Niadtong Disyembre 14, 2017, gisulod sa awtoridad sa Russia ang Assembly Hall sa mga Saksi ni Jehova sa Kolomyazhskiy, St. Petersburg ug gikompiskar kini. Wala ray nasamdan nga mga Saksi ni Jehova panahon sa raid, ug wala ra sab maunsa ang bilding.

Ang Assembly Hall mao ang kinadak-ang propidad nga giilog sa gobyerno sa Russia gikan sa mga Saksi human sa desisyon sa Appellate Chamber of the Supreme Court of the Russian Federation niadtong Hulyo 17, 2017. Ang Supreme Court nagdesisyon nga idili ang buluhaton sa mga Saksi sa tibuok Russia, ug ilogon ang ilang mga propidad.

Ang Assembly Hall dunay kapasidad nga 1,500 ug gigamit sa dagkong panagkatigom ug sa lokal nga mga kongregasyon human kini gi-renovate niadtong 2002. Nasayran sa mga abogado sa mga Saksi nga ang Russian Federation na ang nakarehistro nga bag-ong tag-iya sa Assembly Hall. Ug kini gigamit karon sa kasikbit nga health center. Gani, ila na kining gibutangan ug bag-ong karatula sa gate.

Ang gihimong pag-ilog nahitabo dayon usa ka semana human sa desisyon sa usa ka korte nga puwedeng himoong basehan aron ilogon ang hedkuwarter sa mga Saksi didto sa Russia, nga nahimutang duol sa St. Petersburg. Ang maong desisyon nagkanselar sa 17 na ka tuig nga kontrata sa hedkuwarter sa mga Saksi sa Russia ug sa Watchtower Bible and Tract Society of Pennsylvania. Kon mapildi sa apelasyon, ang desisyon puwedeng himoong legal nga basehanan sa pag-ilog sa maong propidad ug sa ubang propidad sa mga Saksi sa Russia nga gipanag-iya sa laing nasod.

Giisip sa mga Saksi ni Jehova ang gihimo sa gobyerno sa Russia ingong grabeng paglapas sa relihiyosong katungod. Dili lang ang ilang kagawasan sa pagsimba ang giilog kondili ang ila usab nga mga propidad—kadaghanan niini gipalit o gi-renovate sa ordinaryong mga molupyo sa Russia. Gihimo sa mga Saksi ang tanan aron iapelar ang gibuhat sa gobyerno. Nagsang-at na silag reklamo ngadto sa European Court of Human Rights ug sa UN Human Rights Committee.