Ang mga Blin sa Rusya—Dili Lamang Ordinaryong mga Pankeyk

Tinampo sa magsusulat sa Pagmata! sa Rusya

Ang mga Pranses adunay pankeyk nga gitawag ug crepe, ang mga taga-Scotland adunay bannock, ug ang mga Amerikano adunay flapjack. Busa dili ikatingala nga ang mga Ruso adunay ilang matang sa pankeyk—ang blin, nga maoy pangunang kalan-on sulod sa dugay nang panahon.

Ang karaang mga Slavo naggamit sa mga blin ingong halad nga pagkaon diha sa ilang paganong mga rituwal ug nag-isip sa mga blin ingong haom nga simbolo sa lingin, init, bulawanon nga adlaw. Ang mga babaye nga bag-ong nanganak gipakaon ug mga blin. Kini gidalit usab diha sa mga kasal ug sa mga serbisyo sa paglubong, busa kini nahimong bahin sa kinabuhi sa mga tawo gikan sa pagkatawo hangtod sa kamatayon.

Ang mga Ruso karon kasagarang maghimog mga blin ginamit ang harina sa trigo, apan ang ubang mga harina magamit usab. Ang binatil sagad sagolag gatas o tubig o sinagol nang daan nga gatas ug tubig. Apan ang binatil mahimong sagolan usab ug krema, buttermilk, kefir (gipaaslom nga gatas sa kabaw), gipaaslom nga krema, o bisan unsang produkto sa gatas. Ang pagprito sa mga blin giisip nga usa ka kahanas tungod kay ang matag blin kinahanglang nipis kaayo ang pagkaluto—usa ka tumong nga dili daling makab-ot!

Ang paghimo sa paunod sa pankeyk giingon nga nagkinahanglan usab ug dakong kahanas. Mahimong ipaunod ang hinimo-sa-balay nga jam, sama sa raspberry, strawberry, blackberry, pula o itom nga gagmayng pasas, o cranberry. O mahimong ipaunod ang mga bulinaw, tagbak, salmon, tamban, bidbid, uhong, ginaling nga karne, o puting keso—nga idalit nga bulag o gikombinar. Apan ang naandang paunod didto sa Rusya mao ang pula o itom nga linutong bihod. Ug hinumdomi, ang mga blin lami kaayo kon kini bag-ong haon!

[Kahon/Hulagway sa panid 18]

RESIPE ALANG SA BUCKWHEAT NGA BLIN

Mga sangkap

1 ka tasang harina sa buckwheat

1 ka tasang harina sa trigo

2 ka kutsarang uga nga igpapatubong yeast

3 ka kutsarang mantekilya, gitunaw

2 ka itlog

3 ka tasang gatas

2 ka kutsarang asukar

Usa ka pudyot nga asin

Pagpreparar: Sagola ang harina sa buckwheat ug ang usa ka tasang gatas. Inita ang laing usa ka tasang gatas, ug idugang kana sa binatil, nga sagolon kini pag-ayo. Sa dihang mobugnaw na ang binatil, isagol ang uga nga igpapatubong yeast. Pasagding motubo ang binatil hangtod nga modoble ang gidaghanon.

Batila kana ginamit ang kahoy nga kutsara, unya timplahig asin ug asukar. Bulaga ang mga pughak ug ang mga puti sa itlog. Idugang ang pughak, init-init nga gitunawng mantekilya, ug ang harina sa trigo ngadto sa binatil, nga sagolon kana pag-ayo. Batila ang puti sa itlog, ug idugang kana sa binatil apil na ang dugang gatas sumala sa gikinahanglan. Pasagdi na usab kanang motubo.

Inita ang kalaha, ug pahiri kini ug diyutayng mantika o gitunaw nga mantekilya. Butangi kinig igong gidaghanon sa binatil nga blin, nga nipis lang kutob sa maarangan. Lutoa kana ibabaw sa hinay nga kalayo hangtod nga ang ilawom sa blin kolor bulawan na. Baliha ang blin, ug lutoa kana sulod sa 15 segundos. Ibalhin ngadto sa plato, ug hupting init ang blin samtang nagluto ka pa sa nahibiling binatil. Idalit ang mga blin nga naglut-od.