga mga ekonomiya ngadto sa kahimtang sa pamatigayon sa kalibotan. Bisan pa niana, sa dihang mawad-an o mameligrong mawad-an ug trabaho ang mga tawo, sagad nga moresulta kini sa mga demonstrasyon, rayot, ug mga welga. Pipila lang ka nasod ang dili apektado niini. Bisan ang pulong “trabaho,” matod sa usa ka magsusulat, “kanunay gayod nga makapukaw ug kusganong mga reaksiyon.”

Ang trabaho hinungdanon kanato sa daghang katarongan. Gawas nga makahatag kini kanato ug kita, makahatag usab kini kanato ug kaayohan sa hunahuna ug emosyon. Ang trabaho motagbaw sa tinguha sa tawo sa pagkahimong mabungahong membro sa katilingban ug sa pagbaton ug katuyoan sa kinabuhi. Mohatag usab kini kanato ug usa ka sukod sa pagtahod sa kaugalingon. Busa, bisan ang pipila nga duna nay igong salapi nga makatagana sa ilang mga panginahanglan o kinsa angayan nang moretiro nagpadayon gihapon sa pagtrabaho. Oo, hinungdanon kaayo ang trabaho nga kon wala kini, motungha ang grabeng mga suliran sa katilingban.

Sa laing bahin, may mga tawong dunay trabaho apan nag-atubang ug daghan kaayong pagpit-os sa trabahoan mao nga sila nawad-an ug kalipay sa ilang pagtrabaho. Pananglitan, tungod sa kusog kaayong kompetensiya sa natad sa negosyo karon, nagkadaghang kompaniya ang nagkunhod sa ilang mga trabahante aron mamenosan ang gastos. Mahimong makapabug-at kini sa nahibiling mga empleyado, kinsa kinahanglang mopas-an ug dugang trabaho.

Ang modernong teknolohiya, nga gidahom unta nga mas makapasayon sa kinabuhi ug mas makapaepisyente sa trabaho, nakapasamot na hinuon sa kapit-os diha sa trabahoan. Pananglitan, tungod sa mga kompiyuter, fax machine, ug Internet, puwedeng dad-on sa mga tawo ang ilang trabaho ngadto sa balay inigpauli, sa ingon ang balay wala nay kalainan sa trabahoan. Gibati sa usa ka mamumuo nga mora siyag hinigtan tungod sa pager ug cell phone nga gipagamit kaniya sa kompaniya.

Ang gikahadlokan sa daghang edaran nga mga tawo sa atong kusog kaayong nagakausab nga kahimtang sa ekonomiya ug panarbaho mao nga basin isipon sila nga dili na produktibo bisan pag makaarang gihapon sila.  Mahitungod niini, ang kanhing Komisyoner sa Tawhanong mga Katungod nga si Chris Sidoti miingon: “Morag dunay pagtuo nga kon 40 anyos ka na, malisdan ka na sa paggamit ug mga kompiyuter ug bag-ong teknolohiya.” Busa, daghang kugihan nga mga mamumuo nga sa una giisip nga labing produktibo, karon giisip nga tigulang na ug dili na mapuslan. Pagkamakapaguol!

Masabtan kon nganong niining di pa dugayng katuigan mius-os ang maayong batasan sa pagtrabaho ug pagkamaunongon ngadto sa kompaniya. “Sa dihang ang mga tawo iitsa-puwera sa mga korporasyon gumikan lang sa gamayng kausaban sa stock market, ang pagkamaunongon ngadto sa korporasyon mawala,” matod sa magasing Libération sa Pransiya. “Siyempre, kinahanglang motrabaho ka, apan para sa imong kaugalingon, dili para sa kompaniya.”

Bisan pa niining nagkadako nga mga problema, nagpadayon gihapon ang paninugdang panginahanglan sa tawo nga motrabaho. Busa sa atong panahon nga kusog kaayong nagakausab, sa unsang paagi maugmad sa usa ka tawo ang timbang nga panglantaw sa sekular nga trabaho ug, sa samang higayon, mahuptan ang pagbati sa kasegurohan ug katagbawan sa trabaho?

[Hulagway sa panid 3]

Ang modernong teknolohiya mahimong nakapasamot sa mga kapit-os diha sa trabahoan