Gikan sa Among mga Magbabasa

Elektronikong mga Dula Ako 13 anyos. Sa dihang nakita nako ang magasin nga may panghapin nga serye nga “Elektronikong mga Dula​—Aduna bay Makadaot nga mga Bahin?” nahibalo ko nga para gayod kadto kanako! (Disyembre 22, 2002) Sa panid 7, gihubit ang usa ka dula nga gikabuangan nako sa usa ka higayon. Gusto kong pasalamatan kamo sa paglakip sa maong mga artikulo diha sa magasin tungod kay nakatabang kini kanako sa pag-usab sa akong mga dalan ug sa paghigugma pa gayod kang Jehova.

J. L., Tinipong Bansa

Hapit na kong mag-15 anyos, ug sa eskuylahan kinahanglan ming moreport bahin sa usa ka bag-ong ulohan nga among gusto. Kini nga Pagmata! miabot sa hustong panahon. Ang akong report popular kaayo sa klase. Nakakuha usab akog taas nga grado! Palihog padayona ang pagsulat ug mga artikulo nga sama niana.

J. A., Alemanya

Gusto ko gayong magpasalamat sa impormasyon nga gihatag pinaagi sa mga magasin nga inyong gipatik, apan sa dihang nabasa nako ang mga artikulo bahin sa elektronikong mga dula, nakahukom ako sa pagsulat dihadiha. Usa ako ka inahan sa duha ka anak, nga nag-edad ug 11 ug 3. Busa, ang impormasyon tukma kaayo sa panahon alang nako. Nasabtan ko pag-ayo ang gugma ug panalipod sa atong Maglalalang pinaagi sa maong mga publikasyon.

O. V., Tinipong Bansa

Abrolhos Ako 13 anyos. Nalingaw ako sa pagbasa sa artikulong “Abrolhos​—Usa ka Kasinatian nga Dili Makalimtan.” (Disyembre 22, 2002) Interesado kaayo akog talagsaong mga langgam, apan labi na akong interesado kon unsay nagkahitabo sa salog sa dagat ug sa mga isla. Naglaom ako nga padayon kamong magpatik ug mga artikulo nga sama niana.

V. J., Serbia ug Montenegro

Nalingaw ako pagbasa niining artikuloha. Gisulat kini sa paagi nga mahanduraw ko gayod ang nagsirkosirko nga mga balyena, ang mabulokon nga mga langgam nga nanaglupad ibabaw sa dagat, ug ang mga katakotan nga dunay nagkalainlaing matang sa mga isda nga gipakaon sa usa ka tawo. Nahupngan ako sa pagdayeg alang sa Maglalalang, ug gusto kong makita ang maong matahom nga dapit niining yutaa. Kasamtangan, gamiton ko kining artikuloha sa dihang makig-estorya sa mga tawong nagtuo nga makapuol ang pagpuyo sa walay kataposan sa yuta.

M. P., Polandia

Pagsulay sa Pagtuo Nalingaw ako sa artikulong “Pagsulay sa Pagtuo sa Slovakia.” (Disyembre 22, 2002) Sa pagkahuman nakog basa sa maong artikulo, gisugdan nako pagsulat kining sulata. Maingon nga nabuntog ni Ján Bali ang iyang mga pagsulay, kita kinahanglang magpabiling matinumanon. Ang labing matahom nga bahin sa maong artikulo mao ang iyang paghinumdom sa tin-aw nga paghulagway sa paraiso nga gihubit sa librong The Way to Paradise, nga gipatik niadtong 1924. Nalingaw ako niining bahina tungod kay naghisgot kini bahin sa bag-ong kalibotan. Ako nuybe anyos.

E. K., Hungaria

Pagpit-os sa Isigkaingon Ingong pamilya, gusto kaayo namong mosulat ug magpasalamat kaninyo tungod sa maanindot kaayong mga magasin. Sa kataposan, nakahukom kami sa pagsulat human mabasa ang artikulong “Mga Batan-on Nangutana . . . Sa Unsang Paagi Masagubang Nako ang Pagpit-os sa Isigkaingon?” (Disyembre 22, 2002) Kining artikuloha nakatabang namo sa pagsabot nga nailhan gayod sa batan-ong si David si Jehova ug kon unsa ka dako ang iyang pagsalig Kaniya. Nagmalamposon si David tungod kay wala siya mosalig sa kaugalingon niyang panghunahuna o nianang sa ubang mga tawo. Sa pagkatinuod, kon si Jehova dapig kanato, nganong mahadlok man kita sa atong isigkaingon?

F. H., Estonia

Tigbasa na akog Pagmata! sulod sa duha ka tuig, ug karon lang gayod ako natandog ug nadasig pag-ayo sa dihang gibasa nako kining artikuloha. Gibati ko nga morag gisulat kini alang gayod kanako. Daghan kaayong salamat sa nunot-sa-panahong impormasyon.

T. C., Tinipong Bansa