Ang Kinamaayohang mga Dulaan

Unsang matanga sa dulaan ang akong paliton alang sa akong anak? Pilay akong gastohon alang niini? Kon ikaw usa ka ginikanan, tingali nakasukna ka na niining mga pangutanaha sa daghang higayon. Buweno, ang maayong balita mao nga ang kinamaayohang mga dulaan mao ang mga dulaan nga barato.

“Ang mga bata mas makabenepisyo sa pag-eksperimento ug pagdukiduki kay sa magtan-aw lamang, busa ang simpleng mga dulaan nga nagkinahanglan ug paggamit sa imahinasyon mas maayo kay sa luho nga debaterya nga mga awto-awto o mosulti nga mga monyeka, nga maglimite sa mahimo sa imong anak,” nag-ingon ang librong Motivated Minds​—Raising Children to Love Learning. Ang ulahi nga gihisgotan nga mga dulaan tingali “makalingaw sa primero, apan kasagaran ang mga bata pul-an dayon niini tungod kay kining klaseha sa mga dulaan dili makapukaw sa ilang hunahuna sa pag-eksperimento, pagdukiduki, o pag-imbento.”

Depende sa edad sa bata, ang makapukaw sa hunahuna nga mga dulaan naglakip sa mga butang nga sama ka simple sa mga bloke-bloke, basiyo nga mga karton, papel, mga materyales nga gamit sa arte, ug bisan balas ug tubig. “Ang gagmayng mga dulaan, sama sa mga hayop sa uma,” nag-ingon ang Motivated Minds, “mohatag [sa bata] ug higayon sa pagparisparis, pagklase-klase, ug pagtandi, ug sa pag-ugmad sa iyang mga katakos sa pagsulti pinaagi sa pag-imbento ug mga estorya.” Ang libro nagsugyot usab ug simpleng mga instrumento sa musika​—kon andam ka nga moantos sa kabanha​—tungod kay magtugot kini sa mga bata sa pag-analisar sa mga tunog ug sa mga sumbanan niini.

Ang mga bata buhi ug mga imahinasyon, ug sila maikagon nga mokat-on ug modula. Busa nganong dili sila tabangan niining tanang tulo ka natad pinaagi sa maalamon nga pagpili sa ilang mga dulaan.