[Heb., cha·ghavʹ].

Dili matino kon unsa nga insekto o mga insekto ang gitumong sa Hebreohanong termino nga cha·ghavʹ. Apan, sanglit ang dagko na, pak-an nga dulon (Heb., ʼar·behʹ) ang gihisgotan uban sa cha·ghavʹ diha sa Levitico 11:22 (ingong hinlo nga pagakan-on), ang cha·ghavʹ lagmit nagtumong sa usa ka tiglukso inay sa usa ka tiglupad.​—Tan-awa ang ftn sa Rbi8.

Ang ngalang “apan-apan” gigamit alang sa bisan hain sa daghang tiglukso nga mga insekto sa mga pamilya nga Acrididae (naglakip sa tiglalin nga mga dulon ug sa mga apan-apan nga may mugbong mga antena) ug Tettigoniidae (naglakip sa mga apan-apan nga may tag-as nga mga antena).

Gawas nga kini gitala ingong insekto nga hinlo kaonon ug gihisgotan ang pagkamalaglagon niini sa mga tanom (2Cr 7:13), ang apan-apan gigamit sa Kasulatan sa usa ka masambingayong paagi. Ang dili-matinumanong mga espiya sa Israel nagtaho nga sa gidak-on sila ingon lamang sa mga  apan-apan kon itandi sa mga molupyo sa Canaan. (Num 13:33) Sa panglantaw ni Jehova ug tungod usab sa iyang kadako, ang mga tawo, ilabina kadtong nagasukol sa Diyos, maoy ingon sa mga apan-apan. (Isa 40:22) Aron ipakita ang mga kalisdanan sa pagkatigulang, ang magtitigom migamit sa dagway sa usa ka apan-apan nga nagaaginod, sa ingon naghubit sa tawong tigulang ingong nagtikuko ug nanggahi ang lawas, nga ang mga bukton daw mibansiwag sa luyo.​—Ecc 12:5; tan-awa ang DULON.