Sumala sa World Wildlife Fund, sa mga 1997 hangtod 2011, daghang bag-ong mga matang sa tanom ug mananap, lakip ang bitin nga ruby-eyed pit viper, nga nadiskobrehan sa Greater Mekong—rehiyon nga nagtadlas sa Cambodia, Laos, Myanmar, Thailand, Vietnam, ug sa probinsiya sa Yunnan, sa China. Sa bag-ong mga matang nga nadiskobrehan niadtong 2011, 82 niini maoy mga tanom, 21 ang reptilya, 13 ang isda, 5 ang amphibian, ug 5 ang mammal.

Ang human trafficking nahimo nang dakong problema sa “tibuok European Union,” miingon ang The Moscow Times. Ang mga tawo ibaligya para sa seksuwal nga katuyoan, pinugos nga pagtrabaho, ug bisan sa “ilegal nga pagbaligya sa mga organo sa tawo.” Gipahimuslan sa mga trafficker ang kapobrehon, kawalay-trabaho, ug diskriminasyon batok sa lalaki o babaye.

Ang mga tigdukiduki nga nagtuon bahin sa pagtan-awg TV sa mga bata ug tin-edyer miingon nga kadtong hinan-aw kaayo “lain ug kinaiya inigkadagko.” Sumala sa mga tigdukiduki, ang resulta sa ilang pagtuon nagsuportar sa rekomendasyon nga “1 ngadto sa 2 ka oras lang [patan-awon ang mga bata ug] maayong programa sa usa ka adlaw.”

Halos tanang “komunidad sa mga Lumad sa Alaska” anaa duol sa dagat o suba, ug 86 porsiyento niini apektado sa pagbaha ug pagkakankan sa yuta. Gipakita sa mga report nga ang mas init nga temperatura nakapalangan sa pagporma sa mga yelo nga maoy panagang sa mga komunidad batok sa bagyo sa mga bulan sa Septiyembre hangtod Nobyembre.

Bisag dako ang nagasto sa pagpatunghag enerhiya nga walay biya nga makadaot sa kinaiyahan, sama sa enerhiya gikan sa hangin ug adlaw, sa aberids, ang enerhiya nga napatungha karon parehas ra ka hugaw kon ikomparar 20 ka tuig kanhi, sumala pa kang Maria van der Hoeven, executive director sa International Energy Agency.