Kaon ug preskong pagkaon. Pilia ang “tinuod” nga pagkaon​—puro ug preskong pagkaon nga ginakaon sa mga tawo sulod sa dugay nang panahon—​imbes ang moderno, giprosesong pagkaon. Ang mga linata ug gipaketeng pagkaon ug pagkaon gikan sa mga fast food restaurant sagad daghag asukar, asin, ug tambok, nga mahimong hinungdan sa sakit sa kasingkasing, estrok, kanser, ug ubang grabeng mga sakit. Sulayi ang pagluto pinaagig alisngaw, paghurno, ug pagsugba imbes pagprito. Sagoli ug daghang panakot ug lamas aron mamenosan ang asin. Ayohag luto ang karne, ug ayaw gayod pagkaon ug pan-os na.

Ayaw palabig kaon. Ang World Health Organization nagreport nga nagkadaghan ang sobrag timbang ug ang hilabihan katambok, nga maoy sagad nga resulta sa pagpalabig kaon. Nakaplagan sa usa ka pagtuon nga sa pipila ka dapit sa Africa, “mas daghang bata ang sobra sa timbang kay niadtong nag-antos sa malnutrisyon.” Ang hilabihan katambok nga mga bata dakog purohan nga makaagom ug sakit, sama sa diabetes, bisag bata pa. Mga ginikanan, pagpakitag maayong panig-ingnan sa inyong mga anak pinaagi sa dili pagpalabig kaon.

Kaon ug daghang utanon. Ang balanseng pagkaon gilangkoban ug lainlaing matang sa prutas, utanon, ug mga lugas ug kini menos sa karne ug carbohydrate. Sa mga nasod nga karne ang naandang pagkaon, mahimong mag-isda kas-a o kaduha sa usa ka semana, imbes magkarne. Menosi ang repinadong mga pagkaon sama sa pasta, puting tinapay, ug puting humay, nga menos ug sustansiya. Apan likayi ang posibleng makadaot nga popular nga mga diyeta. Mga ginikanan, ampingi ang panglawas sa inyong mga anak pinaagi sa pagtabang kanila nga maganahan sa sustansiyadong mga pagkaon. Pananglitan, pameryendaha silag mga nut ug maayong-pagkahugas nga preskong mga prutas ug utanon, imbes chips o kendi.

Inom ug daghang pluwido. Ang mga hamtong ug bata kinahanglang moinom ug daghang tubig ug uban pang wala-asukaring mga likido kada adlaw. Inom ug daghan niini ilabina kon init ang panahon ug kon hago ang imong trabaho ug ehersisyo. Ang maong mga likido makatabang sa paghilis sa imong gikaon, makapagawas sa mga hilo sa lawas, makapanindot sa kutis, ug makapamenos sa timbang. Tungod niini, maayo ang imong pamati ug himsog kang tan-awon. Likayi ang pag-inom ug daghang alkoholikong ilimnon ug tam-is nga mga imnonon. Ang pag-inom ug usa ka lata nga soft drink kada adlaw makadugang ug 15 libras (6.8 kilos) sa imong timbang sulod sa usa ka tuig.

Sa pipila ka nasod, ang hinlo nga tubig lisod mabatonan ug mahal kaayo. Apan, ang pag-inom niana hinungdanon. Ang nahugawan nga tubig kinahanglang pabukalan o butangag kemikal aron luwas imnon. Gikaingon nga ang hugawng tubig nakapatayg mas daghang tawo kay sa gubat o linog; gikataho nga mao kanay hinungdan sa kamatayon sa 4,000 ka bata kada adlaw. Alang sa mga masuso, ang World Health Organization nagsugyot nga gatas lang sa inahan ang ipasuso sulod sa unang unom ka bulan, dayon, gatas sa inahan ug ubang pagkaon hangtod sa edad nga dos anyos o kapin pa.