Si Jehova nagsaad nga ang binhi ni Abraham pagahatagan sa yuta nga “gikan sa suba sa Ehipto” hangtod sa Suba sa Euprates. (Gen 15:18) Gisabot sa kadaghanang komentarista nga ang “suba sa Ehipto” nagtumong sa “bul-oganang walog sa Ehipto” nga karon gituohang mao ang Wadi el-ʽArish sa Peninsula sa Sinai, nga moagos ngadto sa Dagat Mediteranyo nga mga 150 km (90 mi) sa S sa Port Said. (Tan-awa ang EHIPTO, BUL-OGANANG WALOG SA.) Diha sa 1 Cronicas 13:5 mabasa sa pipila ka hubad ang “suba [shi·chohrʹ] sa Ehipto” (NW, La, AT), ug lagmit nga kini nagtumong usab sa Wadi el-ʽArish. Apan ang laing posibilidad mao nga kining duha ka teksto nagtumong sa usa ka sanga sa Nilo.​—Tan-awa ang SIHOR.