‘Ang Atong Kalibotan Mahimong Lahi’

Ang paningkamot nga makanselar ang kombensiyon sa mga Saksi ni Jehova sa Moscow sa miaging Agosto nakakuhag dakong pagtagad. (Tan-awa ang mga panid 27 ug 28 alang sa mga detalye.) Si Andrei Zolotov, Jr., mitaho sa The Moscow Times sa Agosto 21, 1999, nga “si Vladimir Kozyrev, luyoluyong direktor sa estadyum, miingon nga ang administrasyon dili supak nga himoon ang dakong panagkatigom sa mga Saksi ni Jehova. Siya miingon nga wala siya masayod kon diin gikan ang mando [sa pagkanselar niini].”

Sa usa ka sulat nga gipatik diha sa The Moscow Times usa ka semana sa ulahi, gidayeg sa usa ka magbabasa ang mantalaan tungod sa pagpatik sa “wala gayoy pagpihig” nga artikulo ug miingon nga kini “takos gayod sa pagtagad sa mga magbabasa.” Siya miingon: “Ang inyong asoy bahin sa grabeng mga kalisdanan nga giatubang sa mga Saksi ni Jehova sa pagpangandam alang sa ilang tinuig nga kombensiyon [nagyagyag] sa di-makataronganong pagtratar [kanila].”

Dayon ang magsusulat sa maong sulat nag-ingon nga ang mga Saksi ni Jehova “ilado kaayo sa kalibotan (ug karon sa Rusya usab) . . . Sila . . . ilado kaayo ingong buotan, maluloton, ug maaghop kaayong mga tawo nga sayon kaayong pakiglabotan, nga dili gayod mamugos sa ubang tawo ug kanunayng nagtinguhag pakigdait sa ilang mga relasyon sa uban bisag unsa pa ang ilang relihiyosong tinuohan kon kini ba Ortodoksong mga Kristiyano, mga Moslem o mga Budhista. Walay modawat ug hiphip, palahubog o mga giyanon sa droga taliwala kanila, ug ang katarongan yano kaayo: Naningkamot lamang sila nga magiyahan sa ilang pinasikad-sa-Bibliya nga mga tinuohan diha sa tanan nga ilang pagabuhaton o isulti. Kon ang tanang tawo sa kalibotan sa labing menos maningkamot sa pagkinabuhi uyon sa Bibliya ingon sa ginahimo sa mga Saksi ni Jehova, ang atong mapintas nga kalibotan mahimong lahi gayod.”

Ang mga awtoridad nga nag-imbestigar sa mga Saksi ni Jehova ug direktang nakiglabot kanila nagpanghimatuod sa giingon sa ibabaw. Ang maong mga awtoridad, pananglitan, naghatag sa mga Saksi ug mga permiso sa pagtukod niining matahom nga bag-ong Assembly Hall sa St. Petersburg, Rusya. Sa pagpahinungod niini sa miaging Septiyembre 18, ang tigomanan napuno sa 2,257 ka malipayong mga tumatambong, ug dugang 2,228 ang naminaw sa programa diha sa mga Kingdom Hall sa St. Petersburg ug sa sangang buhatan sa mga Saksi ni Jehova sa sikbit nga Solnechnoye.