Buhing mga Mosaiko sa Montreal

TINAMPO SA MAGSUSULAT SA PAGMATA! SA CANADA

GIKAN sa Hunyo 19 hangtod sa Oktubre 9, 2000, ang matahom nga siyudad sa Montreal, Canada, nahimong tig-abiabi sa Mosaiculture International Montreal 2000 (MIM 2000), ang unang internasyonal nga eksibit sa eskultora sa mga bulak. Ubos sa temang “Ang Planeta Maoy Usa ka Mosaiko,” ang mga dibuhista gikan sa 14 ka nasod gidapit sa pagdisenyo ug sa paghimog mga usa ka gatos ka eksibit sa mga bulak.

Ang duha-ka-dimensiyonal nga mosaiko sa mga bulak​—diin gigamit ang mga tanom sa pagpormag larawan​—nagdayandayan sa publikong mga hardin sulod sa kasiglohan. Apan sa milabayng 50 ka tuig, ang mga hortikultor sa Tsina, Uropa, ug sa bisan diin nakahimog tulo-ka-dimensiyonal nga mga eskultora pinaagi sa pagbakbak sa metal nga mga kuwadro ginamit ang mga tanom nga maayong pagkapili.  Pinaagi sa pagkombinar sa maong duha ka matang sa mosaiko ingong usa ka eksibit, ang mga tig-organisar sa MIM 2000 nagbanhaw sa terminong “mosaiculture”​—nga unang gigamit sa paghulagway sa mga hardin sa Pransiya​—ug gipadapat kining terminoha sa duha- ug tulo-ka-dimensiyonal nga mga eskultora sa mga bulak. Tanantanan, mga tres milyones ka talagsaong piniling mga tanom ang gigamit alang sa MIM 2000. Aron mabisibisan ug maatiman ang buhing mga mosaiculture, gikinahanglan ang mga talento sa 68 ka hortikultor ug mga hardinero.

Ilabinang makaiikag ang mga mosaiko sa mga Insek, tungod kay ang mga nagbuhat niini naglala ug minasang kulonon, tai sa kabayo, ug uhot sa humay lapos sa metal nga mga kuwadro sa tulo-ka-dimensiyonal nga eskultora. Gigamit usab nila ang gagmitoyng mga tanom nga may gagmayng mga gamot nga nagkinahanglag diyutay kaayong yuta.

Ang tanang dibuhista nga misalmot sa MIM 2000 naglaom nga makadaog sa kompetisyon. Apan ang kadaghanang bisita natagbaw nga nakadayeg pag-ayo sa mamugnaong disenyo ug sa talagsaong katahom sa matag mosaiko. “Kini sa pagkatinuod maoy usa ka buhat sa arte,” mikomento si Lynn Duranceau, direktor sa internasyonal nga kompetisyon. “Sama kini sa usa ka gamayng museyo. Kami mapasigarbohon sa resulta.”

[Mga hulagway sa panid 24, 25]

Sa itaas: Eskultora sa panda, gikan sa Tsina

Sa tunga: Karaang palasyo, gikan sa Thailand, uban sa usa ka alibangbang, gikan sa Tsina

Sa ubos: Mga mallard, gikan sa Quebec, Canada

[Mga hulagway sa panid 25]

Sa itaas: Dibuho sa eskultora nga bulak ni Vincent van Gogh, gikan sa Canada; paboreal, gikan sa Pransiya