Pagpaniid sa Kalibotan

“Ang cellphone gigamit sa uban aron makalikay sa pagpakig-estorya—13% sa mga tag-iyag cellphone nagpakaaron-ingnong may kaestorya sa telepono aron makalikay sa pagpakig-estorya sa uban.”—PEW RESEARCH CENTER, U.S.A.

Sa miaging lima ka ting-init, ang luna sa dagat nga natabonag yelo sa Arctic misamot ka gamay.—BBC NEWS, BRITAIN.

“Mga 47% sa matikad nga yuta sa Africa wala gihapon katamni.”—THE WITNESS, SOUTH AFRICA.

“Sa miaging 10 ka tuig, ang samag-sekso nga kaminyoon gihimong legal diha sa 10 ka nasod (Netherlands, Belgium, Canada, Spain, South Africa, Norway, Sweden, Portugal, Iceland, ug Argentina).”—FAMILY RELATIONS, U.S.A.

Ang “Troubles” Dunay Epekto sa mga Tawo

Usa ka surbi sa Northern Ireland nagpakita nga ang panag-away sa relihiyon ug politika dunay epekto sa mga tawo. Kini nga panag-away nga gitawag didto ug “Troubles,” mikabat ug mga 30 ka tuig ug kapin sa 60 porsiyento sa populasyon ang na-trauma. Nakaplagan sa Bamford Centre for Mental Health and Wellbeing sa University of Ulster nga dihay higayon nga halos 1 sa 10 ka tawo sa Northern Ireland nakaagig post-traumatic stress disorder—“usa sa kinatas-an” sa kalibotan, nag-ingon ang The Irish Times. Kini midugang: “Ang Troubles maoy usa sa kinagrabehang panag-away sa kalibotan, nga maoy hinungdan sa kamatayon sa usa ka tawo sa matag 500.”

Grabeng Kausaban sa Klima “Normal na Karon”

Ang klima sa United States dako na kaayog kausaban. Kaniadto ang giisip nga dili normal nga klima—grabeng mga pagbaha, grabeng hulaw, ug grabeng pag-ulan ug yelo—“normal na karon.” Sa usa ka miting nga giorganisar sa Union of Concerned Scientists, si Katharine Hayhoe, usa ka climatologist sa Texas Tech University, miingon sa iyang mga kauban: “Naanad na kita sa pipila ka kausaban sa klima nga wala nato masinati kaniadto.” Si Hayhoe ug ang ubang eksperto nagtuo nga ang tawo maoy nakaingon sa kausaban sa klima ug sa tandogonon kaayong klima sa tibuok kalibotan.