Usa ka prominenteng siyudad sa Romanhong lalawigan sa Pamfilia. Ang mga kagun-oban sa karaang Perga gituohan nga duol ra sa modernong balangay sa Murtana, mga 13 km (8 mi) pailaya gikan sa H nga baybayon sa Asia Minor ug mga 8 km (5 mi) sa K sa Suba sa Cestrus (Aksu). Mopatim-aw nga sa kakaraanan, sumala sa Gregong geograpo nga si Strabo, kini nga suba malawigan hangtod sa A sa Perga. (Geography, 14, IV, 2) Apan, ang kasikbit nga Atalia daplin sa baybayon sa Pamfilia daw maoy nahimong dunggoanan sa Perga ug, sa ulahi, nailado pa gani kay sa Perga.​—Itandi ang Buh 14:24-26.

Mao kining siyudara nga giadto ni apostol Pablo ug sa iyang mga kaubanan sa sayong bahin sa iyang unang misyonaryong panaw. (Buh 13:13) Sa hapit nang matapos ang panaw, ilang ‘gisulti ang pulong didto sa Perga,’ apan wala masayri kon may molupyo ba niini nga midawat sa Kristiyanidad.​—Buh 14:​24, 25.